ເນື່ອງໃນໂອກາດສະເຫຼີມສະຫຼອງ ວັນຕ້ານຢາເສບຕິດສາກົນ ຄົບຮອບ 37 ປີ (26 ມິຖຸນາ 1987 ຫາ 26 ມິຖຸນາ 2024)ອົງການປົກຄອງແຂວງບໍ່ແກ້ວ ຮ່ວມກັບເຂດເສດຖະກິດພິເສດສາມຫຼ່ຽມຄໍາ ໄດ້ຈັດງານແຂ່ງຂັນແລ່ນຮາຟມາຣາທອນ ຂຶ້ນໃນຕອນເຊົ້າຂອງວັນທີ 26 ມິຖຸນາ 2024 ທີ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ, ແຂວງ ບໍ່ແກ້ວ ໃຫ້ກຽດເຂົ້າຮ່ວມງານເປີດໂດຍ ທ່ານ ປອ ທອງຈັນ ມະນີໄຊ, ເຈົ້າແຂວງໆບໍ່ແກ້ວ, ທ່ານ ນາງໃບຄໍາຂັດທິຍະ, ທ່ານ ວ່າງເອີ້ປ້າວ ຜູ້ອໍານວຍການໃຫຍ່ ກຸ່ມບໍລິສັດດອກງິ້ວຄໍາ, ມີບັນດາທ່ານລັດຖະມົນຕີ, ຮອງລັດທະມົນຕີ, ຄະນະນໍາຂອງແຂວງ, ບັນດານັກກິລາແລ່ນ-ລານ ທັງພາຍໃນ ແລະ ຕ່າງປະເທດ, ສື່ມວນຊົນ ເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານເຈົ້າແຂວງໆບໍ່ແກ້ວ ໄດ້ໃຫ້ຮູ້ວ່າ: ແຂວງບໍ່ແກ້ວ ເປັນແຂວງໜຶ່ງ ທີ່ມີທີ່ຕັ້ງຢູ່ເຂດຫຼໍ່ແຫຼມ, ກຸ່ມຄົນບໍ່ດີຈໍານວນໜຶ່ງ ໄດ້ສວຍໃຊ້ພື້ນທີ່ຂອງແຂວງບໍ່ແກ້ວເປັນທາງຜ່ານ ໃນການລໍາລຽງຂົນສົ່ງຢາເສບຕິດ, ຫຼາຍປີຜ່ານມາ ພາຍໃຕ້ການຊີ້ນໍາຂອງລັດຖະບານ ແລະ ການເຄື່ອນໄຫວຂອງເຈົ້າໜ້າທີ່ວິຊາສະເພາະ ໂດຍການຮ່ວມມືກັບຫຼາຍພາກສ່ວນທັງພາຍໃນ ແລະ ຕ່າງປະເທດ, ໂດຍສະເພາະແມ່ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ແຂວງບໍ່ແກ້ວພວກເຮົາສາມາດຍາດໄດ້ຜົນສໍາເລັດຫຼາຍດ້ານໃນວຽກງານຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍສະເພາະແມ່ນສາມາດມ້າງຄະດີຢາເສບຕິດຕ່າງໆ ໄດ້ຫຼາຍກໍລະນີ ແລະ ໃນຕໍ່ໜ້າ ພວກເຮົາຍັງຈະສືບຕໍ່ເອົາໃຈໃສ່ແກ້ໄຂຢ່າງຕໍ່ເນື່ອງ, ເຂັ້ມງວດ ແລະ ເດັດຂາດກ່ວາເກົ່າເພື່ອເຮັດໃຫ້ແຂວງບໍ່ແກ້ວ ມີຄວາມສະຫງົບປອດໄພ, ເປັນລະບຽບຮຽບຮ້ອຍ, ຈໍານວນຜູ້ຄ້າຂາຍ, ຜູ້ເສບຢາເສບຕິດນັບມື້ຫຼຸດລົງ ແລະ ກ້າວໄປເຖິງການປາສາຈາກຢາເສບຕິດເທື່ອລະກ້າວ.
ການຈັດງານແຂ່ງຂັນແລ່ນຮາຟມາຣາທອນ ເຊິ່ງຖືວ່າເປັນກິດຈະກຳສໍາຄັນອັນໜຶ່ງຂອງແຂວງ. ໃນໄລຍະຜ່ານມາກໍ່ໄດ້ຈັດການແຂ່ງຂັນມີຜົນສໍາເລັດມາແລ້ວ 3 ຄັ້ງ ແລະ ຄັ້ງນີ້ເປັນຄັ້ງທີ 4. ແມ່ນເພື່ອແນໃສ່ສ້າງໂອກາດເຮັດໃຫ້ທົ່ວສັງຄົມ ໄດ້ເຂົ້າຮ່ວມກິດຈະກໍາທາງດ້ານກິລາກາຍຍະກຳ ໃຫ້ຫຼາຍຂຶ້ນ ເຊິ່ງນອກຈາກຈະເຮັດໃຫ້ກຳລັງກາຍ ແລະ ຈິດໃຈເຂັ້ມແຂງແລ້ວ ຍັງເຮັດໃຫ້ນັກກິລາແລ່ນ-ລານຂອງລາວເຮົາ ໄດ້ມີໂອກາດຮຽນຮູ້ ແລະ ແຂ່ງຂັນກັບນັກແລ່ນ-ລານ ຕ່າງປະເທດ ເພື່ອເປັນການຍົກລະດັບຄວາມສາມາດທາງດ້ານເຕັກນິກ ແລະ ຄະແນນໃຫ້ດີຂຶ້ນ, ຜ່ານການຈັດງານຄັ້ງນີ້ຍັງໄດ້ສ້າງໂອກາດໃຫ້ນັກກິລາກໍ່ຄືບັນດາທ່ານແຂກທີ່ມີກຽດ ທີ່ເຂົ້າຮ່ວມເຫັນໄດ້ເຖິງຜົນສໍາເລັດໃນການສ້າງສາພັດທະນາເສດຖະກິດ-ສັງຄົມຂອງ ແຂວງບໍ່ແກ້ວ ເວົ້າລວມ, ເວົ້າສະເພາະເຂດເສດຖະກິດພິເສດ ສາມຫຼ່ຽມຄໍາ, ທັງສະແດງໃຫ້ເຫັນເຖິງຄວາມຕັດສິນໃຈຂອງພວກເຮົາທຸກຄົນ ທີ່ຈະເຂົ້າຮ່ວມວຽກງານຕ້ານຢາເສບຕິດ.
