ງານສະເຫລີມສະຫລອງວັນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ສາກົນ ປະຈຳປີ 2022 ຈັດຂຶ້ນໃນລະຫວ່າງວັນທີ 22-24 ກໍລະກົດ 2022 ທີ່ສູນການຄ້າວຽງຈັນເຊັນເຕີ ໂດຍການເປັນປະທານຂອງ ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ມີຕາງໜ້າຈາກພາກລັດ, ພາກທຸລະກິດ ແລະ ອົງການຈັດຕັ້ງສາກົນຕ່າງໆ ເຂົ້າຮ່ວມ 100 ກວ່າທ່ານ.
ທ່ານ ບຸນເພັງ ສີບຸນເຮືອງ, ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກໍາ ແລະ ການຄ້າ ກ່າວວ່າ: ການສະເຫຼີມສະຫຼອງ ວັນຈຸນລະວິສາຫະກິດ , ວິສາຫະກິດຂະໜາດນ້ອຍ ແລະ ກາງ (ຈວນກ ຫຼື MSME) ສາກົນ, ວັນທີ 27 ມິຖຸນາ ແມ່ນໄດ້ເລີ່ມຈັດມາແຕ່ ປີ 2017 ພາຍຫຼັງທີ່ ສະມັດຊາໃຫຍ່ອົງການສະຫະປະຊາຊາດ ໄດ້ຮັບຮອງເອົາຍັດຕິສະບັບເລກທີ 71/279 ໃນເດືອນເມສາ 2017 ເຊິ່ງກໍານົດເອົາວັນທີ 27 ມິຖຸນາ ຂອງທຸກປີ ເປັນວັນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຫລື MSME ສາກົນ.ຈາກນັ້ນມາ, ວັນທີ່ມີຄວາມໝາຍຄວາມສໍາຄັນດັ່ງກ່າວ ໄດ້ຮັບການສະເຫຼີມສະຫຼອງຢ່າງກວ້າງຂວາງ ໂດຍບັນດາອົງການຈັດຕັ້ງໃນເຄືອຂ່າຍຂອງ ອົງການສະຫະປະຊາຊາດ ທັງຢູ່ເຊີແນວ ປະເທດສະວິດ, ຢຸ່ນິວຢອກ ສະຫະລັດອາເມລິກາ, ໃນບັນດາປະເທດອາຊຽນ ແລະ ປະເທດໃນໂລກ.
ຈດຸປະສົງຂອງການກໍານົດໃຫ້ມີວັນດັ່ງກ່າວ ແມ່ນເພື່ອເຮັດໃຫ້ທຸກພາກສ່ວນທີ່ກ່ຽວຂ້ອງ ແລະ ທົ່ວສັງຄົມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ກວ້າງຂວາງ ກ່ຽວກັບບົດບາດ ແລະ ຄວາມສໍາຄັນຂອງ MSME ທີ່ໄດ້ປະກອບສ່ວນເຂົ້າໃນການພັດທະນາເສດຖະກິດ, ການສ້າງວຽກເຮັດງານທໍາ ແລະ ການສ້າງລາຍຮັບ ເພື່ຶອຍົກລະດັບຊີວິດການເປັນຢູ່ຂອງປະຊາຊົນ ແລະ ຊຸມຊົນ ຢູ່ໃນທຸກຂົງເຂດທົ່ວໂລກ, ໂດຍສະເພາະແມ່ນການປະກອບສ່ວນ ເພື່ອບັນລຸເປົ້າໝາຍການພັດທະນາແບບຍືນຍົງ (SDG) ປີ 2030.
ໃນໂອກາດນີ້, ທ່ານ ບຸນເຖິງ ດວງສະຫວັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ປະທານຈັດງານ ກ່າວວ່າ: ການສົ່ງເສີມ ແລະ ພັດທະນາ MSME ຢູ່ ສປປ ລາວ ກວມອັດຕາສ່ວນປະມານ 99,8% ຂອງບັນດາວິສາຫະກິດທັງໝົດ ແລະ ສ້າງວຽກເຮັດງານທຳຫລາຍກວ່າ 80% ຂອງອັດຕາການຈ້າງງານ. ບັນດາ MSME ເຫລົ່ານັ້ນເຄື່ອນໄຫວທຸລະກິດໃນຂະແໜງການຕ່າງໆ ເຊັ່ນ: ການຄ້າ, ການຜະລິດ ແລະ ການບໍລິການ. ໃນໄລຍະຜ່ານມາ, ລັດຖະບານໄດ້ໃຫ້ຄວາມສຳຄັນແກ່ການສົ່ງເສີມ ແລະ ພັດທະນາ MSME ໂດຍໄດ້ກຳນົດບັນດານະໂຍບາຍ ແລະ ມາດຕະການຕ່າງໆ ເຊິ່ງຈັດຕັ້ງປະຕິບັດໂດຍບັນດາກະຊວງ, ໜ່ວຍງານ ທັງພາກລັດ ແລະ ພາກທຸລະກິດ ເຊິ່ງໃນບໍ່ດົນມານີ້ ລັດຖະບານໄດ້ຮັບຮອງແຜນພັດທະນາ MSME 2021-2025, ສະພາແຫ່ງຊາດໄດ້ຮັບຮອງກົດໝາຍວ່າດ້ວຍການສົ່ງເສີມ MSME (ສະບັບປັບປຸງ) ແລະ ກະຊວງອຸດສາຫະກຳ ແລະ ການຄ້າ ກຳລັງດຳເນີນການປັບປຸງດຳລັດວ່າດ້ວຍການຈັດແບ່ງຂະໜາດ MSME ແລະ ດໍາລັດວ່າດ້ວຍກອງທຶນສົ່ງເສີມ SME ເຊິ່ງບັນດານິຕິກຳເຫລົ່ານີ້ ຈະເປັນບ່ອນອີງທີ່ສຳຄັນໃນການສົ່ງເສີມ MSME ໃນໄລຍະໃໝ່ ແລະ ປະກອບສ່ວນໃນການຟື້ນຟູເສດຖະກິດຂອງຊາດ ພາຍຫລັງການລະບາດຂອງພະຍາດໂຄວິດ-19.
ງານສະເຫຼີມສະຫລອງວັນ MSME ສາກົນ ໃນຄັ້ງນີ້ ຈັດຂຶ້ນລະຫວ່າງວັນທີ 22 ຫາ 24 ກໍລະກົດ 2022 ພາຍໃນງານປະກອບມີກິດຈະກຳວາງສະແດງສິນຄ້າ, ເສວະນາແລກປ່ຽນທຸລະກິດ, ການໃຫ້ຄຳປຶກສາເຂົ້າເຖິງແຫລ່ງທຶນກັບບັນດາສະຖາບັນການເງິນ ແລະ ທະນາຄານທຸລະກິດ ແລະ ກິດຈະກຳສະແດງວິຊາຊີບ ເຊິ່ງສາມາດເຂົ້າຮ່ວມໄດ້ໂດຍບໍ່ເສຍຄ່າ ແລະ ເຊີນຊວນທຸກທ່ານເຂົ້າຮ່ວມງານ ແຕ່ເວລາ 10:30-18:00 ທີ່ສູນການຄ້າວຽງຈັນເຊັນເຕີ.
