ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ງານແຂ່ງຂັນກອງປື່ງປະຈຳປີ 2019 ຢູ່ເມືອງທົ່ງມີໄຊແຂວງໄຊຍະບູລີ

ໃນວັນທີ 6 ຕຸລາ 2019 ຢູ່ທີ່ບ້ານ ແດດ ເມືອງ ທົ່ງມີໄຊ ແຂວງ ໄຊຍະບູລີ ໄດ້ຈັດການແຂ່ງຂັນກອງປື່ງປະຈຳປີ 2019 ຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ແສງເພັດ ອາລີ ນາຍບ້ານໆແດດ ເຊິ່ງເປັນບ້ານເຈົ້າພາບໃນການຈັດການແຂ່ງຂັນ, ເປັນກຽດເຂົ້າຮ່ວມຂອງທ່ານ ສົມພອນ ໄຊດວງຕາ ເຈົ້າເມືອງໆທົ່ງມີໄຊ, ມີບັນດາທ່ານຄະນະພັກ, ອຳນາດການປົກຄອງເມືອງ,  ພະນັກງານ, ທະຫານ, ຕຳຫຼວດ, ນັກທຸລະກິດ, ຜູ້ປະກອບການ, ພໍ່ຄ້າຊາວຂາຍ, ຕະຫຼອດຮອດປະຊາຊົນທີ່ມາຈາກພາຍໃນເມືອງ ແລະ ຕ່າງເມືອງເຂົ້າຮ່ວມຢ່າງເປັນຂະບວນຟົດຟື້ນ, ມ່ວນຊື່ນ. ທັງນີ້ກໍ່ເພື່ອເປັນການອານຸລັກຮັກສາວັດທະນະທຳຮີດຄອງປະເພນີອັນດີງາມ ຂອງຄົນລາວເຮົາທີ່ມີມາແຕ່ບູຮານນະການໃຫ້ຄຽງຄູ່ຢູ່ກັບຄົນລາວຕະຫຼອດໄປ, ເວົ້າສະເພາະກໍ່ຄືຊາວເມືອງທົ່ງມີໄຊແຂວງໄຊຍະບູລີ, ກໍ່ຍັງບໍ່ໄດ້ຫລຸດລະຮີດຄອງປະເພນີເອກະລັກວັດທະນະທຳທີ່ເຄີຍປະຕິບັດກັນມາແຕ່ບູຮານນະການ ຕາມການບອກເລົ່າຂອງຄົນຮຸ່ນກ່ອນຜ່ານມາເພີ່ນໄດ້ເວົ້າວ່າ: ມີຄູບາອົງໜຶ່ງຊື່ວ່າຄູບາຕາ ເປັນຜູ້ທີ່ມີຄວາມຮູ້ມີບົດບາດ ແລະ ອິດທິພົນລື່ນຄູບາຜູ້ອື່ນໆໄດ້ອອກຄຳຄິດຄຳເຫັນ ເພື່ອຢາກເຕົ້າໂຮມບັນດາພະສົງສຳມະເນນປະຈຳຢູວັດ ເພື່ອສຶກສາຮ່ຳຮຽນຈຶ່ງໄດ້ພາກັນຊັກຊວນອອກຕົນຍາດໂຍມໄປຊອກເອົາໄມ້ຊໍ້,ໄມ້ດູ່ ມາສ້າງເຮັດກອງ, ເພິ່ນໃຊ້ຂວັນ, ຊີ່ວມາເຈາະຄວັດເປັນໂກນໃຫ້ກ້ຽງງາມແລ້ວຫຸ້ມດ້ວຍໜັງສັດຄືໜັງກວາງ, ໜັງຟານເຊິ່ງມີບໍ່ອຶດໃນເມື່ອກ່ອນ ຈາກນັ້ນເອົາເຂົ້າໜື້ງມາຕຳ, ໝັກຄົນກັບນໍ້າໜ້ອຍໜື່ງເພື່ອໃຫ້ມັນໜຽວແລ້ວເອົາມາຕິດທາຕາມໜ້າກອງໜ້ອຍຫຼາຍແຕກຕ່າງກັນ ເພິ່ນເອີ້ນວ່າໜ້ານ້ອຍ, ໜ້າຫຼວງ,ຈາກນັ້ນໃຊ້ຜ້າຮຳມືໃຫ້ແໜ້ນຕີກະທົບໃສ່ໜ້າກອງແຕ່ລະໜ່ວຍມີສຽງດັງປື່ງໆໃຫຍ່ນ້ອຍຫຼຸດໂຕນກັນພ້ອມກັນໃສ່ຊື່ວ່າ: ກອງປື່ງ. ນັບຕັ້ງແຕ່ນັ້ນມາເພິ່ນກໍ່ຈັດໃຫ້ມີການຕີແຂ່ງຂັນກອງປື່ງ, ພ້ອມທັງຈັດຫາຈັ່ງຫວະຕີປະສານສຽງຂຶ້ນໆລົງໆ. ແລະ ໄດ້ຜັນຂະຫຍາຍສ້າງກອງປື່ງ ອອກໄປທຸກໆບ້ານໃນທົ່ວເມືອງ ທັງກຳນົດເປັນກົດກະຕິກາອັນໜຶ່ງ ແລະ ທັງເປັນສັນຍາລັກໃຫ້ຮູ້ວ່າ ຍາມໃດໄດ້ຍິນສຽງກອງປື່ງດັງຂຶ້ນຍາມນັ້ນແມ່ນຍາມເຂົ້າພັນສາ ຍາມໃດຫາກບໍ່ໄດ້ຍິນສຽງກອງປື່ງຍາມນັ້ນແມ່ນອອກພັນສາແລ້ວ ເພາະກອງປື່ງແມ່ນຕີສະເພາະໃນໄລຍະເຂົ້າພັນສາເທົ່ານັ້ນ. ສະນັ້ນຈື່ງໄດ້ຈັດໃຫ້ມີການແຂ່ງຂັນກອງປື່ງປະຈຳປີຂຶ້ນ ໃນຊ່ວງໄລຍະໃກ້ຈະອອກພັນສາຂອງທຸກໆປີ  ເພື່ອເຕົ້າໂຮມຄວາມສາມັກ ຄີຂອງປະຊາຊົນບັນດາເຜົ່າໃຫ້ມີຄວາມໜັກແໜ້ນ ຊ່ວຍກັນອານຸລັກຮັກສາເອກະລັກ, ວັດທະນະ ທຳອັນດີງາມ ໃຫ້ຍືນຍົງຄົງຕົວຄຽງຄູ່ກັບຄົນລາວ, ກໍ່ຄືຊາວເມືອງທົ່ງມີໄຊຕະຫຼອດໄປ. ເຊິ່ງການຈັດງານແຂ່ງຂັນກອງປື່ງປະຈຳປີໃນງານຄັ້ງນີ້ ມີຈຳນວນກອງທັງໜົດ 13 ໜ່ວຍມາຈາກ 13 ບ້ານ ໃນທົ່ວເມືອງ ການແຂ່ງຂັນມີ ສອງລາຍການຄື: ເອ້ກອງງາມ ແລະ ແຂ່ງຂັນກອງດັງ ເຊິ່ງກອງແຕ່ລະໜ່ວຍໄດ້ມີການປະດັບປະດາຕົກແຕ່ງໃຫ້ສວຍງາມ, ການແຂ່ງຂັນກໍ່ໄດ້ດຳເນີນໄປດ້ວຍບັນຍາກາດທີ່ເບິກບານມ່ວນຊື່ນ  ແລະ ກໍສາມາດສະຫຼຸບຜົນຂອງການແຂ່ງຂັນໄດ້ດັ່ງນີ້: ເອ້ກອງງາມອັນດັບທີ1 ໄດ້ແກ່ບ້ານດອນພູນ, ທີ2 ບ້ານທາດ   ທີ3 ບ້ານແດດ, ທີ4 ບ້ານນາມ່ວງ  ລາງວັນກອງດັງອັນດັບທີ1 ໄດ້ແກ່ບ້ານ ນາມ່ວງ ທີ2 ບ້ານ ແຄ່ນ  ທີ3 ບ້ານ ແດດ ແລະ ທີ4 ບ້ານ ນາໜອກ ຫຼັງຈາກສຳເລັດການແຂ່ງຂັນ ກໍ່ໄດ້ມີການ ມອບໃບກຽດຕິຄຸນ ໃຫ້ຜູ້ທີ່ມີຜົນງານປະກອບສ່ວນທາງດ້ານວັດຖຸປັດໃຈເຂົ້າໃນການແຂ່ງຂັນກອງປື່ງໃນຄັ້ງນີ້ ພ້ອມທັງມອບຂອງຂວັນ ລາງວັນຂອງກອງແຕ່ລະປະເພດນໍາອີກ.

ຂ່າວ: ສິງເພັດ ສຸນາເຄນ