ການແຂ່ງຂັນໃນຄັ້ງນີ້ ປະກອບມີ 2 ປະເພດໄລຍະທາງ ຄື: ແລ່ນຮາຟມາຣາທອນ 21.1 ກມ ແລະ ແລ່ນໄລຍະສັ້ນ 6.26 ກມ, ລວມມີ 200 ລາງວັນ, ລວມມູນຄ່າລາງວັນຈໍານວນ 1,653,000,000 ກີບ, ລາຍລະອຽດມີປະເພດລາງວັນດັ່ງນີ້: ແລ່ນຮາຟມາຣາທອນ ຍິງ-ຊາຍມີລາງວັນເຖິງ 50 ອັນດັບ: ລາງວັນຊະນະເລີດ ໄດ້ຮັບເງິນ 240,000,000 ກີບ ພ້ອມດ້ວຍຫຼຽນຄໍາ ແລະ ຖ້ວຍລາງວັນ, ອັນດັບທີ 2 ໄດ້ຮັບເງິນ150,000,000 ກີບ ພ້ອມດ້ວຍຫຼຽນເງິນ ແລະ ຖ້ວຍລາງວັນ, ອັນດັບທີ 3 ໄດ້ຮັບເງິນ 90,000,000 ກີບ ພ້ອມດ້ວຍຫຼຽນທອງ ແລະ ຖ້ວຍລາງວັນ, ອັນດັບທີ 4 ໄດ້ຮັບເງິນ 24,000,000 ກີບ, ຫຼຽນທີ່ລະນຶກ ແລະ ໄດ້ຮັບລາງວັນຕາມແຕ່ລະປະເພດຕາມລໍາດັບ; ແລ່ນໄລຍະສັ້ນ ຍິງ-ຊາຍ ມີລາງວັນເຖິງ 50 ອັນດັບ: ລາງວັນຊະນະເລີດ ໄດ້ຮັບເງິນ 24,000,000 ກີບ ພ້ອມດ້ວຍຫຼຽນຄໍາ ແລະ ຂັນລາງວັນ, ອັນດັບທີ 2 ໄດ້ຮັບເງິນ 21,000,000 ກີບ ພ້ອມດ້ວຍຫຼຽນເງິນ ແລະ ຂັນລາງວັນ, ອັນດັບທີ 3 ໄດ້ຮັບເງິນ 18,000,000 ກີບ ພ້ອມດ້ວຍຫຼຽນທອງ ແລະ ຂັນລາງວັນ, ອັນດັບທີ 4 ໄດ້ຮັບເງິນ 12,000,000 ກີບ, ຫຼຽນທີ່ລະນຶກ ແລະ ໄດ້ຮັບລາງວັນຕາມແຕ່ລະປະເພດຕາມລໍາດັບ ເຊິ່ງມີນັກກິລາສາມາດຍາດໄດ້ລາງວັນດັ່ງນີ້: ແລ່ນຮາຟມາຣາທອນ 21.1 ກມ ໄດ້ຮັບລາງວັນຊະນະເລີດ ປະເພດຊາຍທີ 1 ແມ່ນ ທ້າວເຊີນ ຢົງເຊົ່າ ນັກກິລາຈາກປະເທດ ຈີນ, ທີ 2 ທ້າວ ນັດທະວຸດ ອິນນ້ຳ ນັກກິລາຈາກປະເທດໄທ, ທີ 3 ທ້າວ ເຊົ່າ ຊ່າງ ຫົງ ນັກກິລາຈາກປະເທດຈີນ. ສ່ວນປະເພດຍິງ ທີ 1 ແມ່ນ ນາງ ປາມ ທິຫົງ ເລ ນັກກິລາຈາກປະເທດຫວຽດນາມ, ທີ 2 ນາງ ຫວັງ ມີນ, ທີ 3 ນາງ ຢາງ ຊ່ວງ ຫົວ ກິລາຈາກປະເທດຈີນ.
ສຳລັບປະເພດແລ່ນໄລຍະສັ້ນ 6,26 ກມ ປະເພດ ອັນດັບທີ 1 ແມ່ນ ທ້າວ ອະນຸສິດ ປາດາ, ທີ 2 ທ້າວ ຈະຕຸລົງ ຂວັນແກ້ວ ແລະ ທ້າວ ວາຍະພົນ ບຸນນຸປາລາ ນັກກິລາຈາກປະເທດໄທ. ຂະນະທີ່ ປະເພດຍິງ ທີ 1 ແມ່ນ ນາງ ເຢົາ ຢູ ຊຸ່ຍ ນັກກິລາຈາກປະເທດຈີນ, ທີ 2 ນາງ ລົດແກ້ວ ອິນທະກຸມມານ ກິລາຈາກ ສປປ ລາວ ແລະ ທີ 3 ແມ່ນ ນາງ ພຣີກາມົນ ວົງວິໄຊ.
