ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໂດຍ: ວັນໄຊ ຕະວິນຍານ
ໂດຍເຫັນໄດ້ເຖິງຄຸນປະໂຫຍດຂອງສັດນໍ້າ ແລະ ສັດປ່າ ຕໍ່ການດໍາລົງຊີວິດຂອງທົ່ວສັງຄົມ. ພັກ ແລະ ລັດຖະບານລາວເຮົາໄດ້ວາງນະໂຍບາຍ, ອອກກົດໝາຍ ແລະ ນິຕິກໍາຕ່າງໆເພື່ອສົ່ງເສີມການລ້ຽງ,ການຂະຫຍາຍພັນ ແລະ ການຊົມໃຊ້ແບບຍືນຍົງ. ໄປພ້ອມກັບການອະນຸລັກສັດນໍ້າ-ສັດປ່າປະເພດຫວງຫ້າມ, ເກືອດຫ້າມການລ່າສັດແບບຊະຊາຍ ຫຼື ຫ້າມລ່າໃນລະດູສັດວາງໄຂ່ ຫຼື ເກີດລູກ.
ເມື່ອຮອດ ວັນທີ 13 ກໍລະກົດ ຂອງທຸກໆປີ ລັດຖະບານລາວເຮົາ ໄດ້ກໍານົດໃຫ້ເປັນວັນປ່ອຍປາ ແລະ ອະນຸລັກສັດນ້ໍາ-ສັດປ່າແຫ່ງຊາດ ຊຶ່ງປີນີ້ ໄດ້ໝູນວຽນມາຄົບຮອບ 27 ປີ (13/7/1997-13/7/2024)
ທັງນີ້ເພື່ອແນໃສ່ສ້າງສະຕິໃນການປົກປັກຮັກສາ,ພັດທະນາ ແລະ ຄືນຄວາມອຸດົມສົມບູນໃຫ້ກັບທໍາມະຊາດ ກໍຄືເປັນແຫຼ່ງອາຫານໃຫ້ປະຊາຊົນລາວບັນດາເຜົ່າ.
ເພື່ອຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ, ມະຕິກອງປະຊຸມໃຫຍ່ອົງຄະນະພັກກະຊວງກະສິກໍາ ແລະ ປ່າໄມ້ ຄັ້ງທີ VI ແລະ ແຜນພັດທະນາເສດ ຖະກິດ-ສັງຄົມ ຂອງລັດຖະບານ 5 ປີ ຄັ້ງທີ IX ແຕ່ປີ 2021-2025, ການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ເປັນຮູບປະທໍາ, ກະຊວງກະສິກໍາ ແລະ ປ່າໄມ້ ໄດ້ຜັນຂະຫຍາຍອອກ ເປັນຄໍາສັ່ງ, ແຈ້ງການ ໃຫ້ບັນດາກົມກ່ຽວຂ້ອງ ໃນຂັ້ນສູນກາງ, ອົງການປົກຄອງຂັ້ນທ້ອງຖິ່ນ ຕະຫຼອດຮອດຜູ້ປະກອບການ ແລະ ປະຊາຊົນລາວບັນດາເຜົ່າໃນຂອບເຂດທົ່ວປະເທດ ເພີ່ມຄວາມເອົາໃຈໃສ່ ຕໍ່ວຽກງານການພັດທະນາການອະນຸລັກ, ການຄຸ້ມຄອງ ແລະ ນໍາໃຊ້ ສັດ ນ້ໍາ-ສັດປ່າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຄ້ໍາປະກັນດ້ານສະບຽງອາຫານ ແລະ ໂພຊະນາການ ພ້ອມທັງສ້າງລາຍຮັບ ໃຫ້ປະຊາຊົນລາວໃຫ້ນັບມື້ຫຼາຍຂຶ້ນ.
ດ້ວຍຄວາມເອົາໃຈໃສ່ຂອງພັກ-ລັດຖະບານ, ມາຮອດປັດຈຸບັນ, ປະເທດລາວເຮົາມີສູນ, ສະຖານີທີ່ຜະລິດລູກປາຂອງລັດ ຈໍານວນ 53 ແຫ່ງ, ຟາມຜະລິດລູກປາ ຂອງເອກະຊົນ ຫຼາຍກວ່າ 130 ແຫ່ງ ແລະ ການຜະລິດລູກປາແບບຄອບຄົວມີ 352 ແຫ່ງ ສາມາດສະໜອງແນວພັນປາໃຫ້ສັງຄົມໄດ້ໂດຍພື້ນຖານ ຈໍານວນ 383 ລ້ານໂຕ (ສະໜອງໄດ້ 72%ຂອງແຜນການ)ມີຟາມລ້ຽງສັດປ່າ, ສູນຂະຫຍາຍພັນສັດປ່າ ຫຼາຍກວ່າ 10 ແຫ່ງ. ບັນດາສູນດັ່ງກ່າວໄດ້ຄົ້ນຄວ້າທົດລອງລ້ຽງ, ຂະຫຍາຍພັນສັດປ່າ ແລະ ປາພື້ນເມືອງໄດ້ຫຼາຍຊະນິດ, ຊຶ່ງໃນທົ່ວປະເທດ ມີວັງສະຫງວນປາ ຈໍານວນ 1.050 ກວ່າວັງ ໃນນັ້ນ ມີຄະນະຄຸ້ມຄອງວັງສະຫງວນແລ້ວ 819 ວັງ ແລະ ມີເຂດອະນຸລັກພັນສັດປ່າແຫ່ງຊາດ 1 ເຂດ.
