ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 4 ມັງກອນ 2024, ທີ່ຫ້ອງວ່າການປົກຄອງແຂວງວຽງຈັນ ທ່ານ ພູວົງ ບຸນຊູ, ຮອງເຈົ້າແຂວງ, ຜູ້ຊີ້ນໍາວຽກງານວັດທະນະທໍາ-ສັງຄົມຂອງແຂວງວຽງຈັນ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ກ່ຽວກັບການກະກຽມປີທ່ອງທ່ຽວລາວ 2024, ໃນໂອກາດນີ້ ທ່ານໄດ້ໃຫ້ຮູ້ກ່ຽວກັບຄວາມຄືບໜ້າການປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວເຂດອ່າງນໍ້າງື່ມ 1, ເມືອງແກ້ວອຸດົມ, ຊຶ່ງມາຮອດປັດຈຸບັນ ສໍາເລັດແລ້ວຫລາຍກວ່າ 60%, ພາຍຫລັງເລີ່ມລົງມືປັບປຸງນັບແຕ່ເດືອນກໍລະກົດ ປີ 2021 ໂດຍໄດ້ຮັບທຶນຊ່ວຍເຫຼືອລ້າຈາກທະນາຄານພັດທະນາອາຊີ (ADB).
ທ່ານ ພູວົງ ບຸນຊູ, ຮອງເຈົ້າແຂວງ, ຜູ້ຊີ້ນໍາວຽກງານວັດທະ ນະທໍາ-ສັງຄົມຂອງແຂວງວຽງຈັນ ໃຫ້ສໍາພາດຕໍ່ສື່ມວນຊົນເມືອບໍ່ດົນມານີ້ວ່າ: ໜ້າວຽກທີ່ໄດ້ສຸມໃສ່ຈັດຕັ້ງປະຕິບັດ ລວມມີ: ການປັບປຸງເສັ້ນທາງເຂົ້າ-ອອກສະຖານທີ່ເຂດອ່າງນໍ້າງື່ມ 1 ເປັນເສັ້ນທາງເບຕົ່ງ ຊຶ່ງສໍາເລັດແລ້ວ, ປັບປຸງບັນດາຫ້າງຮ້ານເພື່ອຈັດເປັນບ່ອນຂາຍທີ່ລະນຶກສໍາລັບການທ່ອງທ່ຽວ, ລວມເຖີງຂອງ ຕ້ອນຂອງຝາກຕ່າງໆ, ລວມເຖີງຮ້ານອາຫານ-ຮ້ານກິນດື່ມ ແລະ ສູນບໍລິການຂໍ້ມູນຂ່າວ ສານສໍາລັບການທ່ອງທ່ຽວເຂດໜ້າເຂື່ອນ. ນອກຈາກນີ້ ແມ່ນການປັບປຸງບັນດາໂຮງແຮມ ແລະ ເຮືອນພັກເພື່ອຮອງຮັບການທ່ອງທ່ຽວ ແລະ ສິ່ງອໍານວຍຄວາມສະດວກອື່ນໆ ເຊັ່ນ: ລະບົບການຂົນສົ່ງແຕ່ລຸ່ມເຂື່ອນຂຶ້ນໄປຫາໜ້າເຂື່ອນ ແລະ ບໍລິການເຊື່ອຕໍ່ເຂດທ່ອງທ່ຽວຢູ່ສວນວິທະຍາ ສາດເຕັກໂນໂລຊີ ຊຶ່ງກໍ່ສ້າງສໍາເລັດແລ້ວ.
ທ່ານ ພູວົງ ບຸນຊູ ໃຫ້ຮູ້ຕື່ມວ່າ: ການປັບປຸງໂຄງລ່າງພື້ນຖານ ແລະ ສິ່ງອຳນວຍຄວາມສະດວກພາຍໃນສະຖານ ທີ່ທ່ອງທ່ຽວເຂດອ່າງນໍ້າງື່ມ 1 ຄາດວ່າຈະໃຫ້ສໍາເລັດ ແລະ ເປີດນໍາໃຊ້ບໍລິການຄືນໃໝ່ໃນ ເດືອນມິຖຸນາ ປີ 2024 ນີ້. ຊຶ່ງການເປີດການທ່ອງ ທ່ຽວໜ້າເຂື່ອນໍ້າງື່ມ 1 ເມືອງແກ້ວອຸດົມ ແມ່ນ 1 ໃນຈໍານວນ 7 ກິດຈະກໍາທ່ອງທ່ຽວລະດັບແຂວງ ແລະ ແມ່ນ 1 ໃນ 20 ກິດຈະກໍາທ່ອງທ່ຽວຂອງແຂວງວຽງຈັນ ໃນໂອກາດປີທ່ອງທ່ຽວລາວ 2024.
ຂ່າວວິທະຍຸກະຈາຍສຽງແຫ່ງຊາດລາວ (ວສລ)