ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ນັບແຕ່ປີ 2023 ເປັນຕົ້ນມາ, ຈີນໄດ້ຍົກເວັ້ນວີຊາຕໍ່ຫລາຍປະເທດ, ນັບມາຮອດປັດຈຸບັນ, ຝຣັ່ງ, ເຢຍລະມັນ, ອີຕາລີ, ອົດສະຕຣາລີ, ໂຮນລັງ, ແອັດສະປາຍ ແລະ ສະວິດ ທີ່ຈີນຍົກເວັ້ນແຕ່ຝ່າຍດຽວ; ນອກນີ້ ຈີນຍັງໄດ້ຍົກເວັ້ນວີຊາເຊິ່ງກັນແລະກັນກັບໄທ, ສິງກະໂປ, ມະເລເຊຍ ແລະ ຊອກຊີ.
ຄຽງຄູ່ກັບຈີນເປີດກວ້າງຂອບເຂດຂອງນະໂຍບາຍຍົກເວັ້ນວີຊາ, ເພື່ອນມິດຕ່າງປະເທດທີ່ມາທ່ອງທ່ຽວຢູ່ຈີນ ກໍນັບມື້ນັບຫລາຍຂຶ້ນ ຕາມຂ່າວແຈ້ງວ່າ ໃນໄຕມາດທີ 1 ປີ 2024 ນີ້, ຄົນຕ່າງປະເທດທີ່ມາທ່ຽວຈີນ ໄດ້ເພີ່ມຂຶ້ນຫລາຍກວ່າ 3 ເທົ່າເມື່ອທຽບໃສ່ໄລຍະດຽວກັນຂອງປີ 2023, ຈີນໄດ້ອອກວີຊາໃຫ້ຄົນຕ່າງປະເທດ 466,000 ເທື່ອຄົນ, ເພີ່ມຂຶ້ນ 118.8%, ຄົນຕ່າງປະເທດທີ່ເຂົ້າເມືອງຈີນ ໂດຍຍົກເວັ້ນວີຊາເຖິງ 1,988,000 ເທື່ອຄົນ, ເພີ່ມຂຶ້ນ 266.1%. ຈາກຕົວເລກຂ້າງເທິງນັ້ນກໍເປັນພຽງນາມມະທຳ, ຜູ້ໃຊ້ອິນເຕີເນັດຊາວຈີນ ອາດຈະມີຄວາມຮູ້ສຶກຕໍ່ເລື່ອງນີ້ຫລາຍກວ່າ. ຫວ່າງບໍ່ດົນມາ, ຜູ້ໃຊ້ອິນເຕີເນັດຊາວຈີນຈຳນວນຫລາຍພົບວ່າ ຕົວເມືອງທີ່ຕົນດຳລົງຊີວິດຢູ່ນັ້ນມີຄົນຕ່າງປະເທດເປັນຈຳນວນຫລາຍ, ຢູ່ສູນການຄ້າຫວາງຟູຈິງ ນະຄອນຫລວງປັກກິ່ງ, ມີຄົນຝຣັ່ງ 2 ຄົນກຳລັງຟ້ອນຢູ່ ແລະອ້ອມຮອບໄປດ້ວຍຄົນຝຣັ່ງກຸ່ມໜຶ່ງ; ຜູ້ແລ່ນໄປຊື້ເຂົ້າໜົມແມງກະເບື້ອງ ຢູ່ຮ້ານຄ້າຂອງນະຄອນຊຽງໄຮ້ ກໍແມ່ນເພື່ອນມິດຕ່າງປະເທດ, ຢູ່ໃນໂຮງມະໂຫລະສົບລາຊະວົງຖາງ ທີ່ນະຄອນຊີ່ອ່ານ ກໍເຕັມໄປດ້ວຍຄົນຕ່າງປະເທດທີ່ນັ່ງຊົມການສະແດງ. ຄົນຕ່າງປະເທດເຫລົ່ານີ້ຄືຈະໄດ້ຮັບຮູ້ວິຖີຊີວິດຂອງປະຊາຊົນຈີນ ຄືໄປດື່ມຊາຢູ່ສວນສາທາລະນະ, ໄປຊອກກິນອາຫານແຊບຊ້ອຍຢູ່ຕະຫລາດກາງຄືນ, ໄປຟ້ອນລຳທຳເພງຢູ່ສະໜາມຫລວງ ແລະຍັງໄດ້ຮຽນຮູ້ທ່າຖ່າຍຮູບທີ່ຊາວຈີນນິຍົມ.
ສິ່ງທີ່ບໍ່ໄດ້ຄາດຄື ເພື່ອນມິດຕ່າງປະເທດທີ່ມາທ່ຽວຈີນ ໄດ້ເປັນກະບອກສຽງໃຫ້ແກ່ປະເທດຈີນ. ເຈົ້າຂອງບລອກການທ່ອງທ່ຽວເຫລົ່ານີ້ໄດ້ໃຊ້ຮູບການ “vlog” ແລະ ໄລສົດ ເພື່ອບັນທຶກປະສົບການຢູ່ຈີນ ເພື່ອແນະນຳຮີດຄອງປະເພນີ ແລະ ເອກະລັກວັດທະນະທຳຢູ່ທ້ອງຖິ່ນຕ່າງໆຂອງຈີນ ໄປສູ່ທຸກມູມທຸກແຈຂອງໂລກໂດຍຜ່ານເວັບໄຊວີດີໂອສັ້ນ. ປັດຈຸບັນນີ້, ເຄັດລັບໃໝ່ທີ່ດຶງດູດຜູ້ຊົມໃນສື່ສັງຄົມອອນລາຍຕ່າງປະເທດກໍຄື ທ່ຽວປະເທດຈີນ, ວີດີໂອການທ່ອງທ່ຽວຢູ່ຈີນຂອງເຈົ້າຂອງບລອກຕ່າງປະເທດ, ໄດ້ຮັບຄວາມນິຍົມຫລາຍ.
