ກອງປະຊຸມສາທາລະນະສຸກທົ່ວປະເທດຄັ້ງທີ VIII ພາຍໃຕ້ຫົວຂໍ້ຍົກສູງຄຸນນະພາບການບໍລິການສຸຂະພາບ ຈັດຂຶ້ນຕອນເຊົ້າວັນທີ 28 ມັງກອນ 2021 ທີ່ສູນການຮ່ວມມືສາກົນ ແລະຝຶກອົບຮົມ ນະຄອນຫລວງຽງຈັນ ໂດຍການເຂົ້າຮ່ວມ ແລະເປັນປະທານ ຂອງທ່ານບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫລວງ, ຫົວໜ້າພະແນກສາທາລະນະສຸກແຂວງ ທົ່ວປະເທດ , ພະນັກງານອາວຸໂສບໍານານ, ຄູ່ຮ່ວມພັດທະນາ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ກ່າວໃນກອງປະຊຸມວ່າ: ກອງປະຊຸມພວກເຮົາຈະໄດ້ທົບທວນບັນດາຜົນສຳເລັດ ແລະ ສິ່ງທ້າທາຍຕ່າງໆໃນໄລຍະຜ່ານມາ, ຈາກທ້າຍປີ 2019 ແລະ 2020 ເຫັນວ່າ ພວກເຮົາໄດ້ປະເຊີນໜ້າກັບສິ່ງທີ່ທ້າທາຍຫລາຍປະການ, ເປັນຕົ້ນການລະບາດຂອງພະຍາດໂຄວິດ19 ໄດ້ເຮັດໃຫ້ຜູ້ຄົນເຈັບເປັນ ແລະ ເສຍຊີວິດຈຳນວນຫຼາຍໃນທົ່ວໂລກ, ຢູ່ປະເທດພວກເຮົາເຖິງວ່າຈະຄວບຄຸມບໍ່ໃຫ້ເກີດການລະບາດໃຫຍ່ໄດ້ ຖ້າສົມທຽບໃສ່ປະເທດໃກ້ຄຽງ, ແຕ່ກໍ່ຍັງມີຄວາມສ່ຽງສູງຢູ່; ພະຍາດໄຂ້ຍຸງລາຍ ແລະ ພະຍາດຕິດຕໍ່ອຶ່ນໆ ກໍ່ຍັງມີການລະບາດຢູ່ນະຄອນຫຼວງ ແລະ ບາງແຂວງ ແລະ ໄພທໍາມະຊາດໄດ້ເກີດຂື້ນຢ່າງຕໍ່ເນື່ອງ. ທັງໝົດນີ້ໄດ້ເປັນອຸປະສັກອັນໃຫ່ຍຫລວງ ຕໍ່ການພັດທະນາ ແລະສ້າງສາປະເທດຊາດ ເວົ້າສະເພາະການປະຕິບັດວຽກງານຂອງຂະແໜງ ການສາທາລະນະສຸກ.
ໃນໄລຍະ 5 ປີ ຜ່ານມາ ຂະແໜງການສາທາລະນະສຸກ ໄດ້ຜັນຂະຫຍາຍເນື້ອໃນ, ຈິດໃຈມະຕິກອງປະຊຸມໃຫຍ່ຄັ້ງທີ X ຂອງພັກ ໂດຍກຳນົດແຜນຍຸດທະສາດປະຕິຮູບສາທາລະນະສຸກ ໄລຍະ II (2016 – 2020) ເລັ່ງໃສ່ 5 ຂົງເຂດບຸລິມະສິດ ໃນການພັດທະນາຊັບພະຍາກອນມະນຸດ, ການເງິນສາທາລະນະສຸກ, ການຄຸ້ມຄອງບໍລິຫານ, ການບໍລິການສຸຂະພາບ ແລະ ຂໍ້ມູນຂ່າວສານສາທາລະນະສຸກ ພ້ອມຈັດຕັ້ງແຜນພັດທະນາສາທາລະນະສຸກ 5 ປີຄັ້ງທີ VIII ຊຶ່ງປະກອບດ້ວຍ 8 ແຜນງານ, 42 ແຜນງານຍ່ອຍ ແລະ 97 ໂຄງການ ຊຶ່ງທັງໝົດ ເພື່ອບັນລຸ 11 ຕົວຊີ້ບອກ ທີ່ສະພາແຫ່ງຊາດໄດ້ຮັບຮອງ. ພ້ອມນັ້ນ ຈະໄດ້ຕີລາຄາການຄວບຄຸມ ແລະ ໂຕ້ຕອບກັບການລະບາດຂອງພະຍາດ ໂຄວິດ-19 ປີ 2020.
ສະນັ້ນ, ການເຂົ້າຮ່ວມຂອງຜູ້ແທນແຕ່ລະທ້ອງຖິ່ນ ແມ່ນສຸດທີ່ສຳຄັນ ເພາະພວກທ່ານຈະໄດ້ຊ່ວຍປະກອບຄຳເຫັນ ໃສ່ບົດສະຫລຸບ, ແຜນພັດທະນາສາທາລະນະສຸກ ແລະ ຊ່ວຍຊີ້ນຳການຈັດຕັ້ງປະຕິບັດແຜນດັ່ງກ່າວໃນແຕ່ລະຂັ້ນໃຫ້ດີຂື້ນ.
ນອກຈາກນັ້ນ, ຜູ້ແທນທີ່ເຂົ້າຮ່ວມກອງປະຊຸມຍັງໄດ້ຮັບຟັງການປະກອບຄໍາຄິດຄໍາເຫັນຈາກທ້ອງຖິ່ນຕ່າງໆ ເປັນຕົ້ນບົດຮຽນການຕອບໂຕ້ ການລະບາດຂອງພະຍາດໂຄວິດ19 ປີ 2020 ແລະແຜນການ ໃນຕໍ່ໜ້າ, ບົດຮຽນການຈັດຕັ້ງປະຕິບັດຕອບໂຕ້ໄພພິບັດ ແລະການຊ່ວຍເຫລືອຜູ້ປະສົບເຄາະຮ້າຍ, ການຈັດຕັ້ງປະຕິບັດວຽກງານແຜນການ ແລະຈັດສັນງົບປະມານໃຫ້ແຂວງ, ເມືອງ ແລະໂຮງໝໍນ້ອຍ. ກອງປະຊຸມສາທາລະນະສຸກທົ່ວປະເທດຄັ້ງທີ VIII ດໍາເນີນເປັນເວລາ 2ວັນ. ຄືວັນທີ 28 ແລະ29 ມັງກອນ 2021.
ໂດຍ: ເຂີຍຫລ້າ
Loading...