ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດ ສາຫະກຳ ແຫ່ງຊາດ, ປະທານສະພາທີ່ປຶກສາທຸລະກິດອາຊຽນ 2024 ໄດ້ຖະແຫລງຂ່າວຕໍ່ສື່ມວນຊົນກ່ຽວກັບງານດັ່ງກ່າວ ໃນວັນທີ 20ກັນຍາ 2024 ນີ້ວ່າ: ກອງປະ ຊຸມສຸດຍອດທຸລະກິດ ແລະ ການລົງທຶນອາຊຽນ 2024ທີ່ ສປປ ລາວ ເປັນເຈົ້າພາບ ຈະຈັດຂຶ້ນໃນລະຫວ່າງວັນທີ 8-11 ຕຸລາ 2024 ທີ່ນະຄອນ ຫລວງວຽງຈັນ ໂດຍຈະສຸມໃສ່ປຶກສາຫາລື 6 ຂະແໜງບູລິມະສິດຄື: ການຫັນເປັນດິຈິຕອນ, ການພັດທະນາ ແບບຍືນຍົງ, ການ ຟື້ນຟູດ້ານຂະແໜງການສາທາລະນະສຸກ, ການຄໍ້າປະກັນສະບຽງ ອາຫານ, ການເອື້ອອໍານວຍຄວາມສະດວກດ້ານການຄ້າ- ການ ລົງທຶນ, ການເຊື່ອມໂຍງເຊື່ອມຈອດ ແລະຕ່ອງໂສ້ການສະໜອງຕ່າງໆ.
ນອກນີ້, ຍັງຈະມີ 4 ກອງປະຊຸມປິ່ນອ້ອມຂອງພາກທຸລະກິດ ແລະມອບລາງວັນທຸລະກິດອາຊຽນດີເດັ່ນ 2024 ເຊັ່ນ:ກອງປະຊຸມນັກທຸລະກິດໜຸ່ມອາຊຽນ ຄັ້ງ 9 ໃນຫົວຂໍ້ “ສ້າງອະນາຄົດແບບຍືນຍົງ, ທົ່ວເຖິງ ແລະ ຢຶດຢຸນກວ່າ: ປົດລັອກທ່າແຮງ ວິສາ ຫະກິດແມ່ຍິງໃນອາຊຽນ”; ກອງປະຊຸມການລົງທຶນອາຊຽນ: ໃນຫົວຂໍ້: “ການລົງທືນສໍາລັບ ການປັບປຸງການເຊື່ອມຕໍ່ ແລະ ສ້າງຄວາມເຂັ້ມແຂງ”; ແລະຈະປຶກສາຫາລືສົ່ງເສີມທຸລະກິດຂະແໜງການຂົນສົ່ງທັງພາຍໃນ, ພາກພື້ນອາຊຽນ, ສາກົນ.
ທີ່ມາ: ຫນັງສືພິມເສດຖະກິດ-ສັງຄົມ
