ພິທີເປີດໂຄງການລົບລ້າງພະຍາດແກ່ນຕາຂຸ້ນໃນ ສປປ ລາວ ໂດຍການຊ່ວຍເຫຼືອລ້າ ຈາກມູນນິທິກອງທຶນຊ່ວຍເຫຼືອຊຶ່ງກັນ ແລະ ກັນ (GX FOUNDATION) ຂອງລັດຖະບານ ຈີນ ຈັດຂຶ້ນຕອນເຊົ້າ ວັນທີ 16 ກັນຍາ 2022 ທີໂຮງແຮມແລນມາກ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ຫຼຽງ ເຈິນ ຢິ່ງ ຮອງປະທານສະພາທີ່ປຶກສາການເມືອງແຫ່ງ ສປ ຈີນ, ປະທານ GX FOUNDATION ທ່ານຈ່ຽງ ຈາຍຕຸ່ງ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປຈີນ ປະຈຳ ສປປ ລາວ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະພາກສ່ວນກ່ຽວຂ້ອງ.
ທ່ານສອນໄຊ ສີພັນດອນ ຮອງນາຍົກລັດຖະມົນຕີ ກ່າວວ່າ: ຂ້າພະເຈົ້າ ຕີລາຄາສູງຕໍ່ການຊ່ວຍເຫຼືອອັນລໍ້າຄ່າຂອງ GX FOUNDATIONໃນໄລຍະຜ່ານມາ ບໍ່ວ່າຈະເປັນອຸປະກອນການເເພດ ເຊັ່ນ: ເຄື່ອງຊ່ວຍຫາຍໃຈ, ໜ້າກາກອະນາໄມ, ຊຸດປ້ອງກັນ ແລະ ອື່ນໆໃຫ້ແກ່ລັດຖະບານ ສປປ ລາວເພື່ອໝູນໃຊ້ເຂົ້າໃນການ ຕ້ານການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ລວມທັງການຊ່ວຍເຫລືອໃນການຜ່າຕັດແກ່ນຕາຂຸ້ນໃຫ້ແກ່ ປະຊາຊົນລາວ ໃນຄັ້ງນີ້ ຊຶ່ງເປັນການຊ່ວຍເຫລືອອັນລໍ້າຄ່າ ແລະ ຖືໄດ້ວ່າເປັນການໃຫ້ໂອກາດ ແລະ ອານາຄົດອັນສົດໃສໃຫມ່ໃນການເບິ່ງເຫັນຂອງຜູ້ທີ່ມີບັນຫາດ້ານສາຍຕາ.
ຂ້າພະເຈົ້າ ຂໍຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງ ໄປຍັງພັກ, ລັດຖະບານ ແລະ ປະຊາຊົນ ຈີນ ອ້າຍນ້ອງ ໂດຍສະເພາະແມ່ນ ທ່ານ ປະທານ GX FOUNDATION ພ້ອມດ້ວຍຄະນະ, ສະຫາຍ ຈ້ຽງ ຈາຍຕຸ້ງ ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວທີ່ມີຄວາມຄວາມເປັນຫ່ວງເປັນໃຍ ແລະ ໃຫ້ການຊ່ວຍເຫຼືອອັນລໍ້າຄ່າ ແກ່ລັດຖະບານ ກໍຄື ປະຊາຊົນລາວຂອງພວກຂ້າພະເຈົ້າໃນຄັ້ງນີ້. ການຊ່ວຍເຫຼືອໃນຄັ້ງນີ້ເປັນການສະແດງເຖິງນໍ້າໃຈເອື້ອເຝື້ອ ເພື່ອແຜ່ ຂອງລັດຖະບານ ແລະ ປະຊາຊົນຈີນ ກໍ່ຄືອຳນາດການປົກຄອງເຂດປົກຄອງພິເສດ ຮົງກົງ ໂດຍສະເພາະແມ່ນ GX FOUNDATION ແລະທັງເປັນການສະແດງເຖິງ ການເປັນເພື່ອນມິດສະຫາຍ ອ້າຍນ້ອງ ທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວທີ່ນັບມື້ ນັບໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກເວົ້າລວມ, ເວົ້າສະເພາະແມ່ນ ການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ເຂດປົກຄອງພິເສດ ຮົງກົງ ໃຫ້ແໜ້ນແຟ້ນຍິ່ງໆຂຶ້ນໃນທຸກໆດ້ານ.
ຂ້າພະເຈົ້າເຊື່ອແນ່ວ່າ ປະຊາຊົນລາວຜູ້ທີ່ມີພະຍາດແກ່ນຕາຂຸ້ນທີ່ໄດ້ຮັບການຜ່າຕັດດີແລ້ວຈະມີຊີວິດທີ່ດີຂຶ້ນ, ຈະເປັນການປະກອບສ່ວນອັນສຳຄັນເຂົ້າໃນການລົບລ້າງພະຍາດແກ່ນຕາຂຸ້ນກໍ່ຄືວຽກງານສາທາລະນະສຸກຂອງ ສປປ ລາວ ເພື່ອບັນລຸເປົ້າໝາຍໃນການປັບປຸງຄຸນນະພາບວີຊິດຂອງປະຊາຊົນລາວອີກຂັ້ນໜຶ່ງ ແລະ ກໍ່ເປັນເປົ້າໝາຍຂອງ ພັກ, ລັດຖະບານລາວໃນການສ້າງສາພັດທະນາປະເທດຊາດແບບຢືນຍົງ ແລະ ພ້ອມກັນຜ່ານຜ່າຄວາມຫຍຸ້ງຍາກ ບໍ່ວ່າຈະເປັນດ້ານເສດຖະກິດ, ການເງິນ, ພະລັງງານ, ສາທາລະນະສຸກ ແລະ ອື່ນໆ ຊຶ່ງເປັນສິ່ງທີ່ກຳລັງສ້າງຜົນກະທົບໃນທົ່ວໂລກລວມທັງ ສປປ ລາວ.
