ຕອນເຊົ້າວັນທີ 7 ກໍລະກົດ 2023 ທີ່ສູນກາງສະຫະພັນແມ່ຍິງລາວ ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ໃຫ້ສໍາພາດຕໍ່ສື່ມວນຊົນ ເຖິງກິດຈະກໍາສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວວັນທີ 20 ກໍລະກົດ 1955-20 ກໍລະກົດ 2023 ຄົບຮອບ 68ປີ ໂດຍມີຫລາຍກິດຈະກຳຮ່ວມກັນລະຫວ່າງເອື້ອຍນ້ອງແມ່ຍິງພາຍໃນສຳນັກງານ-ຫ້ອງການ, ກໍຄືສະມາຊິກພາຍໃນຄອບຄົວເພື່ອຮັດແໜ້ນຄວາມສາມັກຄີ, ເພີ່ມພູນຄວາມສຸກ ແລະຄວາມອົບອຸ່ນຂອງຄອບຄົວ.
ທ່ານ ນາງ ສິລິກິດ ບຸບຜາ ໃຫ້ຮູ້ວ່າ: ວັນທີ 20 ກໍລະກົດ ຂອງທຸກໆປີສູນກາງສະຫະພັນແມ່ຍິງລາວ, ສະມາຊິກສະຫະພັນແມ່ຍິງແລະແມ່ຍິງລາວບັນດາເຜົ່າໃນທົ່ວປະເທດໄດ້ພ້ອມໃຈກັນເຂົ້າຮ່ວມສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວເຊິ່ງເປັນອົງການຈັດຕັ້ງມະຫາຊົນໜຶ່ງໃນລະບົບການເມືອງຂອງລະບອບປະຊາທິປະໄຕປະຊາຊົນທີ່ພັກເປັນຜູ້ໃຫ້ກຳເນີດ, ຝຶກຝົນຫຼໍ່ຫຼອມແລະຊຸກຍູ້ສົ່ງເສີມເພື່ອໃຫ້ແມ່ຍິງໄດ້ເຮັດໜ້າທີ່ໃນການເປັນຕົວແທນແຫ່ງສິດຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍຕິດພັນກັບການສຶກສາອົບຮົມເຕົ້າໂຮມຄວາມສາມັກຄີແລະເສີມຂະຫຍາຍສິດເປັນເຈົ້າຂອງແມ່ຍິງລາວປະກອບສ່ວນເຂົ້າໃນພາລະກິດປະຕິວັດກໍຄືພາລະກິດພັດທະນາແມ່ຍິງ, ເອົາໃຈໃສ່ປະຕິບັດສິດສະເໝີພາບຍິງ-ຊາຍແລະປົກປັກຮັກສາມູນເຊື້ອທີ່ເປັນເອກະລັກຂອງແມ່ຍິງລາວໃນໄລຍະໃໝ່.
ສຳລັບປີ 2023ນີ້, ໃນທ່າມກາງບັນຍາກາດທີ່ທົ່ວພັກ, ທົ່ວລັດແລະທົ່ວປວງຊົນລາວທັງຊາດພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIຂອງພັກ, ໄລຍະການດຳເນີນກອງປະຊຸມສະໄໝສາມັນເທື່ອທີ5ຂອງສະພາແຫ່ງຊາດຊຸດທີ IX, ສໍາລັບສູນກາງສະຫະພັນແມ່ຍິງລາວແມ່ນຫາກໍ ສຳເລັດການລົງຊຸກຍູ້ວຽກງານ 3 ຂັ້ນ,ການພັດທະນາແມ່ຍິງຮອບດ້ານ ແລະ ການປະເມີນກົດໝາຍທີ່ຢູ່ໃນຄວາມຮັບຜິດຊອບຂອງສະຫະພັນແມ່ຍິງລາວ ຄື: ກົດໝາຍວ່າດ້ວຍສະຫະພັນແມ່ຍິງລາວ ແລະ ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງຢູ່ບັນດາແຂວງ, ກະຊວງ-ອົງການແລະນະຄອນຫຼວງວຽງຈັນແລະ ກະກຽມດຳເນີນກອງປະຊຸມກາງສະໄໝຂອງອົງຄະນະພັກ ສສຍລ ຊຶ່ງຈະໄດ້ຈັດຂຶ້ນໃນມໍ່ໆນີ້.
ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວກ່າວວ່າ: ເຖິງແມ່ນວ່າການສະເຫຼີມສະຫຼອງວັນທີ 20 ກໍລະກົດປີນີ້ໄຂຂຶ້ນແລະດໍາເນີນໄປໃນທ່າມກາງຄວາມຫຍຸ້ງຍາກທາງດ້ານເສດຖະກິດ-ການເງິນ, ການປະເຊີນກັບການປ່ຽນແປງຂອງດິນຟ້າອາກາດ ແລະ ພະຍາດຕ່າງໆໂດຍສະເພາະພະຍາດໄຂ້ເລືອດອອກ ແລະ ພະຍາດໂຄວິດ-19 ຊຶ່ງສົ່ງຜົນກະທົບຕໍ່ການທໍາມາຫາກິນກໍຄືການແກ້ໄຂຄວາມທຸກຍາກຂອງປະຊາຊົນບັນດາເຜົ່າ.ເຖິງແນວໃດກໍຕາມດ້ວຍມູນເຊື້ອແຫ່ງຄວາມສາມັກຄີແລະຄວາມປີຊາສາມາດສະຫຼາດສ່ອງໃສຂອງພັກລັດຖະບານກໍຄືການນໍາແມ່ຍິງແຕ່ລະຂັ້ນຊີວິດການເປັນຢູ່ຂອງເອື້ອຍນ້ອງແມ່ຍິງກໍຄືປະຊາຊົນລາວບັນດາເຜົ່າຈະໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ.
ປັດຈຸບັນຂະບວນການພັດທະນາແມ່ຍິງແນໃສ່ສົ່ງເສີມຄວາມກ້າວໜ້າແລະປະຕິບັດຄວາມສະເໝີພາບຍິງ-ຊາຍໄດ້ບຸກທະລຸເຂົ້າໃນທຸກຂົງເຂດວຽກງານ; ການເຄົາລົບແລະປະຕິບັດລັດຖະທຳມະນູນ, ກົດໝາຍກໍຄືກົດລະບຽບຂອງສະຫະພັນແມ່ຍິງລາວທີ່ຮັບປະກັນຄວາມສອດຄ່ອງກັບແນວທາງນະໂຍບາຍ, ແຜນພັດທະນາເສດຖະກິດ-ສັງຄົມແຫ່ງຊາດແລະແຜນງົບປະມານແຫ່ງລັດມີຜົນສຳເລັດຢ່າງຕັ້ງໜ້າ, ຄວາມຕື່ນຕົວສະໝັກໃຈເຂົ້າຮ່ວມໃນການຈັດຕັ້ງແລະການເຄື່ອນໄຫວຂອງສະມາຊິກສະຫະພັນແມ່ຍິງລາວແມ່ນມີບັນຍາກາດຟົດຟື້ນເປັນຂະບວນການກວ້າງຂວາງພໍສົມຄວນ, ການຈັດຕັ້ງປະຕິບັດຄຳຂວັນ, ຂໍ້ແຂ່ງຂັນ 3 ດີຕິດພັນກັບຂໍ້ແຂ່ງຂັນຮັກຊາດແລະພັດທະນາ, ການສ້າງບ້ານ 3 ດີຕິດພັນກັບການສ້າງບ້ານພັດທະນາຕາມທິດ 3 ສ້າງເຂົ້າສູ່ລວງເລິກແມ່ນມີຜົນສຳເລັດທີ່ໜ້າເພິ່ງພໍໃຈເຮັດໃຫ້ແມ່ຍິງໄດ້ເຂົ້າເຖິງການບໍລິການດ້ານການສຶກສາ, ສາທາລະນະສຸກແລະແຫຼ່ງທຶນເພື່ອທໍາການຜະລິດເປັນສິນຄ້າຢ່າງທົ່ວເຖິງພ້ອມທັງມີຄຸນນະພາບນັບມື້ນັບຫຼາຍ,ມີຫຼາຍແຂວງໄດ້ປະກາດເປັນແຂວງ 