ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄົນເຈັບທີ່ປົວຫາຍດີແລ້ວ ກວດພົບເຊື້ອໂຄວິດ19 ເປັນບວກ ແມ່ນບໍ່ສາມາດແຜ່ເຊື້ອຫາຄົນອື່ນໄດ້

ຄະນະສະເພາະກິດ ໃຫ້ຄວາມກະຈ່າງແຈ້ງກ່ຽວກັບສະພາບຂອງຜູ້ຕິດເຊື້ອພະຍາດໂຄວິດ-19 ກໍລະນີໜຶ່ງ ທີ່ໄດ້ປິ່ນປົວຫາຍດີ ແລະ ອອກໂຮງໝໍແລ້ວ ແຕ່ຜັດຕ້ອງໄດ້ກັບເຂົ້າມາກັກກັນຕົນເອງຢູ່ໂຮງໝໍອີກໃໝ່ ຍ້ອນຜົນກວດອອກມາເປັນບວກ

ທ່ານ ສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດເພື່ອຄວບຄຸມພະຍາດ ໂຄວິດ-19 ແຈ້ງໃຫ້ຮູ້ກ່ຽວກັບສະພາບຂອງຄົນເຈັບລາຍເກົ່າທີ່ໄດ້ຮັບອະນຸຍາດໃຫ້ອອກໂຮງໝໍ ໄປຕິດຕາມອາການຢູ່ເຮືອນຄົບ 14 ມື້ແລ້ວ ກັບມາກວດຄືນຢູ່ໂຮງໝໍ ແຕ່ພົບຜົນກວດອອກມາເປັນບວກນັ້ນ, ຕໍ່ກໍລະນີດັ່ງກ່າວແມ່ນບໍ່ເປັນອັນຕະລາຍ ແລະ ມີຫຼາຍປະເທດກໍ່ພົບກໍລະນີເຊັ່ນນີ້ຄືກັນ ບໍ່ວ່າຢູ່ ສປ ຈີນ, ສ.ເກົາຫຼີ, ຍີ່ປຸ່ນ, ຫວຽດນາມ ແລະ ບຣູໄນ ດາຣຸດຊາລຳ. ນັກວິຊາການໄດ້ນຳເອົາກໍລະນີນີ້ມາປູກເຊື້ອຄືນເພື່ອຊອກຫາເຊື້ອ ແຕ່ວ່າບໍ່ພົບເຊື້ອເກີດໃໝ່ ຍ້ອນວ່າມັນເປັນເຊື້ອທີ່ໄດ້ຕາຍແລ້ວ ແລະ ສິ່ງທີ່ພົບເຫັນຢູ່ນຳຄົນເຈັບນັ້ນ ແມ່ນເປັນພຽງເສດຊາກຂອງເຊື້ອພະຍາດ ຈຶ່ງເຮັດໃຫ້ຜົນກວດອອກມາບວກ.

ສຳລັບ ສປປ ລາວ ນີ້ ຖືວ່າ ເປັນກໍລະນີທຳອິດທີ່ກວດພົບ ແຕ່ຄະນະສະເພາະກິດ ກໍ່ໄດ້ມີມາດຕະການທີ່ເດັດຂາດ, ໂດຍໄດ້ນໍາເອົາຄົນເຈັບລາຍນີ້ ກັບມານອນໂຮງໝໍຄືນເພື່ອສືບຕໍ່ຕິດຕາມອາການຢ່າງໃກ້ຊິດ, ແລະ ຜ່ານການຕິດຕາມ, ຜູ້ກ່ຽວກໍ່ບໍ່ມີອາການຫຍັງ ບໍ່ມີໄຂ້, ບໍ່ມີໄອ, ບໍ່ເປັນຫວັດ, ບໍ່ເຈັບຄໍ, ບໍ່ມີອາການອື່ນໆແຕ່ຢ່າງໃດ. ພ້ອມດຽວກັນນັ້ນ, ກໍ່ຍັງໄດ້ນຳເອົາຜູ້ທີ່ສໍາຜັດໃກ້ຊິດກັບຄົນເຈັບລາຍນີ້ ເປັນຕົ້ນແມ່ນຄົນພາຍໃນຄອບຄົວດຽວກັນ ມາກວດສຸຂະພາບ ແຕ່ກໍ່ບໍ່ພົບເຊື້ອ ຈຶ່ງສະແດງວ່າເຊື້ອທີ່ບວກນີ້ ແມ່ນບໍ່ສາມາດສົ່ງຕໍ່ໃຫ້ຜູ້ອື່ນໄດ້.

