ຕອນບ່າຍວັນທີ 20 ພະຈິກ 2023ນີ້ ກອງປະຊຸມສົນທະນາລະຫວ່າງສື່ມວນຊົນລາວ-ຈີນພາຍໃຕ້ຫົວຂໍ້ “ໜຶ່ງແລວໜຶ່ງເສັ້ນທາງ” ໄດ້ຈັດຂຶ້ນຢູ່ໂຮງແຮມແລນມາກ ນະຄອນຫຼວງວຽງຈັນ ໂດຍມີວິຊາການຈາກກະຊວງຖະແຫຼງຂ່າວວັດທະນະທຳແລະທ່ອງທ່ຽວລາວ, ວິທະຍຸໂທລະພາບສູນກາງຈີນ ພ້ອມກັບສື່ມວນຊົນສຳຄັນຕ່າງໆຂອງລາວໄດ້ແລກປ່ຽນຄຳເຫັນກັນຢ່າງເລິກເຊິ່ງໂດຍປິ່ນອ້ອມຫົວຂໍ້ກ່ຽວກັບໜ້າທີ່ຮັບຜິດຊອບຂອງສື່ມວນຊົນພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເຊິ່ງຜູ້ຮ່ວມປະຊຸມເປັນເອກະພາບກັນເຫັນວ່າ, ລາວ-ຈີນ ໃນຖານະເປັນປະເທດບ້ານໃກ້ຄຽງທີ່ມີສາຍພູສາຍນ້ຳຕິດຈອດກັນ ຈະກາຍເປັນຄູ່ຮ່ວມຊາຕະກຳທີ່ມີເສັ້ນທາງໄປມາຫາສູ່ກັນ, ປະຊາຊົນມີຄວາມສະໜິດສະໜົມ ແລະເຂົ້າໃຈເຊິ່ງກັນແລະກັນ ໂດຍຜ່ານຈາກການສ້າງສາໜຶ່ງແລວໜຶ່ງເສັ້ນທາງ” ຮ່ວມກັນ. ສື່ມວນຊົນສອງປະເທດລາວ-ຈີນ ຈະລົງເລິກການຮ່ວມມືກັນເພື່ອເພີ່ມພະລັງແຮງໃໝ່ເຂົ້າໃນ “ໜຶ່ງແລວໜຶ່ງເສັ້ນທາງ”.
ທ່ານໂພສີ ແກ້ວມະນີວົງ ຮອງລັດຖະມົຕີກະຊວງຖະແຫຼງຂ່າວວັດທະນະທຳແລະທ່ອງທ່ຽວລາວ ແລະທ່ານຫູຈິ້ງຈຸ່ນ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນໄດ້ເຂົ້າຮ່ວມກອງປະຊຸມສົນທະນາດັ່ງກ່າວ ແລະໄດ້ປະກອບຄຳເຫັນອັນສຳຄັນ.
ທ່ານໂພສີແກ້ວມະນີວົງກ່າວວ່າ, ການຈັດກອງປະຊຸມສົນທະນາໃນຄັ້ງນີ້ຂຶ້ນໂດຍດຳເນີນການແລກປ່ຽນ ແລະການຮ່ວມມືຢ່າງເລິກເຊິ່ງໂດຍປິ່ນອ້ອມຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ນັ້ນກໍເປັນການຈັດຕັ້ງປະຕິບັດຄວາມຮັບຮູ້ ທີ່ເປັນເອກະພາບກັນລະຫວ່າງຜູ້ນຳສອງປະເທດແລະສັນຍາລະຫວ່າງສອງພາກສ່ວນພວກເຮົາຢ່າງເປັນຮູບປະທຳ. ພວກເຮົາມີຄວາມຫວັງເປັນຢ່າງຍິ່ງວ່າ ບົນພື້ນຖານຈຸດເລີ່ມຕົ້ນທີ່ສູງໃນປັດຈຸບັນ, ຈະໄດ້ລົງເລິກການຮ່ວມມືກັບວິທະຍຸໂທລະພາບສູນກາງຈີນ, ຊົມໃຊ້ຂໍ້ມູນຂ່າວສານຮ່ວມກັນ, ແລກປ່ຽນໃນດ້ານບຸກຄະລາກອນ, ຮັກສາການຕິດຕໍ່ ພົວພັນໃນຂົງເຂດຕ່າງໆ ເຊັ່ນ: ວິທະຍຸ, ໂທລະພາບ ແລະໜັງສືພິມເປັນຕົ້ນ, ຍົກລະດັບການຮ່ວມມືໃຫ້ສູງຂຶ້ນ.
