ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ອາທິດຜ່ານມານີ້ ທີ່ບ້ານກົກງິ້ວ ນະຄອນຫຼວງພະບາງ ໄດ້ມີການຈັດງານບຸນປະເພນີໝາກນັດຫວານ ປະຈຳປີ 2024 ມີ ທ່ານ ດອນງ່ຽມ ຄຳມີຜົນ, ຫົວໜ້າຫ້ອງການກະສິກຳ ແລະ ປ່າໄມ້ນະຄອນ, ພ້ອມດ້ວຍຫົວໜ້າ-ຮອງຫົວໜ້າຫ້ອງການອ້ອມຂ້າງ, ອົງການປົກຄອງບ້ານ, ນັກທຸລະກິດ ແລະປະຊາຊົນບັນດາເຜົ່າພາຍໃນບ້ານກົກງິ້ວ ເຂົ້າຮ່ວມ. ພິທີ ທ່ານ ວັນຄຳ ມະນີວັນ ນາຍບ້ານກົກງິ້ວ ໄດ້ຂຶ້ນຜ່ານບົດສະຫຼຸບຫຍໍ້ ການພັດທະນາເສດຖະກິດສັງຄົມຂອງບ້ານວ່າ: ບ້ານກົກງິ້ວ ມີ 220 ຄອບຄົວ ທຽບໃສ່ປີທີ່ຜ່ານມາແມ່ນເພີ້ມຂຶ້ນ 5 ຄອບຄົວ, ມີພົນລະເມືອງ 1,378 ຄົນ ຍິງ 717 ຄົນ ປະກອບມີ 3 ຊົນເຜົ່າດ້ວຍກັນຄື: ເຜົ່າລາວລຸ່ມ, ເຜົ່າກຶມມຸ ແລະເຜົ່າມົ້ງ. ໃນນັ້ນ ບ້ານມີເຂດຄຸ້ມຄອງຂອງບ້ານມີ ເນື້ອທີ່ທັງໝົດ 1,575 ເຮັກຕາ ມີດິນປຸກສ້າງ 37 ເຮັກຕ່າ, ເນື້ອທີ່ນາ 15 ເຮັກຕາ, ສວນໄມ້ສັກ 758 ເຮັກຕາ, ປ່າສະຫງວນມີ 166 ເຮັກຕາ, ປ່າປ້ອງກັນ 136 ເຮັກຕາ ປ່າຊ້າ 4 ເຮັກຕາ ແລະເນື້ອທີ່ປູກຝັງ 459 ເຮັກຕາ ເຊິ່ງອາຊີບຫຼັກຂອງປະຊາຊົນພາຍໃນບ້ານແມ່ນຍຶດຖືການປູກຝັງ ກວມ 68,22% ແລະການລ້ຽງສັດກວມ 22,5% ແລະການຄ້າບໍລິການ ກວມ 15,8%. ພ້ອມນີ້ ໄດ້ຮັບຟັງການຜ່ານບົດສະຫຼຸບ ແລະປະຫວັດຄວາມເປັນມາ ຂອງບຸນໝາກນັດຫວານບ້ານກົກງິ້ວ, ຈາກນັ້ນ ຜູ້ເຂົ້າຮ່ວມໄດ້ຊົມການວາງສະແດງ ພ້ອມທັງມີການຊີມລົດຊາດ ຜະລິດຕະພັນແປຮູບຂອງປະຊາຊົນພາຍໃນບ້ານຜະລິດຂຶ້ນ ແລະໃຫ້ຄະແນນຜົນງານຂອງຊາວບ້ານ ພ້ອມທັງ ມອບຂອງລາງວັນ ເປັນເງິນສົດ ຈຳນວນໜຶ່ງ ໃຫ້ກັບຜູ້ຕາງໜ້າຜິລິດຕະພັນແປຮູບໝາກນັດທີ່ນຳມາວາງສະແດງ, ຕອນທ້າຍພິທີ ໄດ້ມີການບາສີ ແລະຮັບຊົມການສະແດງສິລະປະວັນນະຄະດີ ຈາກເຍົາວະຊົນພາຍໃນບ້ານ ດ້ວຍຄວາມເບີກບານມ່ວນຊື່ນ.
ຂ່າວໂດຍ ສົມພອນ ວິໄລຜົນ ຫ້ອງການ ຖວທ ນະຄອນຫຼວງພະບາງ