ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ປັດຈຸບັນ, ກະສິກອນທົ່ວແຂວງຄຳມ່ວນ ສາມາດເກັບກູ້ຜົນຜະລິດລະດູແລ້ງ (ພືດລວມ) ໄດ້ 3.880 ເຮັກຕາ ເທົ່າກັບ 39% ຂອງເນື້ອທີ່ປູກຕົວຈິງ ໃນນີ້, ເນື້ອທີ່ປູກພືດເພື່ອເປັນສະບຽງອາຫານເກັບກູ້ໄດ້ 1.214 ເຮັກຕາ ເທົ່າກັບ 35% ຂອງເນື້ອທີ່ປູກຕົວຈິງ ແລະ ເນື້ອທີ່ປູກພືດເພື່ອເປັນສິນຄ້າເກັບກູ້ໄດ້ 1.960 ເຮັກຕາ ເທົ່າກັບ 31% ຂອງເນື້ອທີ່ປູກຕົວຈິງ. ຄາດວ່າການເກັບກູ້ພືດລະດູແລ້ງ ໃນທົ່ວແຂວງຈະໃຫ້ສໍາເລັດ ໃນຕົ້ນເດືອນມິຖຸນາ 2024 ນີ້.
ຂະແໜງປູກຝັງ, ພະແນກກະສິກໍາ ແລະ ປ່າໄມ້ ແຂວງຄໍາມ່ວນໃຫ້ຮູ້ເມື່ອບໍ່ດົນມານີ້ວ່າ: ໃນລະດູການຜະລິດພືດລະດູແລ້ງປະຈໍາສົກປີ 2023-2024 ທົ່ວແຂວງມີເນື້ອທີ່ແຜນການ ທໍາການຜະລິດທັງໝົດ 10.311 ເຮັກຕາ, ຄາດຄະເນຜົນຜະລິດໃຫ້ໄດ້ 54.380 ໂຕນ ໃນນີ້, ເນື້ອທີ່ປູກພືດເພື່ອເປັນສະບຽງອາຫານ 3.661 ເຮັກຕາ, ຄາດຄະເນຜົນຜະລິດ 18.909 ເຮັກຕາ ແລະ ເນື້ອທີ່ປູກພືດເພື່ອເປັນສິນຄ້າ 6.650 ເຮັກຕາ, ຄາດຄະເນຜົນຜະລິດ 35.921 ເຮັກຕາ. ຜ່ານການຈັດຕັ້ງປະຕິບັດຕົວຈິງເນື້ອທີ່ປູກພືດລວມໄດ້ໃນເນື້ອທີ່ 9.840 ເຮັກຕາ (ຫລຸດແຜນ) ໃນນີ້, ເນື້ອທີ່ປູກພືດເພື່ອເປັນສະບຽງອາຫານປະຕິບັດໄດ້ 3.449 ເຮັກຕາ ແລະ ເນື້ອທີ່ປູກພືດເພື່ອເປັນສິນຄ້າປະຕິບັດໄດ້ 6.286 ເຮັກຕາ.
ພືດທີ່ກະສິກອນປູກຫລາຍແມ່ນ ມັນຕົ້ນ, ກະຫລໍ່າປີ, ໝາກແຕງ, ສາລີ ແລະ ພືດອື່ນໆ, ເຊິ່ງເມືອງທີ່ປະຕິບັດເນື້ອທີ່ປູກພືດລະດູແລ້ງ ໄດ້ຫລາຍກວ່າໝູ່ແມ່ນເມືອງທ່າແຂກ, ເມືອງໜອງບົກ ແລະ ເມືອງຫີນບູນ.
ຂ່າວ-ພາບ: ແດງສະຫວັດ ແສນພານິດ, ຂປລ.