ໃນເວລາປະກອບຄຳເຫັນ, ທ່ານຫູຈິ້ງຈຸ່ນ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ກ່າວວ່າ: ຫວ່າງກ່ອນນີ້ບໍ່ດົນ, ໃນກອງປະຊຸມສຸດຍອດເວທີເປິກສາຫາລືການຮ່ວມມືສາກົນ ”ໜຶ່ງແລວໜຶ່ງເສັ້ນທາງ” ຄັ້ງທີ 3, ທ່ານສີຈິ້ນຜິງ ປະທານປະເທດຈີນ ແລະທ່ານທອງລຸນສີສຸລິດ ປະທານປະເທດ ແຫ່ງ ສປປ ລາວ ໄດ້ຮ່ວມກັນລົງນາມໃນ “ແຜນການດຳເນີນການວ່າດ້ວຍການສ້າງຄູ່ຮ່ວມຊາຕາກຳຈີນ-ລາວ”, ສ້າງໂອກາດສຳຄັນໃຫ້ແກ່ການລົງເລິກການຮ່ວມມືຂົງເຂດສື່ມວນຊົນ.ໃນຖານະເປັນຜູ້ປະກອບການສື່ມວນຊົນໃນຍຸກໃໝ່, CMG ຍິນດີຮ່ວມກັບບັນດາໝູ່ຮ່ວມງານ ແລະບັນດາເພື່ອນມິດ, ເພີ່ມແຮງຂັບເຄື່ອນໃໝ່ເຂົ້າໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ,ປະກອບສ່ວນຫຼາຍກວ່າເກົ່າເຂົ້າໃນການລົງເລິກສາຍພົວພັນແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບລາວ. ສືບຕໍ່ສ້າງເວທີສົນທະນາແລະແລກປ່ຽນອະລິຍະທຳແບບຂ້າມພາກພື້ນ ແລະເຄົາລົບຄວາມແຕກຕ່າງດ້ານອະລິຍະທຳ, ຊຸກຍູ້ການເຊື່ອມໂຍງຈິດໃຈປະຊາຊົນ, ຮ່ວມແຮງຮ່ວມໃຈກັນ, ປະກອບສ່ວນເຂົ້າໃນການແລກປ່ຽນອະລິຍະທຳລະຫວ່າງຈີນແລະລາວ.
ໃນກອງປະຊຸມ, ຜູ້ຕາງໜ້າສື່ມວນຊົນຝ່າຍລາວ ທ່ານຄຳຜຸຍ ພິລາ ພະຫົວໜ້າບັນນາທິການໃຫຍ່ສຳນັກຂ່າວສານປະເທດລາວ, ທ່ານອຳຄາ ວົງໝື່ນກ້າ ຜູ້ອຳນວຍການໃຫຍ່ໂທລະພາບແຫ່ງຊາດລາວ ແລະຜູ້ຕາງໜ້າຝ່າຍຈີນ ທ່ານນາງຈ່າງຮຸຍ ຮອງຫົວໜ້າສູນອາຊີອາຝຣິກາຂອງວິທະຍຸໂທລະພາບສູນກາງຈີນ ຕ່າງໄດ້ປະກອບຄຳເຫັນກ່ຽວກັບໂອກາດກັບການທ້າທາຍທີ່ສື່ມວນຊົນກຳລັງປະເຊີນໜ້າໃນຂະບວນການສ້າງສາ“ໜຶ່ງແລວໜຶ່ງເສັ້ນທາງ”.
ຫຼັງກອງປະຊຸມ, ທ່ານໂພສີແກ້ວມະນີວົງ ຮອງລັດຖະມົນຕີກະຊວງ ຖວທ ແລະທ່ານຫູຈິ້ງຈຸ່ນ ຮອງຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ໄດ້ຮ່ວມກັນເປີດປ້າຍໃຫ້ແກ່ການສ້າງສູນຝຶກອົບຮົມຜູ້ວິເຄາະຂ່າວທີ່ກະຊວງຖະແຫຼງຂ່າວວັດທະນະທຳແລະທ່ອງທ່ຽວລາວ ຮ່ວມກັນສ້າງຂຶ້ນ ເພື່ອຮ່ວມກັນຝຶກອົບຮົມວິຊາການດ້ານສື່.
ທ່ານວັນໄຊຕະວິນຍານຮອງຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິບັດລາວ, ບັນນາທິການໃຫຍ່ໜັງສືພິມປະຊາຊົນທ່ານຫວາງຊ້າງອຸປະທູດຈີນປະຈຳລາວ ພ້ອມກັບຜູ້ຮັບຜິດຊອບຈາກກະຊວງຖະແຫຼງຂ່າວວັດທະນະທຳແລະທ່ອງທ່ຽວລາວ, ກະຊວງການຕ່າງປະເທດລາວ, ສື່ມວນຊົນລາວ ກໍ່ຄືຜູ້ຮັບຜິດຊອບຂອງວິທະຍຸໂທລະພາບສູນກາງຈີນປະຈຳອາຊີປາຊີຟິກ, ສູນອາຊີອາຝຣີກາວິທະຍຸໂທລະພາບສູນກາງຈີນ, ກົມພົວພັນຕ່າງປະເທດ, ສູນລາຍການພາສາຈີນຂອງວິທະຍຸໂທລະພາບສູນກາງຈີນກໍຄື ວິທະຍຸໂທລະພາບສູນກາງຈີນປະຈຳກວາງຊີຈີນໄດ້ເຂົ້າຮ່ວມກອງປະຊຸມສົນທະນາດັ່ງກ່າວ.
