ພິທີປາຖະກະຖາ ວັນສ້າງຕັ້ງແນວລາວສ້າງຊາດ, ວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13 ສິງຫາ 1950-13 ສິງຫາ 2024) ໄດ້ຈັດຂຶ້ນໃນວັນທີ 15 ສິງຫາ 2024 ທີ່ສະໂມສອນຫຼັກ 4 ເປັນກຽດ ປາຖະກະຖາໂດຍທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາການນໍາຂອງແຂວງ, ຄະນະປະທານແນວລາວສ້າງຊາດແຂວງ, ຄະນະພະແນກ ຖວທ ແຂວງ, ບັນດາພະນັກງານປະຕິວັດອາວຸໂສບຳນານ, ພະແນກການ, ກຳລັງ ປກຊ-ປກສ, ຂະແໜງການຕ່າງໆອ້ອມຂ້າງແຂວງເຂົ້າຮ່ວມ.
ໃນພິທີປາຖະກະຖາ ແມ່ນໄດ້ຍົກໃຫ້ເຫັນເຖິງພາລະບົດບາດ, ຄວາມໝາຍ, ຄວາມສຳຄັນ ແລະ ການເຕີບໃຫຍ່ຂະຫາຍຕົວຂອງ 2 ວັນສໍາຄັນດັ່ງກ່າວ. ຊຶ່ງແນວລາວສ້າງຊາດ ຫຼື ແນວລາວອິດສະຫຼະ ໃນສະໄໝກ່ອນ ແມ່ນໄດ້ປະຕິບັດບົດບາດອອກໜ້າແທນພັກ ເພື່ອເຕົ້າໂຮມກ້ອນກໍາລັງສໍາພັນທະພາບ ລະຫວ່າງ ຊົນຊັ້ນກໍາມະກອນ-ຊາວກະສິກອນ ແລະ ບັນດາກໍາລັງການເມືອງ, ການຈັດຕັ້ງສັງຄົມຕ່າງໆ, ອອກແຮງເຕົ້າໂຮມຄວາມສາມັກຄີປອງດອງທົ່ວປວງຊົນອ້ອມຂ້າງເປັນຕົ້ນ: ສໍາພັນພິເສດກັບກອງທັບ ແລະ ປະຊາຊົນຫວຽດນາມອ້າຍນ້ອງ, ສໍາພັນ 3 ຊາດອິນດູຈີນ, ເຮັດສໍາເລັດພາລະກໍາປະຫວັດສາດ ອັນສະຫງ່າອົງອາດຄື: ປົດປ່ອຍຊາດ ອອກຈາກແອກປົກຄອງລ່າເມືອງຂຶ້ນແບບເກົ່າ, ບັງຄັບໃຫ້ພວກລ່າເມືອງຂຶ້ນແບບເກົ່າຍອມເຊັນສັນຍາເຊີແນວ ໃນປີ 1954 ຍອມຮັບຮູ້ເອກະລາດ ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ, ເຮັດໃຫ້ຊື່ສຽງ ແລະ ບົດບາດຂອງລາວພົ້ນເດັ່ນຂຶ້ນໃນເວທີການເມືອງຂອງໂລກ, ກໍາລັງປະຕິວັດໄດ້ມີ 2 ແຂວງເຕົ້າໂຮມຄື: ຜົ້ງສາລີ ແລະ ຫົວພັນ ທັງມີຖານະຖືກຕ້ອງຕາມກົດໝາຍ.
ສ່ວນການເຕີບໃຫຍ່ຂະຫຍາຍຕົວຂອງສື່ມວນຊົນ ໃນຖານະເປັນກະບອກສຽງຂອງອົງການຈັດຕັ້ງ ພັກ-ລັດ ແລະ ສັງຄົມໃນການໂຄສະນາ, ສຶກສາອົບຮົມແນວທາງຂອງພັກ, ລະບຽບກົດໝາຍຂອງລັດ, ປຸກລະດົມນໍ້າໃຈຮັກຊາດ, ສະໜອງຂໍ້ມູນຂ່າວສານທາງດ້ານການເມືອງ, ເສດຖະກິດ, ສັງຄົມ, ວິທະຍາສາດ, ເຕັກໂນໂລຊີ ແລະ ສາລະຄວາມຮູ້ຕ່າງໆ, ປະກອບສ່ວນຕ້ານປະກົດການຫຍໍ້ທໍ້ໃນສັງຄົມ, ໂຈມຕີຖ້ອຍທຳນອງທີ່ບິດເບືອນຄວາມເປັນຈິງຂອງພວກຄົນບໍ່ດີ, ພ້ອມທັງເປັນຂົວຕໍ່ລະຫວ່າງພັກ ກັບປະຊາຊົນ, ເປັນເວທີເສີມຂະຫຍາຍປະຊາທິປະໄຕ ປະຊາຊົນ ແລະ ສິດເປັນເຈົ້າຂອງປະຊາຊົນບັນດາເຜົ່າ.
