ຕອນເຊົ້າວັນທີ 27 ມິຖຸນາ 2024 ທີ່ຫ້ອງປະຊຸມຂອງກະຊວງຍຸຕິທໍາ, ກົມໂຄສະນາເຜີຍແຜ່ກົດໝາຍ ໄດ້ຈັດກອງປະຊຸມປະກອບຄໍາເຫັນໃສ່ “ຮ່າງ” ຂໍ້ຕົກລົງ ວ່າດ້ວຍການຄຸ້ມຄອງວຽກຈົດໝາຍເຫດທາງລັດຖະການ; ໂດຍການເປັນປະທານຂອງ ທ່ານ ໄພວີ ສີບົວລິພາ, ລັດຖະມົນຕີ ກະຊວງຍຸຕິທໍາ.
ໃນກອງປະຊຸມ ທ່ານ ສຸວັດ ດວງຕາ, ຕາງໜ້າກອງເລຂາ ໄດ້ນໍາສະເໜີຮ່າງຂໍ້ຕົກລົງ ວ່າດ້ວຍການຄຸ້ມຄອງວຽກຈົດໝາຍເຫດທາງລັດຖະການ ເຊິ່ງຂໍ້ຕົກລົງດັ່ງກ່າວ ມີຢູ່ 9 ໝວດ 36 ມາດຕາ ພາຍຫຼັງໄດ້ຮັບຟັງການສະເໜີແລ້ວ, ຜູ້ທີ່ເຂົ້າຮ່ວມກໍໄດ້ຄົ້ນຄວ້າພັດປ່ຽນກັນ ປະກອບຄໍາຄິດເຫັນໃສ່ຮ່າງຂໍ້ຕົກລົງ.
ຈຸດປະສົງຂອງຂໍ້ຕົກລົງສະບັບນີ້ ແມ່ນກໍານົດລະບຽບການກ່ຽວກັບການຄຸ້ມຄອງ ແລະ ຈັດຕັ້ງປະຕິບັດວຽກຈົດໝາຍເຫດທາງລັດຖະການ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ເປັນເອກະພາບ, ມີປະສິດທິພາບ ແລະ ປະສິດທິຜົນ ແນໃສ່ສ້າງເງື່ອນໄຂໃຫ້ອົງການຈັດຕັ້ງຂອງລັດ, ບຸກຄົນ, ນິຕິບຸກຄົນ ທັງພາຍໃນ ແລະ ຕ່າງປະເທດ ສາມາດເຂົ້າເຖິງຂໍ້ມູນຂ່າວສານທາງດ້ານກົດໝາຍ ແລະ ປະກອບຄໍາເຫັນໃສ່ຮ່າງນິຕິກໍາດັ່ງກ່າວຢ່າງກວ້າງຂວາງ ເຮັດໃຫ້ຮ່າງນິຕິກໍາ ມີເນື້ອໃນອຸດົມສົມບູນ, ຮັດກຸມ ແລະ ສອດຄ່ອງກັບສະພາບການພັດທະນາເສດຖະກິດ-ສັງຄົມ ປະກອບສ່ວນເຂົ້າໃນການສ້າງ ສປປ ລາວ ໃຫ້ກາຍເປັນລັດທີ່ປົກຄອງດ້ວຍກົດໝາຍ.
ຂ່າວ-ພາບ: ໄໝສີສົດ ສິນພອນເພັດ