ທ່ານ ສຈ ປອ ພູທອນ ເມືອງປາກ, ໃຫ້ຮູ້ອີກວ່າ: ເຖິງຢ່າງໃດກໍ່ຕາມ, ທາງທິມງານແພດໝໍພວກເຮົາກໍ່ໄດ້ສືບຕໍ່ຕິດຕາມເຝົ້າລະວັງ ເພື່ອບໍ່ໃຫ້ມີການແຜ່ເຊື້ອໄປຫາຄົນອື່ນ ແລະ ເພື່ອໃຫ້ແນ່ໃຈວ່າ ບໍ່ແມ່ນກໍລະນີທີ່ເກີດຂຶ້ນໃໝ່ແຕ່ຢ່າງໃດ.  ເຖິງວ່າການລະບາດຂອງເຊື້ອພະຍາດນີ້ຢູ່ ສປປ ລາວ ບໍ່ໄດ້ເກີດຂຶ້ນມາໄລຍະໜື່ງ ດົນນານສົມຄວນແລ້ວກໍ່ຕາມ ແຕ່ທາງຄະນະພວກເຮົາກໍ່ບໍ່ໄດ້ລົດລະ ບໍ່ໄດ້ປະໝາດໃນການປະຕິບັດມາດຕະການ ແລະ ວິທີເຝົ້າລະວັງຕ່າງໆ ຊຶ່ງກໍ່ຍັງສືບຕໍ່ປະຕິບັດຄືເກົ່າ ເພື່ອປ້ອງກັນການແຜ່ລະບາດບໍ່ໃຫ້ກັບມາເປັນຮອບທີສອງ, ໂດຍສະເພາະ ກໍ່ແມ່ນການປ້ອງກັນຕົນເອງ ແລະ ຄອບຄົວ ບໍ່ໃຫ້ຕິດເຊື້ອ ດ້ວຍການໝັ່ນລ້າງມືດ້ວຍນ້ຳສະອາດ ແລະ ສະບູຢູ່ເລື້ອຍໆ; ໃນເວລາອອກໄປທາງນອກຕ້ອງໃຊ້ຜ້າປິດປາກ-ປິດດັງ ແລະ ໃຊ້ເຈວລ້າງມື, ທັງນີ້ ເພື່ອສ້າງເປັນມາດຕະການທີ່ສ້າງໃຫ້ເປັນຄວາມຊິນເຄີຍຂອງພວກເຮົາໃນຂັ້ນຕໍ່ໄປ; ສະນັ້ນ ຈຶ່ງຂໍຮຽກຮ້ອງມາຍັງທຸກຄົນ-ທຸກພາກສ່ວນໃນສັງຄົມຈົ່ງສຶກສາ ແລະ ໃສ່ໃຈໃນການປະຕິບັດແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເຊິ່ງເປັນມາດຕະການຜ່ອນຜັນທີ່ເລີ່ມປະຕິບັດເລີ່ມມື້ນີ້ວັນທີ 4 ພຶດສະພາ 2020 ນີ້ເປັນຕົ້ນໄປ ເພື່ອໃຫ້ຖືກຕ້ອງ ແລະ ມີຄວາມເຂັ້ມງວດ.

ໂດຍ: ເຂີຍຫລ້າ