ຕະຫຼອດໄລຍະ 74 ປີຜ່ານມາ ວຽກງານສື່ມວນຊົນ ແມ່ນມີການເຕີບໃຫຍ່ຂະຫຍາຍຕົວຢ່າງໜັກແໜ້ນ, ສາມາດນຳໃຊ້ເຕັກໂນໂຊຊີເຂົ້າໃນການເກັບກຳ ແລະ ບັນທຶກຂໍ້ມູນ ລວມເຖິງມີສື່ໃໝ່ໆເກີດຂຶ້ນ ເປັນຕົ້ນແມ່ນສື່ອອນລາຍ ທີ່ເປັນເງື່ອນໄຂເຮັດໃຫ້ການເຜີຍແຜ່ຂໍ້ມູນຂ່າວສານ ມີຄວາມສະດວກ, ກວ້າງຂວາງ ແລະ ມີຄວາມວ່ອງໄວ.
ໃນໂອກາດດຽວກັນນີ້ ທ່ານ ວັນໄຊ ພອງສະຫວັນ ໄດ້ກ່າວເນັ້ນໃຫ້ ສືບຕໍ່ເອົາໃຈໃສ່ໃນການປະຕິໜ້າທີ່ວຽກງານວິຊາສະເພາະ ໃຫ້ກ້າວເຂົ້າສູ່ອັນໃໝ່, ເປັນກະບອກສຽງອັນແຫຼມຄົມຂອງພັກ-ລັດ, ເປັນຕາໜ່າງກະຈາຍຂໍ້ມູນຂ່າວສານໃຫ້ທົ່ວເຖິງ ທ້ອງຖິ່ນຮາກຖານ ໃຫ້ປະຊາຊົນທີ່ຢູ່ຫ່າງໄກສອກຫຼີກໄດ້ຮັບຮູ້ ໂດຍຜ່ານສື່ຕ່າງໆ. ພ້ອມກັນນັ້ນ ກໍ່ສືບຕໍ່ເອົາໃຈໃສ່ ປັບປຸງເນື້ອໃນ ການໂຄສະນາໃຫ້ມີຄວາມຊັດເຈນ, ມີຄວາມຖືກຕ້ອງສອດຄ່ອງ, ມີຄວາມຫຼາກຫຼາຍ ແລະ ແຂງແຮງ, ເອົາໃຈໃສ່ໂຄສະນາ ຕ້ານ ແລະ ແກ້ໄຂບັນຫາຢາເສບຕິດ ເພື່ອຈຳກັດບັນຫາດັ່ງກ່າວໃຫ້ຫຼຸດລົງ, ຍົກລະດັບວຽກງານສື່ມວນຊົນໃຫ້ມີຄວາມວ່ອງ ໄວ, ຜັນຂະຫຍາຍເນື້ອໃນ ຂໍ້ມູນອອກທາງສື່ຕ່າງໆ ໃຫ້ມີຄວາມຮັດກຸມ. ສຳລັບຄະນະຊີ້ນຳ ຕ້ອງໄດ້ສືບຕໍ່ເອົາໃຈໃສ່ ປັບປຸງກົງຈັກການຈັດຕັ້ງ ຕິດພັນກັບການດຳເນີນກອງປະຊຸມໃຫຍ່ໃນຂັ້ນຕ່າງໆ ເພື່ອໃຫ້ທ່ວງທັນກັບສະພາບ ແລະ ເງື່ອນໄຂໃໝ່ ຂອງວຽກງານໂຄສະນາ, ມີການພົວພັນຮ່ວມມືກັບສາກົນ ໂດຍສະເພາະປະເທດໃກ້ຄຽງ ເພື່ອແລກປ່ຽນຖອດຖອນບົດຮຽນທາງດ້ານຂໍ້ມູນຂ່າວສານ, ພ້ອມກັນເອົາໃຈໃສ່ເພີ່ມທະວີໂຄສະນາປະຊາສຳພັນ ໂດຍສະເພາະ ແມ່ນຂອບເຂດທີ່ຕັ້ງຂອງປ່າສະຫງວນຫີນໜາມໜໍ່ ທີ່ໄດ້ກະກຽມສະເໜີເຂົ້າເປັນມໍລະດົກໂລກ ໃຫ້ປະຊາຊົນໄດ້ມີຄວາມຮູ້ເຂົ້າໃຈ ແລະ ປະກອບສ່ວນໃນການປົກປັກຮັກສາ ຟື້ນທີ່ດັ່ງກ່າວ ເປັນຕົ້ນແມ່ນຊັບພະຍາກອນທາງທຳມະຊາດ ໃຫ້ເປັນຟື້ນທີ່ຂີຂຽວ ເພື່ອດຶ່ງດູດເອົານັກທ່ອງທ່ຽວເຂົ້າມາທ່ຽວໃນແຂວງຄຳມ່ວນໃຫ້ຫຼາຍຂຶ້ນ.
ຂ່າວ-ພາບ: ກອງຄຳ
