ຕອນບ່າຍ ວັນທີ 7 ມິຖຸນາ 2024 ກະຊວງ ຖະແຫລງຂ່າວ ວັດທະນະທໍາ ແລະທ່ອງທ່ຽວ ຫລື ຖວທ ໄດ້ຈັດພິທີສະເຫລີມສະຫລອງ “ຫັດຖະກໍາພື້ນເມືອງ ພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ” ຂຶ້ນທີ່ຫໍວັດທະນະທໍາແຫ່ງຊາດ, ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ, ທ່ານພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ ພ້ອມດ້ວຍ ບັນດາທ່ານອະດີການນຳ, ບັນດາທູດ, ຕານຸທູດ, ແລະມວນຊົນຊາວນະຄອນຫລວງວຽງຈັນເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ກ່າວວ່າ: ທ່າມກາງບັນຍາກາດທີ່ທົ່ວພັກທົ່ວປວງຊົນລາວທັງຊາດ ພວມພ້ອມກັນສະເຫຼີມສະຫຼອງວັນສໍາຄັນຕ່າງໆ ຂອງພັກຂອງຊາດ ເປັນຕົ້ນແມ່ນວັນຜ່າວົງປິດລ້ອມ ກອງພັນທີ 2 ວິລະຊົນ ທີ່ທົ່ງໄຫຫີນຊຽງຂວາງຄົບຮອບ 65 ປີ ກໍຄືວິລະກໍາໂຕນຄຸກຢ່າງມະຫັດສະຈັນ ຂອງບັນດາຜູ້ນໍາຂອງພັກ ຄົບຮອບ 64 ປີ ລວມທັງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ່ຫາກໍ່ຜ່ານພົ້ນໄປບໍ່ທໍ່ໃດວັນກ່ອນໜ້ານີ້. ດັ່ງທີ່ຄະນະກອງເລຂາໄດ້ລາຍງານລະອຽດໃຫ້ບັນດາທ່ານຊາບແລ້ວວ່າ ພວກເຮົາມາເຕົ້າໂຮມກັນຢູ່ຫໍວັດທະນະທໍາແຫ່ງຊາດມື້ນີ້ ແມ່ນເພື່ອພ້ອມກັນຊື່ນຊົມຍິນດີ ສະເຫຼີມສະຫຼອງເຫດການປະຫວັດສາດ ດ້ານມໍຣະດົກວັດທະນະທໍາລາວເຮົາ ຄືການທີ່ ຫັດຖະກໍາພື້ນເມືອງ ພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວໄດ້ຮັບຮອງບັນທຶກ ໂດຍອົງການອຸຍແນັສ໌ໂກ ເຂົ້າເປັນມໍຣະດົກວັດທະນະທໍາທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດ ໂດຍສະເພາະແມ່ນຂອງປວງຊົນລາວທຸກທົ່ວໜ້າ.
