ສະພາແຫ່ງຊາດຈັດພິທີສະຫລຸບ ແລະຍ້ອງຍໍຜົນງານການເຄື່ອນໄຫວຈັດຕັ້ງປະຕິບັດແຜນຍຸດທະສາດ, ວິໄສທັດ ແລະແຜນການ 5 ປີ ນັບແຕ່ 2016 ຫາ 2020 ຂອງສະພາແຫ່ງຊາດຊຸດທີ 8 ໃນຕອນບ່າຍ ວັນທີ 26 ຕຸລາ ນີ້, ທີ່ຫໍສະພາແຫ່ງຊາດ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ນາງ ປານີ ຢາທໍຕູ້ ປະທານສະພາແຫ່ງຊາດ ມີຄະນະປະຈຳສະພາແຫ່ງຊາດ, ອະດີດສະມາຊິກສະພາແຫ່ງຊາດ ແລະສະມາຊິກສະພາແຫ່ງຊາດຊຸດທີ 8 ພ້ອມດ້ວຍແຂກຖືກເຊີນຈຳນວນໜື່ງ.
ໃນພິທີພາຍຫລັງທ່ານ ພົງສະເໜ່ ຍຸດຕິທຳ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດຜ່ານບົດສະຫລຸບຜົນງານການເຄື່ອນໄຫວຂອງສະພາແຫ່ງຊາດຊຸດທີ 8ໄລຍະ 5 ປີຜ່ານ ມາ ຊື່ງສາມາດຍາດໄດ້ຜົນງານພົ້ນເດັ່ນຫລາຍດ້ານ ໂດຍສະເພາະການປະຕິບັດພາລະບົດບາດເປັນອົງການນິຕິບັນຍັດ, ສ້າງ ແລະປັບປຸງກົດໝາຍ, ຄົ້ນຄ້ວາ ພິຈາລະນາຕົກລົງຮັບຮອງເອົາບັນຫາສຳຄັນຂອງຊາດ ແລະຕິດຕາມກວດກາການເຄົາລົບລັດຖະທຳມະນູນ ແລະກົດໝາຍຂອງອົງການອຳນາດລັດ ດ້ວຍການຫັນເປັນແຜນງານ, ໂຄງການ ແລະແຜນການລະອຽດຢ່າງມີຫົວຄິດປະດິດສ້າງ, ປັບປຸງກົງຈັກການຊ່ວຍວຽກ ແລະຍົກສູງຄຸນນະພາບຂອງບຸກຄະລາກອນໃຫ້ມີຄວາມຮັບຜິດຊອບສູງຂື້ນ ແລະຈັດຕັ້ງປະຕິບັດແຜນ ການຂອງສະພາແຫ່ງຊາດສຳເລັດຜົນຢ່າງເປັນຮູບປະທຳ.
ໃນພິທີຄັ້ງນີ້ຍັງໄດ້ປະດັບຫລຽນໄຊອິດສະຫລະຊັ້ນ 2 ໃຫ້ຮອງປະທານສະພາແຫ່ງຊາດຈຳນວນ 4 ທ່ານຄື: ພົນໂທ ແສງນວນ ໄຊຍະລາດ, ທ່ານ ສົມພັນ ແພງຄຳມີ, ທ່ານ ບຸນປອນ ບຸດຕະນະວົງ ແລະທ່ານ ນາງ ສີໃສ ລືເດດມູນສອນ, ປະດັບຫລຽນໄຊແຮງງານຊັ້ນ 1 ໃຫ້ສະມາຊິກສະພາແຫ່ງຊາດຊຸດທີ 8 ຈຳນວນ 54 ທ່ານ, ຊັ້ນ 2 ຈຳນວນ 72 ທ່ານ ແລະ ຊັ້ນ 3 ຈຳນວນ 14 ທ່ານ ທີ່ມີຜົນງານດີເດັ່ນປະກອບສ່ວນດ້ານເຫື່ອ ແຮງ ແລະສະຕິປັນຍາເຂົ້າໃນການເຄື່ອນໄຫວວຽກງານຂອງສະພາແຫ່ງຊາດຊຸດທີ 8 ຕະ ຫລອດໄລຍະ 5 ປີ ນັບແຕ່ 2016 ຫາ 2020 ໂດຍແມ່ນ ທ່ານ ນາງ ປານີ ຢາທໍ້ຕູ້ປະທານສະພາແຫ່ງຊາດ ເປັນຜູ້ມອບ, ນອກຈາກນີ້ຍັງໄດ້ປະດັບຫລຽນກາແຮງງານ, ໃບຍ້ອງຍໍລັດຖະບານ, ໃບຍ້ອງຄະນະປະຈໍາສະພາແຫ່ງຊາດ ແລະຄະນະເລຂາທິການສະພາແຫ່ງຊາດ ແລະຍ້ອງຍໍຜົນງານການ ເຄື່ອນໄຫວຈັດຕັ້ງປະຕິບັດແຜນຍຸດທະສາດ,ວິໄສທັດ ແລະແຜນການ 5 ປີ ນັບແຕ່ 2016 ຫາ 2020 ຂອງສະພາແຫ່ງຊາດ .
ຈາກນັ້ນ ສະມາຊິກສະພາແຫ່ງຊາດຍັງໄດ້ຮັບຟັງການໂອ້ລົມຈາກທ່ານ ນາງ ປານີ ຢາທໍ້ຕູ້ ປະທານສະພາແຫ່ງຊາດ ເພື່ອເປັນທິດຊີ້ນໍາໃຫ້ສະມາຊິກສະພາແຫ່ງຊາດໃນການເຄື່ອນໄຫວວຽກງານຂອງສະພາແຫ່ງຊາດໃຫ້ມີປະສິດທິຜົນຍີ່ງຂື້ນໃນຕໍ່ໜ້າ.
ໂດຍ: ຈັນທະສອນ ສີຫານາດ

Loading...