ໃນປີ 2022 ຜ່ານມາ, ກະຊວງກະສິກໍາ ແລະ ປ່າໄມ້ ໄດ້ສົມທົບກັບບັນດາອົງການປົກຄອງທ້ອງຖິ່ນຂອງແຂວງໃນຂອບເຂດທົ່ວປະເທດໄດ້ຈັດກິດຈະກໍາ ໃນວັນປ່ອຍປາ ແລະ ອະນຸລັກສັດນ້ໍາ-ສັດປ່າ ແຫ່ງຊາດ ໂດຍມີ ປະຊາຊົນ, ພໍ່ຄ້າຊາວຂາຍ, ຜູ້ປະກອບການ ລວມທັງອົງການຈັດຕັ້ງສາກົນທີ່ກ່ຽວຂ້ອງ ເຂົ້າຮ່ວມ ແລະ ໃຫ້ການສະໜັບສະໜູນແນວພັນປາ, ແນວພັນສັດນໍ້າ ແລະ ສັດປ່າ ທີ່ໄດ້ປ່ອຍທັງໝົດແມ່ນ 61,3 ລ້ານໂຕ. ນອກນັ້ນ ຍັງໄດ້ປ່ອຍສັດປ່າ ປະເພດນົກ, ສັດເລືອຄານ ແລະ ສັດປະເພດອື່ນໆຄືນສູ່ທໍາມະຊາດຈໍານວນ 200 ກວ່າໂຕ.
ສະເພາະການປ່ອຍປາ, ສັດນໍ້າ ແລະ ສັດປ່າ ໃນປີ 2023 ຜ່ານມານີ້ ໃນທົ່ວປະເທດ ປ່ອຍປາ, ສັດນໍ້າ ແລະ ສັດປ່າ ເພື່ອຄືນຄວາມອຸດົມສົມບູນສູ່ທໍາມະຊາດ ແລະ ລົງສູ່ແຫຼ່ງນ້ໍາຕ່າງໆ ໄດ້ທັງໝົດ 62 ລ້ານໂຕ ແລະ ປ່ອຍສັດປ່າຄືນສູ່ທໍາມະຊາດຫຼາຍກວ່າ 300 ໂຕ. ສໍາລັບ ປີ 2024 ນີ້ ຄາດວ່າຈະປ່ອຍປາໃຫ້ໄດ້ 64 ລ້ານໂຕ.
ເຖິງແນວໃດກໍຕາມ, ເພື່ອປົກປັກຮັກສາສັດນໍ້າ-ສັດປ່າ ບໍ່ໃຫ້ມີການດັບສູນ, ໃຫ້ມີການຂະຫຍາຍພັນ,ສາມາດຕອບສະໜອງຄວາມຕ້ອງການດ້ານອາຫານຂອງປະຊາຊົນບັນດາເຜົ່າໃຫ້ມີຄວາມໝັ້ນຄົງຢ່າງຕໍ່ເນື່ອງ ແລະ ມີຄວາມສົມດູນກັບລະບົບນິເວດທາງທໍາມະຊາດ. ພວກເຮົາທຸກຄົນຈົ່ງສ້າງສະຕິເຄົາລົບກົດ ໝາຍ, ຄໍາສັ່ງ, ລະບຽບການ ກ່ຽວກັບການຊົມໃຊ້, ຮູ້ຫວງແຫນ, ອະນຸລັກ, ປົກປັກຮັກສາແບບຍືນຍົງ.ຄືນສັດນໍ້າ-ສັດປ່າສູ່ທໍາມະຊາດໃຫ້ຫຼາຍຂຶ້ນ ເຮັດໃຫ້ສັດນໍ້າ-ສັດປ່າມີຄວາມອຸດົມສົມບູນ ສ້າງໃຫ້ເປັນທ່າແຮງທາງດ້ານເສດຖະກິດ-ສັງຄົມຂອງປະເທດຊາດ.