ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີຮັບຟັງປາຖະກະຖາເນື່ອງໃນໂອກາດວັນເກີດປະທານ ຄໍາໄຕ ສີພັນດອນ ຄົບຮອບ 100 ປີ ( 08 ກຸມພາ 1924 – 08 ກຸມພາ 2024 ) ໄດ້ຈັດຂຶ້ນໃນຕອນເຊົ້າຂອງວັນ 05 ກຸມພາ 2024 ຢູ່ທີ່ສະໂມສອນແຂວງຄໍາມ່ວນ ( ຫຼັກ 04 ) ໂດຍການໃຫ້ກຽດປາຖະກະຖາຂອງທ່ານ ບົວສອນ ບຸບຜາວັນ ອະດີດກໍາມະການກົມການເມືອງສູນກາງພັກ , ອະດີດນາຍົກລັດຖະມົນຕີ ແຫ່ງ ສປປ ລາວ.
ປະທານ ຄໍາໄຕ ສີພັນດອນ ແມ່ນໜຶ່ງໃນບັນດາຜູ້ນໍາຮຸ່ນທໍາອິດຂອງການປະຕິວັດໄດ້ຮ່ວມກັບຜູ້ນໍາຄົນອື່ນໆນໍາພາລະກິດການຕໍ່ສູ້ປົດປ່ອຍປະເທດຊາດອອກຈາກແອກປົກຄອງຂອງຈັກກະພັດຕ່າງດ້າວກໍ່ຄືພາລະກິດປົກປັກຮັກສາ ແລະ ສ້າງສາປະເທດຊາດ . ເພິ່ນເປັນຜູ້ນໍາທີ່ມີນໍ້າໃຈຮັກຊາດອັນສູງສົ່ງ, ເສຍສະຫຼະທຸກສິ່ງທຸກຢ່າງ ອຸທິດສະຕິປັນຍາ ແລະ ກໍາລັງວັງຊາຢ່າງບໍ່ຮູ້ອິດຮູ້ເມື່ອຍຄຽງບ່າຄຽງໄຫຼ່ກັບປະທານ ໄກສອນ ພົມ ວິຫານ ແລະ ຜູ້ນໍາຄົນອື່ນໆຈັດຕັ້ງນໍາພາຂະບວນການປະຕິວັດໄດ້ເຕີບໃຫຍ່ຂະຫຍາຍຕົວ , ຍາດໄດ້ໄຊຊະນະຢ່າງຕໍ່ເນື່ອງ ແລະ ຍາດໄດ້ຜົນສໍາເລັດຢ່າງມີໄຊ ແລະ ພາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມເທື່ອລະກ້າວຢ່າງໜັກແໜ້ນ.
ປະທານ ຄໍາໄຕ ສີພັນດອນ ເກີດເມື່ອວັນທີ 08 ກຸມພາ 1924 ໃນຄອບຄົວຊາວນາທີ່ດຸໝັ່ນຂະຫຍັນພຽນຢູ່ບ້ານຫົວໂຂງພະໃຫຍ່ , ເມືອງໂຂງ , ແຂວງສີທັນດອນ ( ແຂວງຈໍາປາສັກໃນປະຈຸບັນ ) ເປັນບຸດຂອງພໍ່ ນີ ນີລາໄຊ ແລະ ແມ່ສາຍບົວ ນີລາໄຊ , ມີອ້າຍເອື້ອຍນ້ອງຮ່ວມກັນທັງໝົດ 06 ຄົນ , ເປັນຄອບຄົວເຄີຍມີມູນເຊື້ອການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະ ສັກດີນາທ້ອງຖິ່ນ .
ປະທານ ຄໍາໄຕ ສີພັນດອນໄດ້ຮຽນໜັງສືຢູ່ວຽງຈັນເປັນເວລາ 10 ປີເມື່ອຮຽນຈົບໂກລາແລ – ປາວີເພິ່ນໄດ້ໄປສຶກສາຕໍ່ຢູ່ໄຊງ່ອນ ( ພາກໃຕ້ຫວຽດນາມ ) ແລະ ໄດ້ໄປເຄື່ອນໄຫວຢູ່ຫຼາຍປະເທດເຊິ່ງເວລາທີ່ເພີ່ນຜ່ານໄປແຕ່ລະປະເທດໄດ້ຮູ້ເຫັນ ແລະ ສໍາພັດໂດຍກົງກັບຂະບວນການຕໍ່ສູ້ຕ້ານກັບຈັກກະພັດຜູ້ຮຸກຮານຂອງປະເທດເຫຼົ່ານັ້ນ.
