ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄົນເຈັບທີ່ຕິດເຊື້ອພະຍາດໂຄວິດ19 ກໍລະນີທີ 21 ໄດ້ຮັບອະນຸຍາດໃຫ້ອອກໂຮງໝໍແລ້ວ

ຄະນະສະເພາະກິດປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ສືບຕໍ່ເຝົ້າລະວັງຕິດຕາມຜູ້ທີ່ເດີນທາງ ເຂົ້າມາລາວ ຕາມຈຸດຜ່ານແດນຕ່າງໆໃນຂອບເຂດທົ່ວປະເທດ ມື້ຜ່ານມາມີທັງໝົດ 1.869 ຄົນ, ໃນນີ້ ຈຸດຜ່ານດ່ານລາວ-ໄທ 881 ຄົນ, ຈຸດຜ່ານແດນລາວ-ຈີນ 13 ຄົນ,ຈຸດຜ່ານດ່ານລາວ – ຫວຽດນາມ 650 ຄົນ, ເດີນທາງຜ່ານສະໜາມບິນສາກົນວັດໄຕ 325 ຄົນ; ທຸກຄົນແມ່ນໄດ້ແທກອຸນຫະພູມຮ່າງກາຍ, ພ້ອມທັງໄດ້ເກັບຕົວຢ່າງມາກວດ ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ໂອກາດຖະແຫລງຂ່າວກ່ຽວກັບສະພາບການລະບາດຂອງພະຍາດໂຄວິດ-19 ຕອນເຊົ້າວັນທີ 25 ສິງຫານີ້ ທີ່ກະຊວງສາທາລະນະສຸກ ດຣ ສີສະຫວາດ ສູດທານີລະໄຊ ຮອງຫົວໜ້າກົມຄວບຄຸມ ພະຍາດຕິດຕໍ່ ກະຊວງສາທາລະນະສຸກໃຫ້ຮູ້ວ່າ: ປັດຈຸບັນ ທົ່ວປະເທດສູນຈໍາກັດບໍລິເວນທັງໝົດ 54 ສູນ, ມີຜູ້ຖືກຈໍາກັດບໍລິເວນຢູ່ສູນ 3.274 ຄົນ, ໄດ້ເກັບຕົວຢ່າງມາກວດວິເຄາະທັງໝົດ 513 ຄົນ, ໃນນີ້ ແຮງງານລາວມາແຕ່ໄທ 72 ຄົນ, ແຮງງານຈີນ 396 ຄົນ, ແຮງງານລາວມາແຕ່ຈີນ 3 ຄົນ. ບຸກຄົນທົ່ວໄປທີ່ມີອາການ 3 ຄົນ, ບຸກຄົນທົ່ວໄປທີ່ບໍ່ມີອາການ 38 ຄົນ ພ້ອມທັງໄດ້ເກັບຕົວຢ່າງຜູ້ຕິດເຊື້ອ ກໍລະນີູ້ທີ 21 ມາກວດຄືນ ເຊຶ່ງຜົນກວດວິເຄາະທັງໝົດບໍ່ພົບຜູ້ຕິດເຊື້ອໃໝ່ ແລະ ຜົນກວດຂອງຜູ້ຕິດເຊື້ອກໍລະນີ້ທີ 21 ແມ່ນບໍ່ພົບເຊື້ອ 2 ຄັ້ງຕິດຕໍ່ກັນ.
ດຣ ສີສະຫວາດ ສູດທານີລະໄຊ ຮອງຫົວໜ້າກົມຄວບຄຸມ ພະຍາດຕິດຕໍ່ ກະຊວງສາທາລະນະສຸກໃຫ້ຮູ້ຕື່ມວ່າ: ມາຮອດປັດຈຸບັນ ອາການຜູ້ຕິດເຊື້ອພະຍາດໂຄວິດ 19 ທີ່ກໍາລັງປິ່ນປົວຢູ່ໂຮງໝໍມິດຕະພາບ 150 ຕຽງ ຍັງເຫລືອພຽງຄົນດຽວແມ່ນມີອາການດີຂຶ້ນຕາມລໍາດັບ ໂດຍສະເພາະຜູ້ຕິດເຊື້ອກໍລະນີທີ 21 ທາງຄະນະສະເພາະກິດໄດ້ເກັບຕົວຢ່າງໄປກວດຫາເຊື້ອເປັນເທື່ອທີ 2 ເຫັນວ່າຜົນກວດອອກມາເປັນລົບອີກເທື່ອທີ 2 ແລະ ໄດ້ອະນຸຍາດໃຫ້ອອກໂຮງໝໍເປັນທີ່ຮຽບຮ້ອຍແລ້ວແລະໃຫ້ໄປຈໍາກັດບໍລິເວນຢູ່ໂຮງແຮມທີ່ໄດ້ຖືກກໍານົດໄວ້ຈົນຄົບ 14 ວັນ, ສ່ວນຜູ້ຕິດເຊື້ອກໍລະນີທີ 22 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ 150 ຕຽງ ເພື່ອຕິດຕາມອາການຕໍ່ໄປ.