ງານບຸນຊ່ວງເຮືອປະເພນີປະຈໍາປີ2022ຂອງເມືອງຊຽງຮ່ອນ ເເຂວງໄຊຍະບູລີ ຈັດຂື້ນຢ່າງເປັນທາງການໃນຕອນເຊົ້າວັນທີ 9.11.2022 ພາຍຫລັງມີການຄົບງັນມາເປັນເວລາຫລາຍວັນສົມຄວນ ຢູ່ສະໂມສອນ ເດີ່ນຫນອງຊາງ ໃຈກາງເມືອງຊຽງຮ່ອນ ມີທ່ານດວງຕາ ໄຊວຸດ ຮອງເລຂາພັກເເຂວງໄຊຍະບູລີ, ທ່ານກົງທອງ ສິດທິໄຊ ເຈົ້າເມືອງໆຊຽງຮ່ອນ, ຄະນະບໍລິຫານງານພັກເມືອງ,ເເຂກຖືກເຊີນທີ່ມາຈາກເມືອງອ້ອມຂ້າງຂອງຣາຊະອານາຈັກໄທ ທີ່ມີຊາຍເເດນຕິດຈອດກັບເເຂວງໄຊບູລີ ພ້ອມດ້ວຍ ປະຊາຊົນບັນດາເຜົ່າພາຍໃນເມືອງເຂົ້າຮ່ວມ.
ໂອກາດນີ້ທ່ານກົງທອງ ສິດທິໄຊ ເຈົ້າເມືອງໆຊຽງຮ່ອນໄດ້ມີຄໍາເຫັນກ່າວເປີດພິທີວ່າ:ການຈັດງານບຸນຊ່ວງເຮືອປະຈໍາປີ2022ເເມ່ນເປັນຄັ້ງທີ24ນັບເເຕ່ປີ1998ເປັນຕົ້ນມາ ເພື່ອອະນຸລັກຮັກສາ ເເລະ ສົ່ງເສີມວັດທະນະທໍາ,ຮີດຄອງປະເພນີອັນດີງາມຂອງຊາດ,ຄຽງຄູ່ກັນການສົ່ງເສີມການທ່ອງທ່ຽວຕາມຄໍາຂວັນ ລາວທ່ຽວລາວເວົ້າລວມ ເວົ້າສະເພາະເເມ່ນການສົ່ງເສີມການທ່ອງທ່ຽວຢູ່ພາຍໃນເມືອງ ໃຫ້ມີບັນຍາກາດຟົດຟື້ນ ຕີດພັນກັບການອະນຸລັກຮັກສາຮີດຄອງປະເພນີອັນດີງາມຂອງທ້ອງຖີ່ນ ເປັນການຮັດເເຫນ້ນຄວາມສາມັກຄີ ລະຫວ່າງການຈັດຕັ້ງຂັ້ນຕ່າງໆ,ຂອງພາກລັດເເລະພາກເອກະຊົນ ລວມເຖີງປະຊາຊົນບັນດາເຜົ່າຕື່ມອີກ ເເລະ ອືນໆ.
ທ່ານກົງທອງ ສິດທິໄຊ ໃຫ້ຮູ້ຕື່ມວ່າ:ງານບຸນຊ່ວງເຮືອປະເພນີປະຈໍາປີ2022ຂອງເມືອງຊຽງຮ່ອນ ເເຂວງໄຊຍະບູລີຄັ້ງນີ້ ຢູ່ໃນໄລຍະທີ່ຊາວເມືອງຊຽງຮ່ອນພວມອອກເເຮງເເຂ່ງຂັນສ້າງຂະບວນການຮອບດ້ານ ເພື່ອຂໍ່ານັບຮັບຕ້ອນກອງປະຊຸມກາງສະໄຫມຂອງອົງຄະນະພັກເມືອງສະໄຫມທີ7ຢ່າງເປັນຂະບວນຟົດຟື້ນ ທັງເປັນໄລຍະທີ່ປະຊາຊົນບັນດາເຜົ່າກໍາລັງຂຸ້ນຂ້ຽວເກັບກ່ຽວຜົນຜະລິດລະດູຝົນກະກຽມປູກພືດລະດູເເລ້ງ ນອກຈາກນີ້ການຈັດງານບຸນຄັ້ງນີ້ໄດ້ຕິດພັນກັບບຸນເດືອນຈຽງເພັງ ເຊີ່ງໄດ້ກາຍເປັນປາງບຸນໃຫຍ່ ເປັນປະເພນີອັນດີງາມຂອງຊາວເມືອງຊຽງຮ່ອນທີ່ເຄີຍສືບທອດຈັດຕັ້ງປະຕິບັດກັນມາຫລາຍສີບປີ.
ສໍາລັບງານບຸນຊ່ວງເຮືອປະເພນີປະຈໍາປີ2022ຂອງເມືອງຊຽງຮ່ອນ ເເຂວງໄຊຍະບູລີປີນີ້ເເຂ່ງຂັນກັນຢູ່ຫນອງຊາງ ມີເຮືອເຂົ້າຮ່ວມທັງຫມົດ16ລໍາ ເປັນເຮືອສູດ18 ຫາ20ສີພາຍຍີງ-ຊາຍ ເຊີ່ງມີການຄົບງັນມາເເຕ່ວັນທີ31 ຕຸລາຜ່ານມາ ເເລະ ເລີ່ມເເຂ່ງຂັນມາເເຕ່ວັນທີ7ຫາ9ພະຈິກ2022 ພາຍໃນງານປະກອບມີຫລາຍກິດຈະກໍາ ເປັນຕົ້ນ:ການປະກວດອາຫານພື້ນເມືອງທີ່ມາຈາກ17ບ້ານ,ການເເຂ່ງຂັນຈູດບັ້ງໄຟດອກ,ການປະກວດສີນປະລະພື້ນບ້ານ,ການສະເເດງສິນລະປະວັນນະຄະດີຂອງນັກຮຽນຈໍານວນ23ລາຍການ,ຈູດໂຄມໄຟ-ຊົມການຈູດບັ້ງໄຟດອກ,ເຊີ້ງເຮືອງາມ ລວມເຖີງງານຕະຫລາດນັດວາງສະເເດງສີນຄ້າທັງພາຍໃນແລະຕ່າງປະເທດ ຈໍານວນຫລາຍກວ່າ100ຮ້ານ.
ໂດຍ: ເດດອາລຸນ ແກ້ວວິໄລ.
Loading...