ດັ່ງທີ່ບັນດາທ່ານຮູ້ນໍາກັນແລ້ວວ່າ ແມ່ຍິງລາວ ມີວັດທະນະທໍາການນຸ່ງຖື ທີ່ເປັນເອກະລັກສະເພາະ ຂອງຊາດລາວມາແຕ່ສະໄໝບູຮານນະການ ກໍຄືການນຸ່ງສິ້ນ ບຽງແພ ທີ່ມີຫຼາກຫຼາຍສີສັນ ແລະ ລວດລາຍ ຊື່ງຕິດພັນກັນຢ່າງສະໜິດແໜ້ນກັບວິຖີການດໍາລົງຊີວິດຂອງຄົນລາວໃນທຸກພາກ, ທຸກເຂດແຂວງໃນທົ່ວປະເທດ ລວມທັງຊາວລາວທີ່ຢູ່ຕ່າງປະເທດເຊັ່ນດຽວກັນ. ແມ່ຍິງລາວເຂົ້ານັ່ງແປ້ນກີ່ຮຽນຕໍ່າຫູກ ຕັ້ງແຕ່ອາຍຸກ່ອນ 10 ປີ ໂດຍມີແມ່, ແມ່ເຖົ້າ ແລະ ແມ່ຍ່າເປັນຄູສອນ ເຊິ່ງສິດສອນກັນແບບປາກເປົ່າ ພ້ອມທັງການລົງມືຕໍ່າຜ້າຕົວຈິງໂດຍທີ່ບໍ່ມີປຶ້ມຕໍາລາບັນທຶກໄວ້. ມີພຽງແຕ່ນິທານ, ກາບກອນ ແລະ ພາສິດສອນໃຈໃດໆ ທີ່ຜູກພັນຢູ່ໃນລີງລາຍ ເຕັກນິກການຕໍ່າ ຕະຫຼອດຮອດການນໍາໃຊ້ຜ້າປະເພດຕ່າງໆ ອັນໄດ້ກາຍເປັນບົດຮຽນອັນລໍ້າຄ່າ ຖືກສະສົມ ແລະ ສືບທອດຈາກຄົນຮຸ່ນຕໍ່ຮຸ່ນ ກາຍເປັນວັດທະນະທໍາທີ່ສວຍງາມ ແລະ ມີເອກະລັກສະເພາະຄຽງຄູ່ກັບປະຊາຊົນລາວ, ເປັນມູນມັງມໍຣະດົກຂອງຄອບຄົວ ແລະ ຂອງສັງຄົມເຊື້ອຊາດລາວເຮົາຍືນຍາວມາຈົນເຖິງທຸກວັນນີ້ ຄືດັ່ງທີ່ເຮົາເຫັນເອື້ອຍນ້ອງເຮົານຸ່ງມາຮ່ວມງານໃນມື້ນີ້. ຍ້ອນແນວນັ້ນ, ລາຍ“ນາກ” ຫຼື “ເງືອກ” ເປັນລາຍທີ່ໂດດເດັ່ນອັນດັບໜຶ່ງໃນຜ້າລາວ ເຊິ່ງຕົນຕົວຖືກປະດິດຄິດສ້າງຂຶ້ນ ດ້ວຍຈິດສໍານຶກ ຢໍາແຢງ ແຝງບູຊາ ດ້ວຍສິລະປະອັນປານີດ ແລະ ຜູກພັນກັບຊີວິດການເປັນຢູ່ຂອງຊາດລາວຢ່າງແຍກບໍ່ອອກ ຈົນ ຊ່າງຕໍ່າຫູກເອີ່ຍເຖິງວຽກງານຕໍ່າຫູກຂອງຕົນເມື່ອໃດ ຈະມີຄໍາເວົ້າຕິດສົບສືບຕໍ່ກັນວ່າ: ຕໍ່າຫູກ ຕໍ່ານາກ.
