ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນການຜະລິດເຂົ້ານາແຊງ ແລະ ພືດລະດູແລ້ງ ສົກປີ 2023-2024 ທົ່ວແຂວງຄຳມ່ວນ ບັນລຸ 100.000 ກວ່າໂຕນ ໃນນີ້, ຜົນຜລະລິດເຂົ້ານາແຊງໄດ້ 63.933 ໂຕນ ຖ້າທຽບໃສ່ແຜນການທີ່ວາງໄວ້ເທົ່າກັບ 86,96% ຫລຸດແຜນ ແລະ ພືດລະດູແລ້ງ ໄດ້ 68.923 ໂຕນ, ຖ້າທຽບໃສ່ແຜນຜົນຜະລິດໝົດປີແມ່ນລື່ນແຜນການ 25,70%.
ອີງຕາມຂໍ້ມູນຂອງຂະແໜງປູກຝັງ, ພະແນກກະສິກໍາ ແລະ ປ່າໄມ້ ແຂວງຄໍາມ່ວນ ໃຫ້ຮູ້ວ່າ: ໃນການປູກເຂົ້ານາແຊງ (ເຂົ້າລະດູແລ້ງ) ສົກປີ 2023-2024 ທົ່ວແຂວງມີເນື້ອທີ່ແຜນການຜະລິດເຂົ້ານາລວມທັງໝົດ 13.413 ເຮັກຕາ, ຄາດຄະເນຜົນຜະລິດທົ່ວແຂວງ 73.519 ໂຕນ ໃນນີ້, ເນື້ອທີ່ແຜນການປູກເຂົ້າເພື່ອເປັນສະບຽງອາຫານ 4.396 ເຮັກຕາ ຄາດຄະເນຜົນຜະລິດ 23.772 ໂຕນ, ເນື້ອທີ່ແຜນການປູກເຂົ້າເພື່ອເປັນສິນຄ້າ 9.017 ເຮັກຕາ ຄາດຄະເນຜົນຜະລິດ 49.747 ໂຕນ. ຜ່ານການຈັດຕັ້ງປະຕິບັດຕົວຈິງທົ່ວແຂວງໄດ້ 12.511 ເຮັກຕາ ໃນນີ້, ນາຫວ່ານກວມເອົາ 4.925 ເຮັກຕາ ແລະ ນາປັກດໍາ 7.586 ເຮັກຕາ, ຜົນຜະລິດໝົດລະດູການປະຕິບັດໄດ້ 63.933 ໂຕນ, ຖ້າທຽບໃສ່ແຜນການທີ່ວາງໄວ້ແມ່ນເທົ່າກັບ 86,96% ໃນນີ້, ເນື້ອທີ່ແຜນການປູກເຂົ້າ ເພື່ອເປັນສະບຽງອາຫານປະຕິບັດໄດ້ຕົວຈິງ 4.192 ເຮັກຕາ, ຜົນຜະລິດໄດ້ 22.898 ໂຕນ, ເນື້ອທີ່ແຜນການປູກເຂົ້າ ເພື່ອເປັນສິນຄ້າປະຕິບັດໄດ້ຕົວຈິງ 8.319 ເຮັກຕາ, ຜົນຜະລິດໄດ້ 43.037 ໂຕນ. ສ່ວນວ່າເມືອງທີ່ປູກເຂົ້າລະດູແລ້ງຫລາຍ ແມ່ນເມືອງໜອງບົກ, ເມືອງເຊບັ້ງໄຟ, ເມືອງຍົມມະລາດ, ເມືອງຫີນບູນ ແລະ ເມືອງມະຫາໄຊ ຕາມລໍາດັບ.
ສ່ວນໃນການປູກພືດລະດູແລ້ງສົກປີ 2023-2024, ທົ່ວແຂວງມີເນື້ອທີ່ແຜນການປູກລວມ ທັງໝົດ 10.311 ເຮັກຕາ, ຄາດຄະເນຜົນຜະລິດພືດທົ່ວແຂວງ 54.830 ໂຕນ. ໃນນີ້ເນື້ອທີ່ແຜນການປູກພືດເພື່ອເປັນສະບຽງອາຫານ 3.661 ເຮັກຕາ, ຄາດຄະເນຜົນຜະລິດ 18.909 ໂຕນ, ເນື້ອທີ່ແຜນການປູກພືດເພື່ອເປັນສິນຄ້າ 6.650 ເຮັກຕາ, ຄາດຄະເນຜົນຜະລິດ 35.921 ໂຕນ. ຜ່ານການຈັດຕັ້ງປະຕິບັດຕົວຈິງ ທົ່ວແຂວງປະຕິບັດເນື້ອທີ່ປູກພືດໄດ້ 9.929 ເຮັກຕາ, ຜົນຜະລິດພືດໝົດລະດູການປະຕິບັດໄດ້ 68.923 ໂຕນ, ຖ້າທຽບໃສ່ແຜນຜົນຜະລິດໝົດປີແມ່ນລື່ນແຜນການ 25,70%. ໃນນີ້ເນື້ອທີ່ແຜນການພືດ ເພື່ອເປັນສະບຽງອາຫານ ປະຕິບັດໄດ້ຕົວຈິງ 3.551 ເຮັກຕາ, ຜົນຜະລິດໄດ້ 19.902 ໂຕນ, ເນື້ອທີ່ແຜນການປູກພືດ ເພື່ອເປັນສິນຄ້າ ປະຕິບັດໄດ້ຕົວຈິງ 6.378 ເຮັກຕາ, ຜົນຜະລິດໄດ້ 49.021 ໂຕນ. ສ່ວນວ່າເມືອງທີ່ປູກພືດລະດູແລ້ງຫລາຍກວ່າໝູ່ ແມ່ນເມືອງທ່າແຂກ, ເມືອງໜອງບົກ ແລະ ເມືອງຫີນບູນຕາມລໍາດັບ.
ສໍາລັບພືດທີ່ກະສິກອນນິຍົມປູກ ມີ: ມັນຕົ້ນ, ສາລີຫວານ, ຢາສູບ, ຖົ່ວດິນ, ອ້ອຍ, ມັນດ້າງ, ມັນເພົາ, ໝາກກ້ວຍ, ໝາກເຜັດ, ໝາກອຶ, ໝາກຫຸ່ງ, ໝາກເຂືອ, ໝາກເລັ່ນ, ແຕງໂມ, ໝາກຜັກ, ໝາກບວບ, ແຕງກວາ, ແຕງຢີ່ປຸ່ນ, ແຕງຈິງ, ຖົ່ວຍາວ,ຜັກບົ່ວ, ເຜືອກ, ຜັກບົ່ວແບ່ງ, ຜັກບົ້ງ, ຜັກກາດຊອມ, ຜັກສ້ຽນ, ຜັກບົວແດງ, ກະທຽມ, ຜັກສະຫລັດ , ກະລໍ່າປີ, ກະລໍ່າດອກ, ຫອມປ້ອມ, ຫອມລວມ, ຜັກກາດຂຽວ, ຜັກກາດນາ, ຜັກຊີ, ຫົວຂ່າ, ຫົວສີໄຄເຄື່ອງ, ຫົວສີໄຄ, ໝາກມ່ວງ ແລະ ພືດຜັກອື່ນໆ.
ຂ່າວ: ແດງສະຫວັດ ແສນພານິດ