ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຈັດກອງປະຊຸມເປີດກ້ວາງ ວຽກງານກວດສອບແຫ່ງລັດປະຈຳປີ 2019:

ໃນ ວັນທີ 17 ກຸມພາ 2020, ທີ່ໂຮງແຮມດອນຈັນພາເລດ ນະຄອນ ຫລວງວຽງຈັນ, ກອງປະຊຸມເປີດກ້ວາງວຽກງານກວດສອບງົບປະມານແຫ່ງລັດປະຈໍາປີ 2019 ຂອງອົງການກວດສອບແຫ່ງລັດ ໄດ້ຖືກຈັດຂື້ນພາຍໃຕ້ການເປັນປະທານຂອງທ່ານນາງ ວຽງທອງ ສີພັນດອນ, ປະທານອົງການກວດສອບແຫ່ງລັດ, ຊຶ່ງມີຕາງໜ້າອົງການກວດສອບປະຈຳພາກເໜືອ, ພາກໃຕ້ ແລະ ພາກກາງ, ລວມທັງ ຈາກບັນດາກະ ຊວງ, ແຂວງ ແລະ ພະນັກງານຫລັກແຫລ່ງຂອງອົງການກວດສອບແຫ່ງລັດເຂົ້າຮ່ວມ.

ໃນໂອກາດນີ້, ທ່ານນາງ ວຽງທອງ ສີພັນດອນ ຊີ້ໃຫ້ເຫັນວ່າ: ກອງປະຊຸມຄັ້ງນີ້ຈະໄດ້ຄົ້ນຄວ້າປຶກສາຫາລືຫລາຍບັນຫາສຳຄັນ, ເປັນຕົ້ນແມ່ນ ບົດລາຍງານການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການປະຈຳປີ 2020, ບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018. ນອກນີ້, ກອງປະຊຸມຍັງຈະໄດ້ທົບທວນຜົນການກວດສອບຄືນການປັບປຸງແກ້ໄຂມາດຕະການແນະນໍາຜົນກວດສອບ ຕາມມະຕິສະພາແຫ່ງຊາດ ແລະ ບົດແຈ້ງຜົນການກວດສອບ, ບົດລາຍງານຂອງບັນດາອົງການກວດສອບປະຈຳພາກທີ່ໄດ້ພະຍາຍາມເຮັດວຽກກວດສອບສຳເລັດທັງໝົດ 104 ເປົ້າໝາຍ, ລວມເຖິງບັນດາສີ່ງທ້າທາຍຕ່າງໆທີ່ຕ້ອງສືບຕໍ່ປັບປຸງແກ້ໄຂໃນຕໍ່ໜ້າ, ໂດຍສະເພາະບັນຫາຫົວໜ່ວຍງົບປະມານ 15 ກະຊວງ ແລະ 18 ແຂວງ-ນະຄອນຫລວງທີ່ຍັງມີການລະເມີດວິໃນແຜນການ ແລະ ການເງິນ, ໂດຍສະເພາະແມ່ນການເກັບລາຍຮັບໃນຂົງເຂດພາສີອາກອນ, ໃນຂະນະທີ່ການຄຸ້ມຄອງລາຍຮັບໃນລະບົບງົບປະມານກໍ່ຍັງມີໜີ້ຕ້ອງຮັບ ແລະ ບັນຫາອື່ນໆ.

ກອງປະຊຸມເປີດກ້ວາງວຽກງານກວດສອບງົບປະມານແຫ່ງລັດປະຈໍາປີ 2019 ຂອງອົງການກວດສອບແຫ່ງລັດ ຈະດຳເນີນໄປຮອດວັນທີ 18 ກຸມພາ 2020 ຈີ່ງສຳເລັດ ຊື່ງຈະໄດ້ຮັບຟັງການໂອ້ລົມຈາກທ່ານ ພັນຄຳ ວິພາວັນ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະ ທານປະເທດ ເພື່ອເປັນທິດນໍາໃຫ້ອົງການກວດສອບແຫ່ງລັດສືບຕໍ່ຈັດຕັ້ງປະຕິບັດວຽກງານໃນຕໍ່ໜ້າໃຫ້ມີປະສິດທິຜົນຍີ່ງຂື້ນ.