ການຈັດຝຶກອົບຮົມນຳໃຊ້ລະບົບແຈ້ງພາສີປະຕູດຽວແຫ່ງຊາດ ທີ່ດ່ານພາສີສາກົນວັງເຕົ່າ ເມືອງໂພນທອງ ແຂວງຈຳປາສັກ ໄດ້ຈັດຂຶ້ນໃນວັນທີ 5 ກັນຍາ 2022 ໃຫ້ກຽດເປັນປະທານ ຂອງທ່ານ ວິເລືອງ ວໍລະບຸດ ຮອງຫົວໜ້າພາສີປະຈຳແຂວງຈຳປາສັກ,ມີທ່ານ ແກ້ວອຸດອນ ພາລີຈັນ ຫົວໜ້າດ່ານພາສີສາກົນວັງເຕົ່າ ພ້ອມດ້ວຍຄະນະ ແລະພະນັກງານເຈົ້າ ໜ້າທີ່ພາສີພາຍໃນດ່ານເຂົ້າຮ່ວມ.
ທ່ານ ວິເລືອງ ວໍລະບຸດ ຮອງຫົວໜ້າພາສີປະຈຳແຂວງຈຳປາສັກ, ໄດ້ກ່າວໄຂຊຸດອົບຮົມວ່າ: ລະບົບແຈ້ງພາສີຜ່ານປະຕູດຽວໄດ້ຮັບການພັດທະນາມາໃນໄລຍະນຶ່ງແລ້ວ ຮອດປັດຈຸບັນໄດ້ສຳເລັດການສ້າງລະບົບໂດຍພື້ນຖານ ແລະ ພ້ອມສຳລັບການທົດລອງເຂົ້າໃນວຽກງານອອກອະນຸຍາດຜ່ານລະບົບ ອີເລັກໂຕຣນິກ ຊຶ່ງເປັາໝາຍການສ້າງລະບົບດັ່ງກ່າວ ແມ່ນເພື່ອຍົກລະດັບມາດຕະຖານການບໍລິການຂະແໜງການຂອງລັດ ແລະ ເພີ່ມທະວີອຳນວຍຄວາມສະດວກທາງດ້ານການຄ້າໃຫ້ນັບມື້ສູງຂື້ນ.
ປັດຈຸບັນທົ່ວໂລກໄດ້ມີຫຼາຍປະເທດນຳໃຊ້ລະບົບແຈ້ງພາສີປະຕູດຽວແຫ່ງຊາດຂອງຕົນແລ້ວ ແລະມີຄວາມພ້ອມນຳໃຊ້ລະບົບການແຈ້ງພາສີປະຕູດຽວອາຊຽນ. ສ່ວນ ສປປລາວ ເຮົາຈິ່ງມີໜ້າທີ່ໃນການກຽມຄວາມພ້ອມດັ່ງກ່າວເຂົ້າໃນການແຈ້ງພາສີປະຕູດຽວອາຊຽນໃນຕໍ່ໜ້າ ໂດຍການນຳໃຊ້ລະບົບທີ່ທັນສະໄໝ, ສະດວກ,ວ່ອງໄວ ແລະຖືກຕ້ອງຊັດເຈນກວ່າເກົ່າ.
ຊຸດອົບຮົມໃນຄັ້ງນີ້ ຍັງໄດ້ມີການລາຍ ງານຄວາມຄືບໜ້າໃນການປະຕິບັດລະບົບແຈ້ງພາສີປະຕູດຽວແຫ່ງຊາດໃນໄລຍະຜ່ານມາ ພ້ອມທັງວາງແຜນການທົດລອງ ແລະ ຝຶກອົບຮົມນຳໃຊ້ບະບົບດັ່ງກ່າວຕົວຈິງ ຢູ່ດ່ານສາສີສາກົນວັງເຕົ່າ ເພື່ອຜົນສຳເລັດໃນວຽກງານ ແລະ ຮັບປະກັນປະສິດທິຜົນສູງໃນການແຈ້ງພາສີ.
ຊຸດຝຶກອົບຮົມນຳໃຊ້ລະບົບແຈ້ງພາສີປະຕູດຽວແຫ່ງຊາດໃນຄັ້ງນີ້ຈະດຳເນີນໄປຮອດວັນທີ 6 ກັນຍາ ຈິ່ງຈະສຳເລັດ. ຈາກນີ້ກໍຈະຝືກອົບຮົມໃຫ້ບັນດາບໍລິສັດຕື່ມອີກໃນວັນທີ 7 ຫາ 9 ກັນຍາ 2022.
ເກດສະໜາ
