ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄົນເຈັບທີ່ຕິດເຊື້ອ ຢູ່ ສປປ ລາວ19ຄົນ ປົວດີແລ້ວ 13 ຄົນ , ໄລຍະ 27 ມື້ຕິດຕໍ່ກັນ ບໍ່ມີລາຍງານຜູ້ຕິດເຊື້ອພະຍາດໂຄວິດ19ເພີ່ມ

ສຈ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ 19 ຖະແຫລງຕໍ່ສື່ມວນຊົນ ໃນຕອນບ່າຍວັນທີ 9 ພຶດສະພານີ້ ວ່າ: ມື້ວານນີ້ ໄດ້ເກັບຕົວຢ່າງມາກວດທັງໝົດ 175 ຄົນ, ໃນນັ້ນ ມີກໍລະນີສົງໄສ 14 ຄົນ, ຜູ້ຕິດເຊື້ອທີ່ອອກໂຮງໝໍ ມິດຕະພາບ 3 ຄົນ ແລ້ວກັບມາກວດຄືນ, ຜູ້ທີ່ນອນປິ່ນປົວຕິດຕາມອາການຢູ່ໂຮງໝໍມິດຕະພາບ 6 ຄົນ ແລະ ແຮງງານລາວທີ່ກັບມາຈາກປະເທດໄທ 152 ຄົນ.

ຜູ້ທີ່ນອນປິ່ນປົວຕິດຕາມອາການຢູ່ໂຮງໝໍມິດຕະພາບ 6 ຄົນ ທີ່ມີຜົນກວດເປັນລົບ ຄັ້ງທຳອິດ ແລ້ວເກັບຕົວຢ່າງມາກວດຄືນຄັ້ງທີ2.

ນອກຈາກນັ້ນຍັງມີແຮງງານລາວທີ່ກັບມາຈາກປະເທດໄທ 152 ຄົນ, ຜົນກວດຂອງແຮງງານທີ່ເຂົ້າມາ ແລະ ກໍລະນີສົງໄສໃໝ່ຂອງມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 8 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ທ່ານພູທອນ ເມືອງປາກ ໃຫ້ຮູ້ເຖິງການຕິດຕາມປີ່ນປົວຄົນເຈັບຢູ່ໂຮງໝໍວ່າ : ຜູ້ນອນຕິດຕາມຢູ່ໂຮງໝໍມິດຕະພາບ 10 ຄົນ ລວມທັງອັນດັບ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ, ໄດ້ເກັບຕົວຢ່າງມາກວດຄືນ 2ຄັ້ງຕິດຕໍ່ກັນ ພົບວ່າມີຜົນລົບ 4 ຄົນ (ອັນດັບ 3, 6, 9 ແລະ 19) ເຊິ່ງໄດ້ອອກໂຮງໝໍໄປຈໍາກັດບໍລິເວນຢູ່ເຮືອນອີກ 14 ວັນ ໝາຍວ່າຍັງມີຜູ້ທີ່ຈະສືບຕໍ່ຕິດຕາມຢູ່ໂຮງໝໍ 6 ຄົນ.

ສຳລັບຜູ້ຕິດເຊື້ອທີ່ອອກໂຮງໝໍ ພາຍຫຼັງຕິດຕາມຄົບກຳນົດ 14 ວັນ ແລ້ວກັບມາກວດຄືນ 3 ຄົນ ເຊິ່ງແມ່ນອັນດັບ 1 (ພະນັກງານຄຣາວພລາຊ່າ, ບ້ານຈັນສະຫວ່າງ, ເມືອງສີໂຄດຕະບອງ),ອັນດັບ 11 (ພະນັກງານພູເບ້ຍມາຍນິ້ງ, ສັນຊາດ ປາປົວນິວກີເນຍ) ແລະ ອັນດັບ15 (ບ້ານຈອມມະນີ, ເມືອງໄຊເສດຖາ). ຜົນກວດວິເຄາະທັງໝົດແມ່ນລົບ ສະນັ້ນ, ຂະເຈົ້າຈະໄດ້ກັບຄືນໄປປະຕິບັດໜ້າທີ່ວຽກງານຕາມເດີມ ແຕ່ກໍ່ຈະຕ້ອງໄດ້ປະຕິບັດມາດຕະການປ້ອງກັນການຕິດເຊື້ອຄືກັນກັບຄົນທົ່ວໄປ.

ສ່ວນປະເທດສາມະຊິກອາຊຽນມີຜູ້ຕິດເຊື້ອຄື: ສິງກະໂປ 20.939 ຄົນ, ອິນໂດເນເຊຍ 12.776ຄົນ, ຟິລິປິນ 10.343 ຄົນ, ມາເລເຊຍ 6.467 ຄົນ, ໄທ 2.992ຄົນ, ຫວຽດນາມ 288 ຄົນ, ມຽນມາ 176 ຄົນ, ບຣູໄນ 141 ຄົນ, ກຳປູເຈຍ 122 ຄົນ,  ສປປ ລາວ ມີຜູ້ຕິດເຊື້ອຕໍ່າກວ່າໝູ່ໃນອາຊຽນ ຄື 19ຄົນ ແລະບໍ່ມີຜູ້ເສຍຊີວິດ.