ວັນທີ 13 ກໍລະກົດ 2024 ບັນດາການນໍາພາກລັດ, ເອກະຊົນ ແລະ ພໍ່ແມ່ປະຊາຊົນ ໄດ້ເຂົ້າຮ່ວມພິທີປ່ອຍປາ ຢູ່ທີ່ບຶງບ້ານທ່າງາມ ເມືອງທ່າແຂກ ແຂວງຄຳມ່ວນ ເນື່ອງໃນໂອກາດວັນປ່ອຍປາ ແລະ ອານຸລັກສັດນໍ້າ-ສັດປ່າແຫ່ງຊາດ ໂດຍມີທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ, ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີບັນດາທ່ານການນຳຈາກພະແນກການຂັ້ນແຂວງ, ການນຳເມືອງທ່າແຂກ, ບັນດາບໍລິສັດ, ຫ້າງຮ້ານ, ແຂກຖືກເຊີນ ພ້ອມດ້ວຍພໍ່ແມ່ປະຊາຊົນບ້ານທ່າງາມ ເມືອງທ່າແຂກ ເຂົ້າຮ່ວມ.
ທ່ານ ເດດສັກດາ ມະນີຄຳ ຫົວໜ້າພະແນກກະສິກຳ ແລະ ປ່າໄມ້ ແຂວງຄຳມ່ວນ ໄດ້ລາຍງານກ່ຽວກັບສະພາບສັດນໍ້າໃນປະຈຸບັນ ທີ່ກຳລັງຖືກຄຸກຄາມຈາກທຳມະຊາດ ແລະ ຄົນ ເຊິ່ງເຮັດໃຫ້ນັບມື້ຫຼຸດໜ້ອຍຖອຍລົງ. ຈາກເຫດການດັ່ງກ່າວ ພັກ- ລັດ ຈຶ່ງໄດ້ຮ່ວມມືກັບຫຼາຍອົງການ ເພື່ອວາງກົດໝາຍ, ລະບຽບ ການ ແລະ ມາດຕະການຕ່າງໆ ໂດຍເນັ້ນໃສ່ໃນການປົກປັກຮັກສາສັດນໍ້າ ແລະ ສັດປ່າ ໃຫ້ຄົງຢູ່ກັບທຳມະຊາດແບບຍືນຍົງ ຄຽງຄູ່ກັນນັ້ນກໍ່ໄດ້ສົມທົບກັບທຸກພາກສ່ວນໃນການຂົນຂວາຍຫຼາຍໆດ້ານ ເພື່ອຊ່ວຍປົກປັກຮັກສາ ແລະ ພັດທະນາສັດນໍ້າ. ສະເພາະແຂວງຄຳມ່ວນ ໃນໄລຍະຜ່ານມາກໍ່ໄດ້ມີການສ້າງຕັ້ງ ຫຼື ກຳນົດເຂດອະນຸລັກ (ສ້າງວັງສະຫງວນ) ໄດ້ 113 ແຫ່ງໃນທົ່ວແຂວງ ເພື່ອເປັນບ່ອນແຜ່ພັນຂອງສັດນໍ້າ ພ້ອມທັງໄດ້ສ້າງຂະບວນການປ່ອຍປາລົງໜອງ, ອ່າງ ແລະ ແມ່ນໍ້າຕາມທຳມະຊາດ.
ສໍາລັບໃນປີ 2024 ໃນທົ່ວແຂວງຈະປ່ອຍປາລົງສູ່ແມ່ນໍ້າທໍາມະຊາດ, ໜອງ ແລະ ອ່າງເກັບນໍ້າຕ່າງໆ ໃຫ້ໄດ້ 3,300,000 ໂຕ. ໃນພິທີປ່ອຍປາຄັ້ງ ໄດ້ປ່ອຍປາທັງໝົດ 55,000 ໂຕ ປະກອບມີ: ປາປາກ ແລະ ປາມະນີການ ປ່ອຍລົງທີ່ບຶງທໍາມະຊາດ ບ້ານທ່າງາມ ເມືອງທ່າແຂກ.