ນອກຈາກນັ້ນຍັງໄດ້ຍົກໃຫ້ເຫັນການເຄື່ອນໄຫວ ປະຕິວັດຂອງປະທານ ຄໍາໄຕ ສີພັນດອນໃນແຕ່ລະໄລຍະເປັນຕົ້ນ: ເຂົ້າ ຮ່ວມຂະບວນການຕໍ່ສູ້ຕ້ານຝຣັ່ງຢູ່ພາກໃຕ້ , ການນໍາພາຕໍ່ຕ້ານຢູ່ເຂດກາງ , ການຊີ້ນໍາບັນຊາຕໍ່ສູ້ປົກປັກຮັກສາ 02 ແຂວງເຕົ້າໂຮມ ແລະ ປະຕິບັດຄວາມຖືກຕ້ອງປອງດອງຄັ້ງທີ 1 , ການນໍາພາຕໍ່ສູ້ຕ້ານສົງຄາມຂອງຈັກກະພັດອາເມຣິກາ ແລະ ລູກມືຈົນພາໄປເຖິງສັນຍາວຽງຈັນ 1973 , ການນໍາພາຕໍ່ສູ້ປະຕິບັດສັນຍາວຽງຈັນປີ 1973 ແລະ ຍຶດອໍານາດທົ່ວປະເທດ , ບາດກ້າວອັນສໍາຄັນຂອງປະທານ ຄໍາໄຕ ສີພັນດອນ ໃນການຊີ້ນໍາ-ນໍາພາປະຕິບັດ 02 ໜ້າທີ່ຍຸດທະສາດ ແລະ ພາລະກິດປ່ຽນແປງໃໝ່ຂອງພັກ ແລະ ການເຄື່ອນໄຫວຂອງປະທານ ຄໍາໄຕ ສີພັນດອນພາຍຫຼັງອອກພັກຜ່ອນຮັບບໍານານ . ພ້ອມນັ້ນຕ້ອງຕັ້ງໜ້າຄົ້ນຄວ້າຮຽນຮູ້ ແລະ ເສີມຂະຫຍາຍຄຸນງາມຄວາມດີຂອງປະທານ ຄໍາໄຕ ສີພັນດອນ ເຂົ້າໃນການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃນແຕ່ລະໄລຍະ ແລະ ໃນແຕ່ລະຂັ້ນໃຫ້ໄດ້ຮັບຜົນດີໂດຍສະເພາະແມ່ນການກະກຽມດໍາເນີນກອງປະຊຸມໃຫຍ່ 03 ຂັ້ນເພື່ອຕັ້ງໜ້າກະກຽມໃຫ້ດີ ແລະ ດໍາເນີນໃຫ້ຖືກຕ້ອງ . ຜ່ານໄລຍະອອກພັກຜ່ອນຮັບບໍານານແຕ່ປີ 2006 ຈົນເຖິງປະຈຸບັນປະທາ ຄໍາໄຕ ສີພັນດອນເວລາໃດກໍ່ເປັນຫ່ວງເປັນໄຍ ແລະ ອຸທິດຕົນເພື່ອປະເທດຊາດ,ເພື່ອປະຊາຊົນຢ່າງບໍ່ຮູ້ອິດຮູ້ເມື່ອຍ,ເພິ່ນໃຊ້ເວລາພັກຜ່ອນພົບປະຢ້ຽມຢາມ ແລະ ມີຄວາມເຫັນຊ່ວຍການນໍາພັກ-ລັດຂັ້ນສູນກາງ ແລະ ທ້ອງຖິ່ນ .
ປະທານ ຄໍາໄຕ ສີພັນດອນ ແມ່ນຜູ້ໜື່ງໃນບັນດາຜູ້ນໍາຮຸ່ນກໍ່ຕັ້ງຂະບວນການ ແລະ ບຸກເບີກເສັ້ນທາງປະຕິວັດຢູ່ປະເທດເຮົາເຊິ່ງເວລາໃດກໍ່ໜັກແໜ້ນທາງດ້ານການເມືອງ , ສະຕິຕໍ່ການການຈັດຕັ້ງ , ຮັບຜິດຊອບສູງຕໍ່ໜ້າທີ່ທີ່ໄດ້ຮັບມອບໝາຍເລີ້ມຈາກພະນັກງານທໍາມະດາກາຍເປັນຜູ້ຊີ້ນໍາ-ບັນຊາ ແລະ ນໍາພາຂະບວນການຕໍ່ສູ້ປົດປ່ອຍຊາດ ຄຽງບ່າຄຽງໄຫຼ່ກັບປະທານ ໄກສອນ ພົມວິຫານ , ປະທານ ສຸພານຸວົງ ແລະ ຜູ້ນໍາຄົນອື່ນໆຂອງແນວລາວຮັກຊາດໄດ້ຮັບໄຊຊະນະ, ສະຖາປານາ ສປປ ລາວຂຶ້ນຢ່າງສະຫງ່າຜ່າເຜີຍໃນວັນທີ 02 ທັນວາ 1975 ຕໍ່ຈາກນັ້ນກໍ່ໄດ້ປະກອບສ່ວນຄົ້ນຄວ້າ ແລະ ກໍານົດທິດທາງຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດລວມທັງແນວທາງປ່ຽນແປງໃໝ່ອອກຢ່າງຖືກຕ້ອງ, ສອດຄ່ອງທັງໄດ້ນໍາພາ-ຊີ້ນໍາ ການຈັດຕັ້ງປະຕິບັດໄດ້ຮັບຜົນສໍາເລັດໃນຫຼາຍດ້ານ .