ອຸບັດຕິເຫດຕາມທ້ອງຖະໜົນທີ່ມີທ່າອ່ຽງເພີ່ມຂຶ້ນ, ເຮັດໃຫ້ເກີດຄວາມເສຍຫາຍຕໍ່ຊີວິດ ແລະ ຊັບສິນຂອງປະຊາຊົນ ແມ່ນບັນຫາໜຶ່ງທີ່ສະມາຊິກສະພາແຫ່ງຊາດໃຫ້ຄວາມສົນໃຈຊັກຖາມຕໍ່ພາກສ່ວນທີ່ກ່ຽວຂ້ອງຈະມີວິທີການແກ້ໄຂແນວໃດ ໃນຕໍ່ໜ້າ ແລະ ຍາວນານ.
ຕໍ່ບັນຫານີ້ ພົນເອກ ວິໄລ ຫລ້າຄໍາຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງ ປ້ອງກັນຄວາມສະຫງົບ ໄດ້ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 14 ມິຖຸນາ 2024 ວ່າ: ອຸບັດຕິເຫດຕາມທ້ອງຖະໜົນທີ່ມີທ່າອ່ຽງເພີ່ມຂຶ້ນ ເກີດຈາກຫຼາຍສາເຫດ; ໂດຍປະຕິບັດຕາມແຜນຍຸດທະສາດແຫ່ງຊາດ ດ້ານຄວາມປອດໄພທາງຫຼວງ ທີ່ປະກອບມີ 5 ເສົາຄໍ້າ ຄື: ການຄຸ້ມຄອງຄວາມປອດໄພທາງ ຫຼວງ: ມີຄະນະກຳມະການຄວາມປອດໄພຂັ້ນສູນກາງ ແລະ ຂັ້ນແຂວງ. ເສັ້ນທາງປອດໄພ (ພື້ນຖານໂຄງລ່າງ) ໃຫ້ມີຄວາມປອດໄພ ເພື່ອການເດີນທາງທີ່ປອດໄພ, ກຳນົດມາດຕະຖານເຕັກນິກຂອງຍານພາຫະນະ ແລະ ນໍາໃຊ້ຍານພາຫະນະທີ່ປອດໄພ ສ້າງແຜນງານນິຕິກຳ, ປູກຈິດສໍານຶກການຂັບຂີ່ປອດໄພ ແລະ ການບັງຄັບໃຊ້ກົດໝາຍ ແລະ ການຊ່ວຍເຫລືອສັງຄົມ.
ໃນນີ້, ສະເພາະການປະຕິບັດຕາມເສົາຄໍ້າທີ 4, ກະຊວງປ້ອງກັນຄວາມສະຫງົບ ກໍ່ຄືບັນດາກົມວິຊາສະເພາະ, ພວກເຮົາ ແມ່ນໄດ້ເຮັດວຽກງານປະສານສົມທົບກັບກະຊວງໂຍທາທິການ ແລະ ຂົນສົ່ງ ໃນການລົງເຄື່ອນໄຫວໂຄສະນາຕາມສຳນັກງານ, ອົງການ, ໂຮງຮຽນ, ກຸ່ມບ້ານ ແລະ ບໍລິສັດຕ່າງໆ; ນອກນັ້ນ, ຍັງໄດ້ໂຄສະນາຜ່ານສື່ໂທລະພາບ, ສື່ສັງຄົມອອນລາຍ, ວິທະຍຸກະຈາຍສຽງ, ປ້າຍໂຄສະນາຕາມເສັ້ນທາງສັນຈອນ; ທັງຈັດຕັ້ງຝຶກອົບຮົມບັນຫາດັ່ງກ່າວໃຫ້ເຈົ້າໜ້າທີ່ຕຳຫຼວດຈະລາຈອນທາງບົກ ຕາມງົບປະມານທີ່ລັດຖະບານຈັດແບ່ງໃຫ້; ໄປພ້ອມນີ້, ເຈົ້າໜ້າທີ່ຍັງໄດ້ປະຕິບັດວຽກງານກວດກາຕໍ່ຜູ້ໃຊ້ລົດ, ໃຊ້ຖະໜົນ; ໂດຍໄດ້ປະຈຳການປ້ອມ, ຕັ້ງຈຸດກວດກາ ຕາມເສັ້ນທາງຫຼວງແຫ່ງຊາດ, ເສັ້ນທາງນະຄອນຫຼວງ, ແຂວງ ແລະ ເມືອງ ເປັນປົກກະຕິ ທັງສຸມໃສ່ບັນດາວັນບຸນປະເພນີສໍາຄັນຕ່າງໆ; ຜ່ານການກວດກາຕົວຈິງ ເຫັນວ່າຍັງມີການລະເມີດກົດລະບຽບຈະລາຈອນທາງບົກຈໍານວນຫລາຍ ແລະ ເພີ່ມຂຶ້ນຢ່າງຕໍ່ເນື່ອງ.
ພົນເອກ ວິໄລ ຫລ້າຄໍາຟອງ ໃຫ້ຮູ້ຕື່ມວ່າ: ສໍາລັບມາດຕະການແກ້ໄຊບັນຫາອຸບັດຕິເຫດຕາມທ້ອງຖະໜັນໃນຕໍ່ໜ້າ ແລະ ຍາວນານ ກະຊວງ ປສກ ຈະສຸມໃສ່ 3 ມາດຕະການສໍາຄຫນ ຄື: ເພິ່ມທະວີການປະຕິບັດຕາມແຜນຍຸດທະສາດແຫ່ງຊາດ ດ້ານຄວາມປອດໄພທາງຫຼວງ ໄລຍະ 2021-2030 ແລະ ແຜນດໍາເນີນງານ ໄລຍະ 2021-2025, ເພີ່ມທະວີການໂຄສະນາເຜີຍແຜ່, ແນະນໍາຜູ້ໃຊ້ລົດ, ໃຊ້ຖະໜົນດ້ວຍຫຼາຍຮູບ, ຫຼາຍວິທີ ຢ່າງກວ້າງຂວາງ ໂດຍປະສານສົມທົບກັບພາກສ່ວນກ່ຽວຂ້ອງ ແລະ ເພີ່ມທະວີການເຮັດວຽກງານກວດກາບັງຄັບໃຊ້ກົດໝາຍຢ່າງເຂັ້ມງວດ ຕໍ່ຜູ້ທີ່ລະເມີດຢ່າງຕໍ່ເນື່ອງ, ເປັນປົກກະຕິ.