3 ດີ, ເມືອງ 3 ດີແລະບ້ານ 3 ດີດ້ວຍຄວາມພາກພູມໃຈ,ແມ່ຍິງໄດ້ກາຍເປັນກຳລັງສຳຄັນໃນຂົງເຂດທຸລະກິດ, ການຜະລິດເປັນສິນຄ້າ-ການບໍລິການ, ການຊຸກຍູ້ສົ່ງເສີມສີໄມ້ລາຍມື-ວິຊາອາຊີບການຊອກຫາແຫຼ່ງລາຍໄດ້ໃຫ້ແກ່ຄອບຄົວ, ຊຸມຊົນແລະປະກອບສ່ວນໃນການແກ້ໄຂຄວາມທຸກຍາກຢ່າງສົມກຽດ. ສະນັ້ນເພື່ອເຮັດໃຫ້ການສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວໃນປີນີ້ມີຄວາມໝາຍສໍາຄັນ, ມີເນື້ອໃນເລິກເຊິ່ງ, ເປັນຂະບວນການຟົດຟື້ນແລະກວ້າງຂວາງສູນກາງສະຫະພັນແມ່ຍິງລາວຈຶ່ງໄດ້ອອກແຈ້ງການສະບັບເລກທີ 412/ສສຍລກ່ຽວກັບການຈັດຕັ້ງສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວຄົບຮອບ 68ປີ, ແນໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າໃຫ້ມີຄວາມຮັບຮູ້, ເຂົ້າໃຈຕໍ່ມູນເຊື້ ແລະ ການເຄື່ອນໄຫວ ຂອງອົງການຈັດຕັ້ງສະຫະພັນແມ່ຍິງລາວ ໄປຄຽງຄູ່ກັບການປຸກລະດົມສະມາຊິກສະຫະພັນແມ່ຍິງແລະແມ່ຍິງລາວບັນດາເຜົ່າເປັນເຈົ້າການເຂົ້າຮ່ວມພັດທະນາແມ່ຍິງຕາມວິໄສທັດພັດທະນາແມ່ຍິງລາວຮອດປີ 2030, ແຜນຍຸດທະສາດພັດທະນາແມ່ຍິງລາວຮອດປີ 2025, ແຜນພັດທະນາແມ່ຍິງແຫ່ງຊາດ 2021-2025 ແລະ ປະກອບສ່ວນເຂົ້າໃນການປະຕິບັດ 2 ວາລະແຫ່ງຊາດ ໃຫ້ບັນລຸຕາມຄາດໝາຍທີ່ວາງໄວ້; ທັງເປັນການເພີ່ມທະວີຄວາມຮັບຜິດຊອບຂອງຄະນະແລະສະມາຊິກສະຫະພັນແມ່ຍິງໃນການສືບຕໍ່ຈັດຕັ້ງປະຕິບັດຄຳຂວັນແລະຂໍ້ແຂ່ງຂັນ 3 ດີຂອງສະຫະພັນແມ່ຍິງລາວຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາຂອງຂະແໜງການ, ທ້ອງຖິ່ນຕາມທິດ 3 ສ້າງ ຕິດແໜ້ນກັບການສ້າງສ້າງຄອບຄົວແລະບ້ານສະຫະພັນແມ່ຍິງ 3 ດີຕິດພັນກັບການສ້າງບ້ານພັດທະນາຕາມທິດສາມສ້າງໃຫ້ເປັນຂະບວນການກວ້າງຂວາງໃນທົ່ວປະເທດ.