ສືບຕໍ່ຈາກ “ສຽງແຄນເຊື້ອຊາດລາວ”ຂອງພວກເຮົາ ໄດ້ຖືກຮັບຮອງເຂົ້າໃນບັນຊີມໍຣະດົກວັດທະນະທໍາທີ່ບໍ່ເປັນວັດຖຸທີ່ເປັນຕົວແທນຂອງມວນມະນຸດ ອັນທໍາອິດ ໃນປີ 2017 ແລ້ວ,ພັກ ແລະ ລັດຖະບານ ໄດ້ນໍາພາຊີ້ນໍາຢ່າງໃກ້ຊິດ ມອບໝາຍໃຫ້ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ເປັນເຈົ້າການສືບຕໍ່ຄົ້ນຄວ້າລົງເລິກ ວຽກງານວັດທະນະທໍາຂອງຊາດເຮົາ ທີ່ມີລັກສະນະຊາດ, ມະຫາຊົນ ແລະ ກ້າວໜ້າ ນໍາສະເໜີຕໍ່ອົງການອຸຍແນັສ໌ໂກ ແນໃສ່ເພື່ອປົກປັກຮັກສາ ວັດທະນະທໍາອັນດີງາມ ຂອງຊາດລາວເຮົາໃຫ້ນັບມື້ນັບມີຄວາມຫຼາກຫຼາຍ ແລະ ພົ້ນເດັ່ນຍິ່ງຂຶ້ນໃນເວທີໂລກ ເຊິ່ງໃນນັ້ນມີຫັດຖະກໍາລາຍນາກລາວ. ຜ່ານການຄົ້ນຄວ້າສ້າງເອກະສານນໍາສະເໜີດ້ວຍຄວາມພາກພຽນ ພ້ອມທັງຕິດຕາມອະທິບາຍປ້ອງກັນ ແລະ ຊີ້ແຈງດ້ານວິຊາການໃຫ້ຄະນະກໍາມະການທີ່ກ່ຽວຂ້ອງເຂົ້າໃຈເປັນແຕ່ລະໄລຍະ ໃນກອງປະຊຸມຕ່າງໆ ເປັນເວລາຫຼາຍເດືອນປີ, ຈົນທີ່ສຸດ ມາເຖິງວັນທີ 6 ທັນວາ 2023 ກອງປະຊຸມຄະນະກໍາມະການລະຫວ່າງລັດຖະບານ ວ່າດ້ວຍການປົກປ້ອງມໍຣະດົກວັດທະນະທໍາ ທີ່ບໍ່ເປັນວັດຖຸ ຂອງອົງການອຸຍແນັສ໌ໂກ ຄັ້ງທີ 18 ໄດ້ປະກາດຕົກລົງຮັບຮອງເອົາ “ຫັດຖະກໍາພື້ນເມືອງ ພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ” ເຂົ້າໃນບັນຊີມໍຣະດົກວັດທະນະທໍາທີ່ບໍ່ເປັນວັດຖຸ ທີ່ເປັນຕົວແທນຂອງມວນມະນຸດຢ່າງເປັນທາງການ ທີ່ເມືອງກາຊານ, ສາທາລະນະລັດ ບອັສ໌ວານາ. ຫຼັງຈາກນັ້ນ, ຂ້າພະເຈົ້າໄດ້ນໍາພາຄະນະຜູ້ແທນລາວໂດຍກົງ ໄປຮັບເອົາໃບຢັ້ງຢືນດັ່ງກ່າວ ຢູ່ອົງແນັສ໌ໂກ ທີ່ນະຄອນຫຼວງປາຣີ, ປະເທດຝຣັ່ງ ໃນວັັນທີ 28 ກຸມພາ 2024.
ນີ້ເປັນເຫດການປະຫວັດສາດອີກອັນໜຶ່ງ ທີ່ປິຕິຍິນດີ ແລະ ເປັນກຽດອັນສູງສົ່ງ ອັນເຕັມໄປດ້ວຍຄວາມເອກອ້າງທະນົງໃຈ ຂອງປວງຊົນລາວທັງຊາດ ຕະຫຼອດຮອດຄົນເຊື້ອຊາດລາວເຮົາ ບໍ່ພຽງແຕ່ຢູ່ພາຍໃນປະເທດ ແຕ່ຢູ່ທົ່ວທຸກມຸມໂລກ ສາມາດຢັ້ງຢືນໄດ້ຢ່າງພາກພູມໃຈວ່າ: ຫັດຖະກໍາລາຍນາກ ຂອງພວກເຮົາ ໄດ້ຖືກຮັບຮອງເຂົ້າເປັນມໍຣະດົກໂລກຢ່າງແທ້ຈິງ ແລະ ຈະຍືນຍົງຢູ່ຄຽງຄູ່ກັບມວນມະນຸດທົ່ວໂລກ ຢ່າງຖາວອນຕະຫຼອດໄປ.ສໍາຄັນໄປກວ່ານັ້ນ,ເຫດການດັ່ງກ່າວນີ້ ຍັງເປັນໝາກຜົນແຫ່ງການຈັດຕັ້ງປະຕິບັດແນວທາງນະໂຍບາຍອັນຖືກຕ້ອງສອດຄ່ອງ ຂອງພັກ-ລັດເຮົາ ວ່າດ້ວຍການຊຸກຍູ້ສົ່ງເສີມ, ປົກປັກຮັກສາ ແລະ ເສີມຂະຫຍາຍມູນເຊື້ອ ວັດທະນະທໍາອັນດີງາມ ຂອງຊາດ ໃຫ້ນັບມື້ນັບກວ້າງຂວາງ ຕິດພັນກັບການພັດທະນາເສດຖະກິດ-ສັງຄົມແຫ່ງຊາດ ໃຫ້ນັບມື້ນັບເຂັ້ມແຂງ ພ້ອມທັງອະນຸລັກຮັກສາ ວັດທະນະທໍາອັນເປັນເອກະລັກຂອງຊາດ ໃຫ້ມີຄວາມຍືນຍົງຕະຫຼອດໄປ.
