ພິທີຖະແຫລງຂ່າວງານມະຫາກໍາສີມືຫັດຖະກໍາລາວຄັ້ງທີ 22 ປີ 2023 ຈັດຂຶ້ນໃນວັນທີ 5 ຕຸລາ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ພາຍໃຕ້ການເປັນປະ ທານຂອງທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວ, ໂດຍການເຂົ້າຮ່ວມຂອງທ່ານ ຄໍານ້ອຍ ຈັນເພັງໄຊ,ຮອງຫົວໜ້າກົມອຸດສາຫະກຳ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ,ມີທ່ານ ຄຳແສນ ສີສະວົງ ສະມາຊິກສະພາແຫ່ງຊາດ. ຮອງປະ ທານສະພາການຄ້າ ແລະ ອຸດສະຫະກຳແຫ່ງຊາດລາວ, ທ່ານ ປິງ ຫ່ວງຊະນະໄຊ ຮອງຜູ້ ອໍານວຍການໃຫຍ່ ຝ່າຍໄອທີ ສູນການຄ້າລາວ-ໄອເຕັກ ພ້ອມດ້ວຍພາກສ່ວນກ່ຽວຂ້ອງ ແລະ ເເຂກຮັບເຊີນ
ທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວມີຄໍາເຫັນວ່າ: ການກະກຽມຈັດຕັ້ງງານມະຫາກຳສີມືຫັດຖະກຳລາວຄັ້ງທີ 22 ປະຈໍາປີ 2023 ທີ່ຈະຈັດຂຶ້ນໃນມໍ່ໆນີ້. ພາຍໃຕ້ຄໍາຂວັນ: ສືໄມ້ລາຍມືຄືອຸທິຍານແຫ່ງການທ່ອງທ່ຽວ “ຕໍານານສິນລະປະລາຍນາກລາວ” ແລະ ຈຸດປະສົງຂອງການຈັດງານຄັ້ງນີ້ ເພື່ອສະເຫຼີມສະ ຫຼອງວັນຫັດຖະກໍາລາວວັນທີ 1 ພະຈິກຄົບຮອບ 16 ປີ, ພ້ອມທັງສ້າງກາລະໂອກາດໃຫ້ຊຸມຊົນ ແລະ ລູກຄ້າຜູ້ມາທ່ຽວຊົົມທ່ຽວຊື້ໄດ້ພົບ ໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຫລົງໄຫຼໃນຄວາມມະຫັດສະຈັນຂອງສີໄມ້ລາຍ ມືຂອງນາຍຊ່າງຫັດຖະກໍາລາວເຮົາ ເຮັດໃຫ້ບັນດາຊ່າງຫັດຖະກໍາທຸກທ້ອງຖິ່ນໃນທົ່ວປະເທດ ແລະ ຜູ້ປະກອບການດ້ານຫັດຖະກຳໄດ້ມີໂອກາດເຂົ້າເຖິງການຕະ ຫຼາດຫລາຍຂຶ້ນ, ນອກນີ້ຍັງໄດ້ມີໂອກາດພົບປະແລກປ່ຽນບົດຮຽນ, ປະ ສົບການທາງດ້ານການຜະລິດ, ການວາງສະແດງ ແລະ ການຂາຍ.ເພື່ອປະກອບສ່ວນສ້າງເປັນສະຖານທີ ທ່ອງທ່ຽວດ້ານຫັດຖະກໍາດັ່ງຄໍາຂັວນທີ່ວ່າ: “ສີໄມ້ລາຍມືຄືອຸທິຍານແຫ່ງການທ່ອງທ່ຽວ”
ປະທານສະມາຄົມຫັດຖະກໍາລາວມີຄໍາເຫັນຕື່ມວ່າ: ສໍາລັບງານມະຫາກໍາສີມືຫັດຖະກໍາລາວຄັ້ງທີ 22 ປະຈໍາປີ 2023 ຈະໄດ້ຈັດຂຶ້ນລະຫວ່າງວັນທີ 04 ຫາ ວັນທີ 12 ພະຈິກໜ້ານີ້ ໂດຍຈະມີຫົວໜ່ວຍຫັດຖະກໍາແພໄໝລາວ, ເຄື່ອງປະດັບເງີນຄໍາ ແກ້ວປະເສີດ; ເຄື່ອງຈັກສານ; ຜະລິດຕະພັນວັດທະນະທໍາເຄື່ອງປັ້ນດິນເຜົາ, ໄມ້ແກະສະຫຼັກ, ເຄື່ອງດົນຕີພື້ນເມືອງ, ເຟີນີເຈີ,ອາຫານສໍາເລັດຮູບພື້ນເມືອງ, ສະໝູນໄພ ແລະ ອື່ນໆ ລວມທັງໝົດ 213 ຮ້ານ, ນອກນີ້ຍັງຈະຈັດຫລາຍກິດຈະກໍາ ເຊັ່ນ: ການສໍາມະນາ, ຕໍານານສິນລະປະລາຍນາກລາວ, ມາດຕະຖານສິນຄ້າຫັດຖະກຳເພື່ອສົ່ງໄປປະເທດຍີ່ປຸ່ນ, ຫັດຖະກຳກັບການທ່ອງທ່ຽວ,ກິດຈະກໍາປະກວດການແຂ່ງຂັນຜະລິດຕະພັນດີເດັ່ນ: “ເຄື່ອງທີ່ລະນືກ”,ກິດຈະກໍາສາທິດຂັ້ນຕອນການຜະລິດຕົວຈິງ, ສະແດງສິລະປະເດີນແບບ ແລະ ອື່ນໆ.%
