ງານມະຫາກໍາສືມືຫັດຖະກໍາລາວຄັ້ງທີ 21ປີ 2022 ໄຂຂຶ້ນຢ່າງເປັນທາງການ ຕອນບ່າຍວັນທີ 17 ພະຈິກ2022, ທີ່ ສູນວາງສະແດງສິນຄ້າ ລາວ-ໄອເຕັກ ນະຄອນຫລວງວຽງຈັນ ໂດຍມີທ່ານ ພັນຄໍາ ວິພາວັນ ນາຍົກລັດຖະມົນຕີ, ທ່ານພູທອງ ໄຊສະນິດ, ຮອງປະທານສະມາຄົມຫັດຖະກໍາລາວ, ທ່ານ ປ້າ ນາລີ ສີສຸລິດ, ປະທານ ຄະນະທີ່ປືກສາ ສະມາຄົມ ຫັດຖະກຳລາວ, ທ່ານ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ພ້ອມດ້ວຍຜູ້ຕາງໜ້າ ສະຖານທູດ, ອົງການຈັດຕັ້ງສາກົນ ປະຈໍາ ລາວ, ນັກທຸລະກິດ ແລະ ຊາວຊ່າງຫັດຖະກໍາ ເຂົ້າຮ່ວມ.
ທ່ານພູທອງ ໄຊສະນິດ ຮອງປະທານສະມາຄົມຫັດຖະກໍາລາວ ໄດ້ລາຍງານ ກ່ຽວກັບສະພາບການກະກຽມຈັດງານຄັ້ງນີ້ບາງຕອນວ່າ: ງານມະຫາກໍາສີມືຫັດຖະກໍາລາວ ຄັ້ງທີ 21 ປີ 2022 ຈັດຂຶ້ນພາຍໃຕ້ຄໍາຂວັນ:ສືໄມ້ລາຍມື ຄື ອຸທິຍານແຫ່ງການທ່ອງທ່ຽວ “ສະເໜຜ້າບ່ຽງລາວ”,ຊຶ່ງເປັນບຸນປາງໃຫຍ່ສໍາລັບຊາວຊ່າງ ແລະ ຜູ້ປະກອບການດ້ານຫັດຖະກໍາແລະ ດ້ວຍຈຸດປະສົງຫຼັກ ຄື:
1. ເພື່ອສະເຫຼີມສະຫຼອງ “ວັນຫັດຖະກໍາລາວ ວັນທີ 1 ພະຈິກ”ທີ່ຈະມາເຖິງ ໃນມໍ່ໆນີ້ ແລະ ສະເຫຼີມສະຫຼອງ ວັນສ້າງຕັ້ງສະມາຄົມຫັດຖະກໍາລາວ ຄົບຮອບ 25 ປີ.
2. ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົົມ ທ່ຽວຊື້ ໄດ້ພົບ-ໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຫລົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກໍາລາວເຮົາ.
3. ເພື່ອເຕົ້າໂຮມຄວາມສາມັກຄີບັນດາຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກໍາ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການສ້າງລາຍຮັບ ແລະ ພັດທະນາຊີວິດການເປັນຢູ່ ຂອງທ້ອງຖິ່ນໃຫ້ນັບມື້ດີຂຶ້ນ
4. ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດ (ຫຼື ມີບ່ອນຂາຍ) ຜະລິດຕະພັນຫັດຖະກໍາຂອງຕົນ ພ້ອມທັງ ໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ.
5. ເພື່ອປະກອບສ່ວນສ້າງເປັນສະຖານທີ່ທ່ອງທ່ຽວດ້ານຫັດຖະກໍາ ດັ່ງຄໍາຂັວນ ທີ່ວ່າ: “ສີໄມ້ລາຍມືຄືອຸທິຍານແຫ່ງການທ່ອງທ່ຽວ”
ງານມະຫາກໍາສີມືຫັດຖະກໍາລາວຄັ້ງນີ້ຈະດໍາເນີນເປັນເວລາ 09ວັນ ແຕ່ວັນທີ 15-23 ຕຸລາ 2022 ດ້ວຍການເຂົ້າຮ່ວມຂອງຫຼາຍພາກສ່ວນຫັດຖະກໍາທີ່ມາຈາກທຸກໆແຂວງໃນທົ່ວປະເທດ ເປັນຕົ້ນແມ່ນ: ພາກສ່ວນ ແຜ່ນແພ ຜ້າໄໝຜ້າຝ້າຍພື້ນເມືອງ, ພາກສ່ວນ ເຄື່ອງປະດັບ; ພາກສ່ວນ ເຄື່ອງຈັກສານ; ຜະລິດຕະພັນວັດທະນະທໍາ ເຄື່ອງປັ້ນດິນເຜົາ; ໄມ້ແກະສະຫຼັກ, ເຟີນີເຈີ, ອາຫານສໍາເລັດຮູບພື້ນເມືອງ, ກາເຟ, ສະໝູນໄພ ແລະ ອື່ນໆ ນອກຈາກນັ້ນ ຍັງມີ ພາກສ່ວນ ສາທິດ ຫຼື ສະແດງ ການຜະລິດຕົວຈິງ ເປັນຕົ້ນແມ່ນ: ສາທິດ ການແສ່ວຜ້າ, ແກະສະຫຼັກຫີນ, ເຂັນຝ້າຍ, ສາວໄໝ, ປັກດິ້ງ, ຈັກສານ ຈາກຊາວຊ່າງ ແຂວງຜົ້ງສາລີ, ຫຼວງນໍ້າທາ, ຫຼວງພະບາງ,ຊຽງຂວາງ, ແຂວງວຽງຈັນ, ຈໍາປາສັກ, ສາລະວັນ, ອັດຕະປື, ເຊິ່ງມີຈໍານວນຮ້ານ ເຂົ້າຮ່ວມວາງສະແດງ ແລະ ຂາຍ ທັງໝົດ: 230 ຮ້ານ (ຫຼື ບຸດ)
ຫລັງຈາກ ທ່ານນາງຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກໍາແຫ່ງຊາດລາວ ກ່າວໄຂງານຢ່າງເປັນທາງແລ້ວ ທ່ານພັນຄໍາ ວິພາວັນ ນາຍົກລັດຖະມົນຕີ ໄດ້ໃຫ້ກຽດຕັດແຖບຜ້າ, ພ້ອມລັ່ນຄ້ອງ 9ບາດ ແລະເຂົ້າຢ້ຽມຊົມເຂດວາງສະແດງທີ່ເຂົ້າຮ່ວມໃນງານຄັ້ງນີ້.
