ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຈັດງານບຸນສະເຫລີມສະຫລອງໃຫຍ່ວັນວິສາຂະບູຊາ ປະຈໍາປີ ພສ 2562 ທີ່ເດີ່ນວັດທາດຫລວງ

ໃນວັນທີ 16 ພຶດສະພາ 2019, ອົງການພຸດທະສາສະໜາສໍາພັນ ແຫ່ງ ສປປ ລາວ ແລະ ສູນກາງແນວລາວສ້າງຊາດ ໄດ້ຈັດງານບຸນສະເຫລີມສະຫລອງໃຫ່ຍວັນວິສາຂະບູຊາ ປະຈໍາປີ ພສ 2562 ທີ່ເດີ່ນວັດພຼະໂລກະຈຸລາມະນີ ມະຫາຣັດຕະນະເຈດີ ຫລື ວັດທາດຫລວງເໜືອ, ເມືອງໄຊເຊດຖາ, ນະຄອນຫລວງວຽງຈັນ.

ພະອາຈານພູຄໍາ ແກ້ວປະທຸມ, ຮອງຫົວໜ້າຫ້ອງການບໍລິຫານງານອົງການສູນກາງພຸດທະສາສະໜາສໍາພັນລາວ ໃຫ້ສໍາພາດວ່າ: ນັບແຕ່ຕອນເຊົ້າມື້ນີ້ (16 ພຶດສະພາ 2019) ເປັນຕົ້ນມາ, ບັນດາພະສົງສາມະເນນ ພ້ອມທັງຄະນະຮັບຜິດ ຊອບຈັດງານບຸນດັ່ງກ່າວ ໄດ້ພ້ອມກັນຫ້າງຫາກະກຽມຈັດສະຖານທີ່ຕ່າງໆ, ເປັນຕົ້ນ ປະດັບປະດາ ເອ້ຢ້ອງພາຍໃນງານດ້ວຍການປັກທຸງຊາດ, ທຸງສາສະໜາແລະທຸງທິວ, ເຕົ້າໂຮມພະສົງສາມະເນນ ຕະຫລອດຮອດ ເຄື່ອງສັກກາລະບູຊາ ເພື່ອກຽມຮັບເອົາວັດຖຸປັດໄຈຕ່າງໆ ທີ່ອອກຕົນຍາດໂຍມໄປໂມທະນາ ລວມທັງກິດຈະກໍາອື່ນໆ. ນີ້ເປັນປີທໍາອິດທີ່ຈັດໃຫ່ຍສຸດເປັນຄັ້ງປະຫວັດສາດ, ກິດຈະກໍາຕ່າງໆຂອງງານບຸນສະເຫລີມສະຫລອງ ຕະຫລອດໄລຍະ 3 ວັນຄື: – ວັນພະຫັດ ຂຶ້ນ 13ຄໍ່າ ເດືອນຫົກ ພສ 2562 ກົງກັບວັນທີ 16 ພຶດສະພາ 2019 ເປັນມື້ຫ້າງຫາກະກຽມ, ຕອນແລງສູດປະຣິດຕະມຸງຄຸນ ແລະ ຊົມການສະແດງສິລະປະວັດທະນະທໍາລາວ, ໄທ ແລະອາຊຽນ. – ວັນສຸກຂຶ້ນ 14ຄໍ່າ ເດືອນຫົກ ພສ 2562, ເປີດງານບຸນວິສາຂະບູຊາຢ່າງເປັນທາງການ, ໂດຍມີການຮັບຟັງປາຖະກະຖາທໍາໃຫ່ຍ ກ່ຽວກັບວັນວິສາຂະບູຊາ ທີ່ຫໍປະຊຸມແຫ່ງຊາດຊຶ່ງຈະມີຜູ້ແທນເຂົ້າຮ່ວມທັງໝົດ 2.000 ກວ່າຄົນ, ຕອນຄໍ່າສູດປະຣິດຕະມຸງຄຸນ, ຮັບຟັງທໍາມະເທສະໜາ ແລະ ປະຕິບັດທຳຕາມສົມຄວນ. – ວັນເສົາ ຂຶ້ນ 15ຄໍ່າ ເດືອນຫົກ ພສ 2562 ຕອນເຊົ້າຕັກບາດ ຖວາຍສັງຄະທານແກ່ພະສົງ ຈໍານວນ 500 ອົງ, ຕອນບ່າຍຖວາຍຜ້າປ່າມະຫາສາມັກຄີ ເພື່ອສົມທົບທຶນສ້າງອາຄານສໍານັກງານອາຄານສົງສູນກາງ ອພສ; ຕອນແລງມີພິທີສູດມຸງຄຸນ ຟັງທໍາ, ວຽນທຽນ ແລະ ສົມໂພດພະພຸດທະຮູບຕະຫລອດຄືນ.

