ສອງກະຊວງພາຍໃນລາວ-ຫວຽດນາມຈັດພິທີວາງສະແດງເອກະສານປະຫວັດສາດ ແລະ ນໍາສະເໜີປຶ້ມ ” ສາຍພົວພັນຮ່ວມມືແບບພິເສດ ລາວ-ຫວຽດນາມ ” ຈັດຂຶ້ນຕອນເຊົ້າວັນທີ23.11.2022 ຢູ່ຫ້ອງປະຊຸມໃຫຍ່ ກະຊວງພາຍໃນ ນະຄອນຫລວງວຽງຈັນ, ມີທ່ານ ທອງຈັນ ມະນີໄຊ ກຳມະການສູນກາງພັກ, ເຂລາຄະນະພັກ ລັດຖະມົນຕີກະຊວງພາຍໃນ,ມີທ່ານ ເລຍໍແທັງ ທີປຶກສາທູດ ຮອງເລຂາພັກ ສະຖານທູດຫວຽດນາມປະຈຳລາວຕາງຫນ້າຝ່າຍຫວຽດນາມ ມີບັນດາການນຳກະຊວງພາຍໃນຂອງລາວ, ຄະນະຜູ້ແທນກົມເອກະສານ ແລະ ສຳເນົາແຫ່ງລັດ ຂອງ ຫວຽດນາມ, ບັນດາຫົວໜ້າຫ້ອງການກະຊວງ-ອົງການ, ຫົວໜ້າກົມ, ຫ້ອງການ, ສູນ, ສະຖາບັນ ແລະ ພະນັກງານ-ລັດຖະກອນ ທີ່ຂຶ້ນກັບກະຊວງພາຍໃນ ເຂົ້າຮ່ວມ.
ໂອກາດນີ້ທ່ານ ທອງຈັນ ມະນີໄຊ ໄດ້ໃຫ້ກຽດກ່າວເປີດພິທີ ບາງຕອນວ່າ:ການຈັດພິທີວາງສະແດງເອກະສານປະຫວັດສາດ ແລະ ສະເໜີປຶ້ມ ” ສາຍພົວພັນຮ່ວມມືແບບພິເສດ ລາວ-ຫວຽດນາມ “ໃນຄັ້ງນີ້ເປັນກິດຈະກໍາສໍາຄັນຫນື່ງໃນການສະເຫລີມສະຫລອງປີສາມັກຄີມິດຕະພາບລະຫວ່າງລາວ-ຫວຽດນາມ,ຫວຽດນາມ-ລາວຄືວັນສ້າງຕັ້ງສາຍພົວທາງການທູດລາວ-ຫວຽດນາມ,ຫວຽດນາມລາວ ວັນທີ 5ກັນຍາ ຄົບຮອບ 60ປີ ເເລະວັນເຊັນສົນທິສັນຍາມິດຕະພາບເເລະການຮ່ວມມືລາວ-ຫວຽດນາມ,ຫວຽດນາມ-ລາວ ວັນທີ 18ກໍລະກົດ ຄົບຮອບ45ປີ ໃຫ້ມີບັນຍາກາດຟົດຟື້ນ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ເຂົ້າສູ່ລວງເລິກ, ສູ້ຊົນເຮັດໃຫ້ການພົວພັນຮ່ວມມືດ້ານການເມືອງ, ວັດທະນະທຳ-ສັງຄົມ, ປ້ອງກັນຊາດ, ປ້ອງກັນຄວາມສະຫງົບໃຫ້ມີຄວາມໝັ້ນຄົງ, ພວກເຮົາຕ້ອງເພີ່ມທະວີການໂຄສະນາສຶກສາອົບຮົມພະນັກງານ-ລັດຖະກອນ ແລະ ປະຊາຊົນບັນດາເຜົ່າ ເປັນຕົ້ນແມ່ນຄົນຮຸ່ນໃໝ່ໃຫ້ມີຄວາມຮັບຮູ້, ເຂົ້າໃຈກ່ຽວກັບມູນເຊື້ອສາມັກຄີແບບພິເສດການຮ່ວມມືຮອບດ້ານ ລະຫວ່າງ ລາວ -ຫວຽດນາມ ແລະ ສືບຕໍ່ປົກປັກຮັກສາສາຍພົວພັນ ແລະ ຄວາມສາມັກຄີພິເສດນີ້ໄວ້ໃຫ້ໝັ້ນຄົງ.
ເອກະສານປະຫວັດສາດ ທີ່ນຳມາສະເໜີ ແລະ ວາງສະແດງໃນຄັ້ງນີ້ ມີທັງໝົດ 266 ສະບັບ, ຮູບພາບ 60 ແຜ່ນ, ປຶ້ມ 132 ຫົວ ໂດຍແບ່ງອອກເປັນ 2 ໄລຍະຄື: ເອກະສານປະຫວັດສາດ ແລະ ຮູບພາບ ກ່ຽວກັບການຮ່ວມສຳພັນສູ້ຮົບ ແລະ ສາຍພົວພັນການທູດລາວ-ຫວຽດນາມ, ຫວຽດນາມ-ລາວ ແຕ່ປີ 1950-1975,ເອກະສານປະຫວັດສາດ ແລະ ຮູບພາບກ່ຽວກັບການເພີ່ມທະວີຄວາມສາມັກຄີ ແລະ ການຮ່ວມມື ໃນພາລະກິດປົກປັກຮັກສາ ແລະ ສ້າງສາປະເທດຊາດ, ການຮ່ວມມືພິເສດ ແລະ ຮອບດ້ານ ລະຫວ່າງລາວ-ຫວຽດນາມ, ຫວຽດນາມ-ລາວ ປີ 1976-ປະຈຸບັນ.
ພາຍຫຼັງສຳເລັດພິທີເປີດຢ່າງເປັນທາງການແລ້ວ, ບັນດາການໍາທີ່ເຂົ້າຮ່ວມພິທີ ໄດ້ຢ້ຽມຊົມບັນດາເອກະສານ, ຮູບພາບ ແລະ ປຶ້ມ ທີ່ເປັນມູນເຊື້ອການພົວພັນຮ່ວມມືແບບພິເສດຂອງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ທີ່ສະແດງໃຫ້ເຫັນເຖິງຄວາມສາມັກຄີທີ່ແໜ້ນແຟ້ນ ແລະ ສາມັກຄີຮອບດ້ານ ນັບແຕ່ອະດີດຈົນເຖິງປະຈຸບັນ.
ໂດຍ:ເດດອາລຸນ ແກ້ວວິໄລ