ສໍາລັບກິດຈະກໍາທີ່ຈະຈັດຕັ້ງປະຕິບັດໃນການສະເຫຼີມສະຫຼອງປີນີ້ປະກອບມີ:
1. ການສ້າງຂະບວນການ ຂອງສະຫະພັນແມ່ຍິງລາວໃນແຕ່ລະຂັ້ນ: ຈັດກອງປະຊຸມສຳມະນາ, ປາຖະກະຖາ, ຈັດງານຕະຫຼາດນັດວາງສະແດງສິນຄ້າກະສິກຳ, ຫັດຖະກຳທີ່ເປັນສີໄມ້ລາຍມີແຜງແມ່ຍິງແລະຂອງທ້ອງຖິ່ນ; ກິດຈະກຳຕິດພັນກັບການອະນຸລັກຮັກສາແລະສົ່ງເສີມວັດທະນະທໍາອັນດີງາມຂອງຊາດ, ຂອງແມ່ຍິງລາວ;ສົມທົບກັບພາກສ່ວນກ່ຽວຂ້ອງຈັດຂະບວນການບໍລິຈາກເລືອດເພື່ອຊ່ວຍເຫຼືອສັງຄົມ ແລະ ຈັດຕັ້ງການຢ້ຽມຢາມພະນັກງານປະຕິວັດອາວຸໂສບຳນານ, ອະດີດການນໍາເພດຍິງຕາມຄວາມເໝາະສົມແລະເງື່ອນໄຂຕົວຈິງ.
2. ສຳລັບສູນກາງສະຫະພັນແມ່ຍິງລາວ, ໃນວັນທີ 14ກໍລະກົດ 2023 ຮັບຟັງການໂອ້ລົມໃຫ້ທິດຊີ້ນຳຂອງການນຳຂັ້ນສູງ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 68 ປີພາຍໃຕ້ຫົວຂໍ້“ການສ້າງຄວາມເຂັ້ມແຂງໃຫ້ແມ່ຍິງທາງດ້ານເສດຖະກິດໃນໄລຍະໃໝ່”ແລະ ກິດຈະກຳອື່ນໆ ທີ່ສູນການຮ່ວມມື ແລະ ຝຶກອົບຮົມລາວ-ຍີ່ປຸ່ນ (ICTC) ໂດຍຮ່ວມກັບສະມາຄົມນັກທຸລະກິດຍິງແລະສະມາຄົມຫັດຖະກຳລາວ; ວັນທີ 21 ກໍລະກົດ 2023 ສ້າງຂະບວນການບໍລິຈາກເລືອດເພື່ອຊ່ວຍເຫຼືອສັງຄົມຮ່ວມກັບສູນເລືອດແຫ່ງຊາດອົງການກາແດງລາວພາຍໃຕ້ຄໍາຂວັນ “68 ປີ ມີໄຊໃຫ້ເລືອດໃຫ້ຊີວິດ” ທີ່ສູນການຄ້າລາວ-ໂອເຕັກ ຊຶ່ງຈະເລີ່ມແຕ່ 8:00 ຫາ 16:00 ຈຶ່ງຂໍເຊີນຊວນທຸກທ່ານເຂົ້າຮ່ວມເພື່ອບໍລິຈາກເລືອດຊ່ວຍຊີວິດ.
3. ໃນໄລຍະສະເຫຼີມສະຫຼອງວັນສຳຄັນດັ່ງກ່າວ,ສູນກາງສະຫະພັນແມ່ຍິງລາວຂໍເຊີນຊວນທຸກພາກສ່ວນນຳພາສະມາຊິກສະຫະພັນແມ່ຍິງລາວ-ແມ່ຍິງລາວບັນດາເຜົ່າເອົາໃຈໃສ່ສຶກສາອົບຮົມລູກຫຼານໂດຍການເຂົ້າຢ້ຽມຊົມຫໍມູນເຊື້ອແມ່ຍິງລາວທີ່ສູນອົບຮົມແມ່ຍິງລາວແລະຫ້ອງສິນສາຍໄໝຢູ່ບ້ານຊຽງຍືນຊຶ່ງພວກເຮົາເປີດໃຫ້ເຂົ້າຢ້ຽມຊົມໃນໂມງລັດຖະການ.
ຖືໂອກາດນີ້ຂ້າພະເຈົ້າຂໍແຈ້ງມາຍັງບັນດາທ່ານກໍຄືທົ່ວສັງຄົມຮັບຮູ້ຕື່ມອີກວ່າ ກົດໝາຍວ່າດ້ວຍສະຫະພັນແມ່ຍິງລາວມາດຕາ 48 ໄດ້ກໍານົດເອົາວັນທີ 20 ກໍລະກົດເປັນມື້ສະເຫຼີມສະຫຼອງແລະເປັນວັນພັກລັດຖະການຂອງແມ່ຍິງລາວໃນທົ່ວປະເທດເພື່ອສ້າງກິດຈະກຳຮ່ວມກັນລະຫວ່າງເອື້ອຍນ້ອງແມ່ຍິງພາຍໃນສຳນັກງານ-ຫ້ອງການ, ກໍຄືສະມາຊິກພາຍໃນຄອບຄົວເພື່ອຮັດແໜ້ນຄວາມສາມັກຄີ, ເພີ່ມພູນຄວາມສຸກແລະຄວາມອົບອຸ່ນຂອງຄອບຄົວ.