ຕອນທ້າຍ ທ່ານລັດຖະມົນຕີ ກະຊວງ ຖວທ ໄດ້ສະແດງຄວາມຮູ້ບຸນຄຸນຕໍ່ພັກ, ຕໍ່ລັດຖະບານ ທີ່ຍາມໃດກໍ່ໃຫ້ຄວາມສໍາຄັນ ໃກ້ຊິດຕິດແທດ ເອົາໃຈໃສ່ນໍາພາຊີ້ນໍາຢ່າງຈົດຈໍ່ ເຮັດໃຫ້ພວກເຮົາສາມາດຜ່ານຜ່າຄວາມຫຍຸ້ງຍາກຕ່າງໆ, ບຸກບືນສູ້ຊົນເຮັດລ້ອນໜ້າທີ່ອັນໜັກໜ່ວງ ແລະ ມີກຽດສະຫງ່າຂອງພັກ-ລັດ ແລະ ປະຊາຊົນທັງຊາດມອບໝາຍໃຫ້ ດ້ວຍຜົນສໍາເລັດເປັນກ້າວໆມາ.
ໃນງານສະເຫຼີມສະຫຼອງທີ່ມີຄວາມໝາຍຄວາມສໍາຄັນນີ້ ນອກຈາກພິທີສະເຫຼີມສະຫຼອງທາງການທີ່ປະກອບດ້ວຍຂະບວນແຫ່ ແລະ ລາຍການສະແດງທີ່ບັນດາທ່ານໄດ້ຊົມໄປແລ້ວນັ້ນ, ຍັງມີກິດຈະກໍາປິ່ນອ້ອມຈໍານວນໜຶ່ງເຊັ່ນ: ກອງປະຊຸມສໍາມະນາວັນນະກໍາກ່ຽວກັບລາຍນາກ ແລະ ວິຖີຊີວິດຊຸມຊົນເຊື້ອຊາດລາວໄດ້ຈັດຂື້ນດ້ວຍຜົນສໍາເລັດຢ່າງຈົບງາມໃນມື້ວານນີ້, ງານວາງສະແດງຜົນງານສິລະປະຫັດຖະກໍາລາຍນາກ ແລະ ອາຫານພື້ນບ້ານຕ່າງໆ ເພື່ອໃຫ້ບັນດາທ່ານ ພໍ່ແມ່ພີ່ນ້ອງປະຊາຊົນເຮົາ ໄດ້ທ່ຽວຊົມ, ຊິມລົດຊາດອາຫານ ແລະ ຊ່ວຍກັນໂຄສະນາເຊີນຊວນໝູ່ຄູ່ ຍາດຕິພີ່ນ້ອງມາທ່ຽວງານ ຢູ່ທີ່ເຂດຫໍວັດທະນະທໍາແຫ່ງນີ້ ນັບແຕ່ວັນທີ 5 ຫາວັນທີ 9 ໃຫ້ມີຂະບວນຟົດຟື້ນ.
