(10.8.2024) ກິດຈະກຳຂີ່ລົດຖີບ ເພື່ອສ້າງຂະບວນການຕ້ອນຮັບວັນສ້າງຕັ້ງແນວລາວສ້າງຊາດ, ວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13 ສິງຫາ 1950 – 13 ສິງຫາ 2024) ໂດຍຈຸດເລີ່ມຕົ້ນ ກິດຈະກໍາຂີ່ລົດຖີບ ແມ່ນເລີ່ມແຕ່ຫ້ອງການແນວລາວສ້າງຊາດແຂວງ ຜ່ານໄປຫ້ອງວ່າການແຂວງ ຮອດວົງວຽນຫຼັກ 2 ແລ້ວລ້ຽວຂວາໄປຫາຈຸດ 3 ແຍກບ້ານໂພນພິມ ແລະ ລ້ຽວກັບມາສູ່ວົງວຽນຫຼັກ 2 ລ້ຽວຊ້າຍໄປຫາໄຟແດງພະແນກສຶກສາທິການ ແລະ ກິລາ ໄປສິ້ນສຸດຢູ່ຫໍຈາລຶກມູນເຊື້ອ 21 ມີນາ ລວມໄລຍະທາງປະມານ 10 ກິໂລແມັດ.
ທ່ານ ພິດສະໄໝ ກອງຊາເດດ ປະທານແນວລາວສ້າງຊາດແຂວງ ໄດ້ມີຄຳເຫັນວ່າ: ກິດຈະກຳຄັ້ງນີ້ ແມ່ນມີຄວາມໝາຍສຳຄັນ ນອກຈາກຈະເປັນການສ້າງຂະບວນການແລ້ວ ຍັງເປັນການສະແດງໃຫ້ເຫັນການເຕົ້າໂຮມຄວາມສາມັກຄີປອງດອງຂອງທົ່ວປວງຊົນ ເພື່ອປະກອບສ່ວນໃນການປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າສະເພາະກໍ່ຄືການສະເຫຼີມສະຫຼອງ 2 ວັນສໍາຄັນຄື: ວັນສ້າງຕັ້ງແນວລາວສ້າງຊາດ ແລະ ວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ.
(ຂ່າວ-ພາບ: ກອງຄໍາ)
