ນາງ ອໍລະໄທ ສັນຕິຄົງຄາ ຮອງປະທານ ສະຫະພັນປິ່ງປ່ອງແຫ່ງຊາດລາວ ໃຫ້ຮູ້ໂອກາດຖະແຫລງຂ່າວລາຍງານຄວາມພ້ອມໃນການເປັນເຈົ້າພາບຈັດງານແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ2024(WTTyouth contender2024) ທີ່ລາວເຮົາໄດ້ຮັບກຽດເປັນເຈົ້າພາບ ຈັດຂຶ້ນລະຫວ່າງວັນທີ 18-21 ກັນຍາ 2024 ທີ່ສູນການຄ້າ ລາວ-ໄອເຕັກ, ນະຄອນຫຼວງວຽງຈັນວ່າ: ການໄດ້ຮັບກຽດເປັນເຈົ້າພາບຈັດການແຂ່ງຂັນປິ່ງປ່ອງຊາວໜຸ່ມເຍົາວະຊົນໂລກ2024(WTT youth contender)ໃນຄັ້ງນີ້ກໍ່ເນື່ອງມາຈາກວ່າສະຫະພັນກິລາປິ່ງປ່ອງແຫ່ງຊາດລາວໄດ້ປະສົບຜົນສໍາເລັດໃນການເປັນເຈົ້າພາບຈັດການແຂ່ງຂັນປິ່ງປ່ອງສາກົນຫຼາຍຄັ້ງເປັນທີ່ຍອມຮັບ ແລະໄວ້ວາງໃຈຈາກສາກົນ.
ການໄດ້ຮັບມອບໝາຍໃຫ້ຈັດງານແຂ່ງຂັນໃນຄັ້ງນີ້, ນອກຈາກຈະເປັນການປະຕິບັດໜ້າທີ່ທາງດ້ານການເມືອງ ແລະວິຊາສະເພາະຂອງສະຫະພັນກິລາປິ່ງປ່ອງແຫ່ງຊາດລາວໃນນາມສະມາຊິກສະຫະພັນກິລາປິ່ງປ່ອງສາກົນແລ້ວຍັງເປັນການຍົກລະດັບຄວາມຮູ້ ຄວາມສາມາດ ຂອງບຸກຄະລາກອນຝ່າຍຕ່າງໆ ຂອງສະຫະພັນກິລາປິ່ງປ່ອງແຫ່ງຊາດລາວໃຫ້ດີຂຶ້ນກວ່າເດີມ ແລະ ທັງເປັນການກະຕຸ້ນເສດຖະກິດ ແລະສົ່ງເສີມການທ່ອງທ່ຽວລາວອີກດ້ວຍ.
ທ່ານນາງ ອໍລະໄທ ສັນຕິຄົງຄາ ໃຫ້ຮູ້ອີກວ່າ: ການຈັດການແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ 2024 ມີກຳມະການເຕັກນິກ, ຄະນະນໍາ ແລະນັກກິລາຈາກ 17 ປະເທດ ທັງໝົດ 200ກວ່າຄົນເຂົ້າຮ່ວມ ໂດຍທໍາການແຂ່ງຂັນ 2ປະເພດຄື: ປະເພດດ່ຽວ ແລະຄູ່ປະສົມ, ມີ5ລາຍການດ່ຽວຍິງ ແລະດ່ຽວຊາຍ ອາຍຸບໍ່ເກີນ 11ປີ, 13ປີ, 15ປີ, 17ປີ ແລະ19 ປີ ແລະ 2ລາຍການຄູ່ປະສົມ ລຸ້ນອາຍຸບໍ່ເກີນ 15 ປີ ແລະ 19ປີ, ລວມມີ 32ລາງວັນ.
ປະຈຸບັນ ຄະນະຮັບຜິດຊອບການແຂ່ງຂັນ ໄດ້ປະສານສົມທົບ ກັບ ປກສ ເມືອງໄຊເສດຖາ ແລະ ປກສ ນະຄອນຫຼວງວຽງຈັນ ເພື່ອກະກຽມຈັດວາງກຳລັງຮັກສາຄວາມສະຫງົບຢູ່ສະຖານທີ່ພັກເຊົາ ແລະສະຖານທີ່ແຂ່ງຂັນ ເພື່ອອຳນວຍຄວາສະດວກດ້ານຕ່າງໆໃຫ້ແກ່ຜູ້ເຂົ້າຮ່ວມແຂ່ງຂັນໃນຄັ້ງນີ້.
