ເທສະການອາຫານລາວ 2024 ຈະໄດ້ຈັດຂຶ້ນໃນລະຫວ່າງວັນທີ 23-27ມັງກອນ 2024, ທີ່ສວນເຈົ້າອະນຸວົງ ນະຄອນຫຼວງວຽງຈັນ, ເຊິ່ງພິທີຖະແຫລງຂ່າວກຽມຈັດງານເທສະການອາຫານລາວ 2024 ໄດ້ຈັດຂຶ້ນໃນວັນທີ 9 ມັງກອນ 2024, ທີ່ສະພາການຄ້າ ແລະອຸດສາຫະກຳແຫ່ງຊາດລາວ (ສຄອຊ) ໂດຍໃຫ້ກຽດເຂົ້າຮ່ວມຂອງທ່ານ ລາວັນ ສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ.
ທ່ານນາງ ຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງ, ປະທານຄະນະກຳມະການຈັດງານເທສະການອາຫານລາວຄັ້ງທີ 19 ປະຈຳປີ 2024 ກ່າວວ່າ: ງານຄັ້ງນີ້ ຈະເປີດຂຶ້ນພາຍໃຕ້ຄໍາຂວັນ: “ຊິມອາຫານລາວ ທ່ອງທ່ຽວລາວປີ 2024” (Tasting Lao food visit Laos year 2024). ເພື່ອແນໃສ່ການອະນຸລັກອາຫານພື້ນເມືອງທີ່ເປັນເອກະລັກຂອງລາວ, ພືດຜັກຜົນຜະລິດກະສິກໍາປອດສານພິດໃຫ້ໄດ້ຈໍາໜ່າຍອອກສູ່ສັງຄົມໄດ້ກິນຢູ່ແບບສະອາດ ແລະປອດໄພ.
ທ່ານນາງ ຈັນທະຈອນ ວົງໄຊ ກ່າວຕື່ມວ່າ: ພາຍໃນງານຈະມີຮ້ານອາຫານລາວ, ອາຫານປະຍຸກ ແລະອາຫານ ນາໆຊາດມາວາງຂາຍ ເຖິງ 180 ຮ້ານໃນນັ້ນ ອາຫານເອກກະລັກຈາກທຸກແຂວງໃນທົ່ວປະເທດ ແລະຈາກຜູ້ສະໜັບສະໜູນງານລວມ 165 ຮ້ານ, ຂາຍເຄື່ອງຫັດຖະກໍາ ແລະ ກະສິກໍາ 15 ຮ້ານ. ຄາດຄະເນຈະມີເງິນໝູນວຽນປະມານ 6 ຕື້ກີບ. ນອກຈາກນີ້ຍັງມີກິດຈະກໍາສະແດງສິລະປະພື້ນເມືອງລາວ, ຂາຍອາຫານລາວເອກະລັກຂອງ 18 ແຂວງໃນລາວ, ສາທິດການເຮັດເຂົ້າໜົມລາວ, ສໍາມະນາການບໍລິຫານທຸລະກິດຂະໜາດນ້ອຍ(ການວາງແຜນການຕະຫລາດ), ປະກວດ ແກະສະຫລັກໝາກໄມ້ນາໆພັນ ພ້ອມຂາຍເຂົ້າໜົມແບບລາວໆ, ສະແດງສິລະປະ ພື້ນເມືອງລາວ ແບບມວນຊົນ ແລະ ໄລ້ສົດ(Live)ອາຫານຈາກແຕ່ລະແຂວງ ແລະ ບັນຍາກາດໃນງານທຸກໆວັນ.