ພ້ອມດຽວກັນ, ຂ້າພະເຈົ້າ ເຊື່ອໝັ້ນຢ່າງຫນັກແຫນ້ນວ່າພາຍໃຕ້ການນຳພາອັນສະຫຼາດສ່ອງໃສຂອງ ພັກ ແລະ ລັດຖະບານ ສປ ຈີນ ອັນມີ ສະຫາຍ ສີ ຈີ້ນຜິງ ເປັນແກນກາງ, ປະຊາຊົນຈີນອ້າຍນ້ອງ ກໍ່ຄື ປະຊາຊົນເຂດປົກຄອງພິເສດຮົງກົງ ຈະສາມາດບັນລຸເປົ້າໝາຍໃນການສ້າງຄວາມໄຝຝັນຂອງ ສປ ຈີນ ໄດ້ສຳເລັດຢ່າງແນ່ນອນ, ສາມາດເອົາຊະນະການເເຜ່ລະບາດຂອງພະຍາດໂຄວິດ-19ແລະ ຟື້ນຟູ ເສດຖະກິດ-ສັງຄົມໄດ້ໂດຍໄວ.
ອວຍພອນໃຫ້ແກ່ການກະກຽມຈັດກອງປະຊຸມໃຫຍ່ຄັ້ງທີ 20 ຂອງພັກກອມມູນິດຈີນ ທີ່ຈະຈັດຂຶ້ນໃນວັນທີ 16 ຕຸລາ 2022 ທີ່ຈະມາເຖິງນີ້ ຈົ່ງປະສົບຜົນສຳເລັດຕາມລະດັບຄາດໝາຍທຸກປະການ.
ມູນນິທິ GX ເເມ່ນໂຄງການ ທີ່ບໍ່ຫວັງຜົນກໍາໄລຂອງ ຈີນ ສ້າງຕັ້ງຂື້ນ ໃນເຂດປົກຄອງພິເສດ ຮົງກົງ ສປປ ຈີນ ເພື່ອໃຫ້ການຊ່ວຍເຫລືອ ທາງດ້ານການແພດ ເເລະ ສາທາລະນະສຸກສາກົນ ແກ່ປະເທດ ທີ່ຢູ່ໃນຫນື່ງເເລວທາງໜື່ງເສັ້ນທາງ, ໃນເບື້ອງຕົ້ນ ທາງມູນນິທິ ຈະດຳເນີນ ໂຄງການໃນກາງປີ 2020 ເເຕ່ເນື່ອງຈາກສະພາບການຜ່ລະບາດ ຂອງພະຍາດ ໂຄວິດ ຈື່ງເຮັດໃຫ້ໂຄງການບໍ່ສາມາດດຳເນີນກິດຈະກຳໄດ້, ດັ່ງນັ້ນ ເພື່ອສືບຕໍ່ຄວາມມຸ້ງຫມັ້ນໃຫ້ກັບລັດຖະບານລາວ ເເລະ ປະຊາຊົນລາວ ທາງມູນນິທິ ໄດ້ຮ່ວມກັບກະຊວງສາທາລະນະສຸກ ສູນປິ່ນປົວຕາ ເເລະ ບັນດາ ຄູ່ຮ່ວມງານພາກສ່ວນທີ່ກ່ຽວຂ້ອງ ໃນການກະກຽມໂຄງການໂດຍໄດ້ສົ່ງທີມເເພດຊຸດທຳອິດ ເຂົ້າມາເລີ່ມປະຕິບັດກິດກະຈໍາໃນວັນທີ 16 ກັນຍາ 2022 ໂດຍມີທີມເເພດທີ່ຊ່ຽວຊານດ້ານຜ່າຕັດຕາ, ພ້ອມທັງຮັກສາ ເເລະ ປິ່ນປົວພະຍາດແກ່ນຕາຂຸ້ນ ໃຫ້ໄດ້ຈໍານວນຫລາຍກວ່າ 10,000 ກໍລະນີ ຂອງຄົນເຈັບທີ່ເປັນພະຍາດແກ່ນຕາຂຸ້ນ ຢູລາວພາຍໃນໄລຍະເວລາ 3 ປີ ເຊິ່ງເບື້ອງຕົ້ນຈະເລີ່ມຢູ່ໂຮງໝໍ103 ກອງທັບປະຊາຊົນລາວ ຈາກນັ້ນຈຶ່ງຈະຂະຫຍາຍໄປພາກເໜືອ ແລະພາກໃຕ້ຂອງລາວ ຄາດຄະເນ ຈະໃຊ້ງົບປະມານໂຄງການ 2022 -2025 ປະມານ 3.260.468 ໂດລາສະຫະລັດ