ນະໂອກາດນີ້ຂ້າພະເຈົ້າຫວັງເປັນຢ່າງຍິ່ງວ່າທຸກພາກສ່ວນໃນສັງຄົມເວົ້າລວມ ເວົ້າສະເພາະສື່ມວນຊົນທີ່ເປັນກະບອກສຽງອັນແຫຼມຄົມຂອງພັກລັດຈະຊ່ວຍເຫຼືອພວກຂ້າພະເຈົ້າໃນການໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ, ເວົ້າສະເພາະແນວທາງນະໂຍບາຍຕໍ່ການພັດທະນາ, ການສົ່ງເສີມຄວາມກ້າວໜ້າຂອງແມ່ຍິງ, ແຜນພັດທະນາແມ່ຍິງ, ແນໃສ່ສ້າງຄວາມສະເໝີພາບລະຫວ່າງຍິງ-ຊາຍໃນຄອບຄົວ, ສັງຄົມແລະປະເທດຊາດກໍຄືການພັດທະນາແມ່ຍິງທາງດ້ານຮ່າງກາຍ, ແນວຄິດຈິດໃຈ, ການສຶກສາ, ວິຊາຊີບແລະສີມືແຮງງານ; ສືບຕໍ່ນໍາເອົາຜົນງານ, ຜົນສໍາເລັດຮອບດ້ານແລະຂະບວນການຂອງແມ່ຍິງລາວເຜີຍແຜ່ຜ່ານພາຫະນະສື່ມວນຊົນຂອງທຸກພາກສ່ວນໃຫ້ເປັນຂະບວນການຟົດຟື້ນກວ້າງຂວາງ. ຂໍຮຽກຮ້ອງມາຍັງອົງການຈັດຕັ້ງທັງພາກລັດ, ເອກະຊົນແລະອົງການຈັດຕັ້ງສາກົນຈົ່ງສືບຕໍ່ໃຫ້ການຮ່ວມມື, ສະໜັບສະໜູນແລະເຂົ້າຮ່ວມໃນຂະບວນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 68ປີຄັ້ງນີ້ໃຫ້ເປັນຂະບວນຟົດຟື້ນ ແລະ ກວ້າງຂວາງ.
ນະໂອກາດອັນມີຄວາມໝາຍສໍາຄັນນີ້້, ຂ້າພະເຈົ້າຕາງໜ້າໃຫ້ຄະນະສະຫະພັນແມ່ຍິງທຸກຂັ້ນ, ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າຂໍສະແດງຄວາມເຄົາລົບແລະຮູ້ບຸນຄຸນຢ່າງສູງຕໍ່ການນໍາພັກ, ສະພາແຫ່ງຊາດແລະລັດຖະບານ, ຊຶ່ງຍາມໃດກໍເອົາໃຈໃສ່ສ້າງທຸກເງື່ອນໄຂໃຫ້ແກ່ການເຕົ້າໂຮມຄວາມສາມັກຄີ, ສຶກສາອົບຮົມບໍາລຸງສ້າງສະມາຊິກສະຫະພັນແມ່ຍິງລາວບັນດາເຜົ່າໃຫ້ມີຄວາມເຕີບໃຫຍ່ຂະຫຍາຍຕົວໃນທຸກດ້ານ. ທັງສ້າງຄວາມເຊື່ອໝັ້ນແລະຖືສໍາຄັນຕໍ່ບົດບາດຂອງແມ່ຍິງໃນການເຂົ້າຮ່ວມປະຕິບັດ 2 ໜ້າທີ່ຍຸດທະສາດປົກປັກຮັກສາແລະສ້າງສາພັດທະນາປະເທດຊາດ.
