ວັນທີ 11 ມິຖຸນາ 2024 ເມືອງຫົງສາ ແຂວງໄຊຍະບູລີ ໄດ້ເປີດບັ້ນດຳເນີນການສອບເສັງຈົບມັດທະຍົມສຶກສາຕອນຕົ້ນ ຫຼື ຊັ້ນ ມ4 ພ້ອມກັບທົ່ວປະເທດ ໂດຍການເປັນກຽດຕັດຫົວບົດສອບເສັງຂອງ ທ່ານ ພົມມາ ພົມມະຫານ ຮອງເຈົ້າເມືອງ ປະທານການສອບເສັງຈົບຊັ້ນ ມ4 ເມືອງຫົງສາ ພ້ອມຄະນະກຳມະການ ການສອບເສັງຂັ້ນແຂວງ ແລະ ເມືອງເຂົ້າຮ່ວມ.
ທົ່ວເມືອງຫົງສາ ມີນັກຮຽນສອບເສັງຈົບຊັ້ນ ມ4 ທັງໝົດ 335 ຄົນ ຍິງ 162 ຄົນ ໃນນີ້ ມີສາມະເນນ 20 ຕົນ ແບ່ງເປັນ 8 ສູນສອບເສັງ ມີ 10 ໂຮງຮຽນຄື: ສູນສອບເສັງ ມສ ຫົງສາ ມສ ບ້ານເມືອງຫານ ມສ ນາປຸ່ງ ມສ ພູແລ້ງ ມສ ຄົກແອກ ມຕ ແທ່ນຄຳ ມຕ ນ້ຳຕັບ ມຕ ທ່າຊວ່າງ ມຕ ປາກຫ້ວຍຍາງ ແລະ ມຕ ສົງ ສະເພາະສູນສອບເສັງ ມສ ຫົງສາ ປະກອບມີ 2 ໂຮງຮຽນຄື: ມສ ຫົງສາ ແລະ ມສ ບ້ານເມືອງຫານ ມີນັກຮຽນສອບເສັງລວມທັງໝົດ 129 ນ້ອງ ຍິງ 68 ນ້ອງ ແບ່ງເປັນ 6 ຫ້ອງສອບເສັງ ບັນຈຸຫ້ອງໜຶ່ງ 20-21 ຄົນ ແລະ ມີຄະນະກໍາມະການປະຈຳຫ້ອງສອບເສັງ 2 ຄົນຕໍ່ຫ້ອງ ຕາມກົດລະບຽບການສອບເສັງທີ່ກະຊວງສຶກສາທິການ ແລະ ກິລາ ວາງອອກ ໃນສົກຮຽນນີ້ ມີ 5 ວິຊາໃນການສອບເສັງເອກະພາບກັນທົ່ວປະເທດຄື: ວິຊາພາສາລາວ-ວັນນະຄະດີ ວິຊາວິທະຍາສາດສັງຄົມ ວິຊາວິທະຍາສາດທໍາມະຊາດ ວິຊາຄະນິດສາດ ແລະ ວິຊາພາສາອັງກິດ.
ທັງນີ້ ກໍ່ເພື່ອເປັນການວັດລະດັບຄວາມຮູ້ ປະເມີນຜົນການຮຽນຂອງນັກຮຽນຈົບຊັ້ນຕອນຕົ້ນ ສົກຮຽນ 2023-2024 ເພື່ອສືບຕໍ່ເຂົ້າຮຽນຊັ້ນມັດທະຍົມຕອນປາຍຢ່າງມີຄຸນນະພາບ ແລະ ແນ່ໃສ່ເຮັດໃຫ້ການຈັດຕັ້ງປະຕິບັດການຮຽນ-ການສອນ ໃຫ້ທ່ວງທັນກັບເວລາ ການສອບເສັງໄດ້ກຳນົດເປັນເວລາ 3 ວັນ ແຕ່ວັນທີ 11-13 ຈຶ່ງສຳເລັດ.
ວຽງຈັນທຸລະກິດ-ສັງຄົມ