ເຈົ້າຂອງບລອກຂອງຄູ່ຜົວເມຍອາເມຣິກາ ທີ່ມີຊື່ວ່າ “gone with the Wynns” ໄດ້ເຜີຍແຜ່ວີດີໂອທ່ອງທ່ຽວແຂວງຢຸນນານຈີນ ໃນເດືອນມັງກອນ ປີ 2024 ນີ້, ເຊິ່ງໄດ້ຖ່າຍທຳຢ່າງງາມປານີດ, ໂດຍໄດ້ນຳສະເໜີມົນສະເໜ່ແບບດັ້ງເດີມທີ່ມີເອກະລັກພິເສດຕໍ່ຜູ້ໃຊ້ອິນເຕີເນັດຢູ່ຕ່າງປະເທດ, ຈຳນວນຜູ້ເຂົ້າຊົມວີດີໂອມີເຖິງໜຶ່ງລ້ານເທື່ອ, ເຊິ່ງເປັນສະຖິຕິສູງສຸດຂອງຈຳນວນຜູ້ເຂົ້າຊົມຜົນງານວີດີໂອຂອງເຂົາເຈົ້າ, ເຊິ່ງໄດ້ພິສູດໃຫ້ເຫັນເຖິງ ເຄັດລັບແຫ່ງການທ່ອງທ່ຽວຈີນ.
ເຈົ້າຂອງບລອກຄົນອັງກິດຜູ້ໜຶ່ງໃນເວັບໄຊ ແລະ ຢູທູບ ໄດ້ເດີນທາງໄປຕົວເມືອງໃຫຍ່ຂອງຈີນ ກໍໄດ້ໄປເຂດຊິ່ນຈ່ຽງ ອີກ, ລາວປະຫລາດໃຈທີ່ໄດ້ເຫັນວ່າເຂດຊິ່ນຈ່ຽງ ທີ່ສື່ມວນຊົນປະເທດຕາເວັນຕົກໂຄສະນາວ່າເປັນນາຮົກໃນໂລກມະນຸດນັ້ນ ແມ່ນມີຄວາມສະຫງົບສຸກ, ຊີວິດການເປັນຢູ່ມີຄວາມເປັນລະບຽບ, ຄຳເຫັນທີ່ປະກອບຢູ່ລຸ່ມວີດີໂອກໍໄດ້ເປີດເຜີຍຄຳຂີ້ຕົວະຂອງສື່ປະເທດຕາເວັນຕົກ.
່ ຫລາຍຄົນທີ່ດຳລົງຊີວິດຢູ່ພາຍໃຕ້ໃນຂໍ້ມູນທີ່ສື່ປະເທດຕາເວັນຕົກເຈຕະນາປັ້ນແຕ່ງຂຶ້ນຢ່າງລະອຽດ, ດົນໄປກໍເກີດມີຈິນຕະນາການແບບຜິດພາດຕາຍຕົວຕໍ່ປະເທດຈີນ. ຖ້າຢາກແກ້ໄຂຄວາມອະຄະຕິຈາກປະເທດຕາເວັນຕົກຢ່າງສິ້ນເຊີງ, ອາດຈະບໍ່ແມ່ນບັນຫາທີ່ສາມາດແກ້ໄຂໄດ້ໃນມື້ໜຶ່ງຄືນດຽວ.
ຄວາມຈິງໃຈຈະເປັນພະລັງທີ່ເຂັ້ມແຂງທີ່ສຸດເພື່ອສະທ້ອນອາລົມຈິດຂອງຄົນ. ເຈົ້າຂອງບລອກຕ່າງປະເທດເຫລົ່ານີ້ໄດ້ມາຮັບຮູ້ຈີນ ໂດຍຜ່ານການທ່ອງທ່ຽວທີ່ເປັນຮູບປະຈຳທີ່ສຸດ, ໃຊ້ປະສົບການຕົວຈິງເພື່ອກຳຈັດອຸປະສັກດ້ານຫາງສຽງຂອງສື່ປະເທດຕາເວັນຕົກ, ໄດ້ນຳເອົາຄວາມຮູ້ສຶກທີ່ແທ້ຈິງ ແລະສົດຊື່ນທີ່ສຸດໄປໃຫ້ແກ່ຜູ້ໃຊ້ອິນເຕີເນັດຕ່າງປະເທດ. ຫວັງວ່າເພື່ອນມິດຕ່າງປະເທດມາຢາມຈີນຕື່ມອີກ, ບໍ່ຕ້ອງສ້າງຈິນຕະນາການແບບຄັບແຄບ, ຫລືຫລົງເຊື່ອຄວາມເວົ້າຂອງຜູ້ອື່ນ. ສິບປາກເວົ້າບໍ່ທໍ່ຕາເຫັນ, ຕ້ອງໄປສຳຜັດຕົວຈິງແລ້ວຈຶ່ງຈະຮັບຮູ້ຄວາມຈິງໄດ້.