ສ່ວນການສະເຫລີມສະຫລອງ ວັນບຸນວິສາຂະບູຊາຢູ່ປະເທດຫວຽດນາມ ແມ່ນໄດ້ຈັດງານຂຶ້ນຢ່າງຍິ່ງໃຫ່ຍ ແຕ່ວັນທີ 12 ຫາ 14 ພຶດສະພາ 2019 ທີ່ແຂວງຮ່ານາມ, ສສ ຫວຽດນາມ ໂດຍມີທ່ານຫງຽວນຊວນຟຸກ, ນາຍົກລັດຖະມົນຕີຫວຽດນາມ, ທ່ານວິນມິນ, ປະທານາທິບໍດີມຽນມ້າ, ທ່ານເວນກາຢາ ນາຍດູ, ຮອງປະທານາທິບໍດີ ທັງເປັນປະທານສະພາສູງອິນເດຍ, ທ່ານຊາມາ ໂອລີ, ນາຍົກລັດຖະມົນຕີເນປານ, ທ່ານຊາມາ ດໍຈິ, ປະທານສະພາສູງພູຖານ, ທ່ານ ອາຊາຣົສ ມີຈິໂຮ, ຮອງເລຂາທິການໃຫ່ຍອົງການສະຫະປະຊາຊາດ, ຕະຫລອດຮອດສາມະຄົມຊາວພຸດ ຈາກ 112 ປະເທດ ແລະເຂດແຄ້ວນ, ພ້ອມດ້ວຍຊາວພຸດຫວຽດນາມ ແລະ ຕ່າງປະເທດເຂົ້າຮ່ວມຫລາຍພັນຄົນ. ສຳລັບປີນີ້ເປັນເທື່ອທີ 3 ແລ້ວທີ່ປະເທດຫວຽດນາມໄດ້ຮັບກຽດຈັດງານວັນບຸນວິສາຂະບູຊາ, ໂດຍມີຫລາຍກິດຈະກໍາທາງສາສະໜາ, ລວມທັງກອງປະຊຸມສຳມະນານໍາອີກ.

   

ວັນວິສາຂະບູຊາ ເປັນວັນສໍາຄັນທີ່ສຸດທາງພຸດທະສາສະໜາ, ຊຶ່ງທາງອົງການສະຫະປະຊາຊາດຍອມຮັບຍັດຕິໃນກອງປະຊຸມທີ່ສະເໜີໂດຍລັດຖະບານປະເທດສີລັງກາ ໃນວັນທີ 13 ຕຸລາ 1999 ພສ 2542 ໄດ້ກໍານົດໃຫ້ວັນວິສາຂະບູຊາ ເປັນວັນສໍາຄັນຂອງໂລກ, ເອີ້ນວ່າ Vesak Day ຕາມຄໍາອອກສຽງຂອງຊາວສີລັງກາ, ທັງກໍານົດໃຫ້ເປັນວັນພັກລັດຖະການຂອງສະຫະປະຊາຊາດ, ເພື່ອໃຫ້ຊາວພຸດທະ ສາສະນິກະຊົນທັງຫລາຍ ໄດ້ມີໂອກາດສ້າງບຸນກຸສົນ ຄືການບໍາເພັນຄຸນງາມຄວາມດີ ເນື່ອງໃນວັນປະສູດ, ວັນຕັດສະຮູ້ ແລະ ວັນປະຣິນິພານ ຂອງອົງພຣະສໍາມາສໍາພຸດທະເຈົ້າ.

ຂ່າວ : ຄໍາກອງ ກິດຕິຄຸນ