ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 27 ພຶດສະພາ 2024ນີ້, ທີ່ ນະຄອນຫຼວງພະບາງ ໄດ້ຈັດສຳມະນາກ່ຽວກັບ ເຈ້ຍປໍສາ ເພື່ອສົ່ງເສີມການປອດພາສະຕິກໃນອາຊຽນ ໃຫ້ກຽດເຂົ້າຮ່ວມ ຂອງທ່ານ ຄໍາສຸກ ແກ້ວວົງຊາຍ ຜູ້ອຳນວຍການສະຖາບັນວິຈິດສິນແຫ່ງຊາດລາວ ມີບັນດາຄະນະເລຂາທິການອາຊຽນ ຜູ້ຕາງໜ້າບັນດາປະເທດອາຊຽນ, ຄູອາຈານນັກສຶກສາຈາກສະຖາບັນວິຈິດສິນແຫ່ງຊາດລາວ, ພາກລັດແລະພາກເອກະຊົນ ທີ່ກ່ຽວຂ້ອງເຂົ້າຮ່ວມ.
ທ່ານ ຄໍາສຸກ ແກ້ວວົງຊາຍ ໄດ້ຕາງໜ້າໃຫ້ການນຳ ຂອງ ສປປ ລາວ ໃນນາມເປັນເຈົ້າພາບຈັດກອງປະຊຸມຄັ້ງນີ້, ຂຶ້ນກ່າວຕ້ອນຮັບບັນດາສະມາຊິກອາຊຽນ ແລະແຂກທີ່ຖືກເຊີນເຂົ້າຮ່ວມ, ພ້ອມທັງກ່າວເຖິງປະຫວັດຄວາມເປັນມາ ໂດຍອີງຕາມການຕັດສິນໃຈຂອງກອງປະຊຸມຄັ້ງທີ 58 ຂອງຄະນະກຳມະການວັດທະນະທຳ ແລະ ຂໍ້ມູນຂ່າວສານອາຊຽນ ທີ່ໄດ້ຈັດຂຶ້ນໃນວັນທີ 10-11 ຕຸລາ 2023 ທີ່ປະເທດ ບຣູໄນ, ເຫັນດີເອກະພາບຈັດສຳມະນາເຜີຍແຜ່ເຈ້ຍປໍສາ ເພື່ອສົ່ງເສີມການປອດພາສະຕິກໃນອາຊຽນຂຶ້ນ ເພີ່ມຈໍານວນນັກສຶກສາທີ່ມີຄວາມສາມາດ ແລະ ປະສົບການດ້ານສິລະປະໃນພາກພື້ນອາຊຽນ, ຊຸກຍູ້ການສ້າງຈິດສຳນຶກດ້ານວັດທະນະທຳ ແລະ ສຶກສາກ່ຽວກັບຄວາມຫຼາກຫຼາຍ, ຄຸນຄ່າເອກະລັກຂອງອາຊຽນໂດຍຜ່ານການເຄື່ອນໄຫວໄປພ້ອມກັບການເອົາໃຈໃສ່ຕໍ່ສິ່ງແວດລ້ອມ, ຊຸກຍູ້ຟື້ນຟູເສດຖະກິດບັນດາຫົວໜ່ວຍທຸລະກິດ, ສົ່ງເສີມການຮ່ວມມືລະຫວ່າງຂະແໜງການ, ອຳນວຍຄວາມສະດວກໃຫ້ແກ່ການພົບປະແລກປ່ຽນປະຊາຊົນ ແລະວັດທະນະທຳອາຊຽນໃນການສ້າງເຄືອຂ່າຍ ແລະ ຮັດແໜ້ນສາຍພົວພັນລະຫວ່າງບັນດາຜູ້ເຂົ້າຮ່ວມອາຊຽນ ໃຫ້ມີການປະສານງານແລະສື່ສານໃນໄລຍະຍາວ, ໃນກອງປະຊຸມຜູ້ເຂົ້າຮ່ວມໄດ້ພັດປ່ຽນກັນຂຶ້ນປະກອບຄໍາເຫັນແລກປ່ຽນບົດຮຽນເຊິ່ງກັນແລະກັນເພື່ອເຮັດໃຫ້ການສຳມະນາຄັ້ງນີ້ໄດ້ຮັບຜົນສຳເລັດ.
ຂ່າວ: ຈໍາປາ
ບກ: ມະນີວັນ ສຸດຕະພົງ