ເຈົ້າໜ້າທີ່ຕໍາຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໃຫ້ຮູ້ວ່າ ໃນວັນທີ 11 ກໍລະກົດ 2024 ຜ່ານມານີ້ ໄດ້ລົງເຄື່ອນໄຫວວຽກງານວິຊາສະເພາະຢູ່ຂອບເຂດ ບ້ານໂພນສີໃຕ້ ເມືອງໂພນໂຮງ ແຂວງວຽງຈັນ ສາມາດເລີກຮື້ເປົ້າໝາຍໄດ້ 2 ຄົນ ຄື: ທ້າວ ອານຸສອນ , ອາຍຸ 32 ປີ, ອາຊີບກຳມະກອນ ຢູ່ບ້ານໂພນສີໃຕ້ ເມືອງໂພນໂຮງ ແຂວງວຽງຈັນ ຖືກຫາວ່າຄ້າ-ຂາຍຢາເສບຕິດ ແລະ ການມີອາວຸດເສິກໄວ້ໃນຄອບຄອງ ປືນສັ້ນ 01 ກະບອກ ແລະ ລູກປືນ 21 ລູກ ພ້ອມທັງຢຶດກາງຢາເສບຕິດ ຈຳນວນ 13.504 ເມັດ ແລະ ທ້າວ ໂຕ້ນ, ອາຍຸ 43 ປີ, ອາຊີບກຳມະກອນ ຢູ່ບ້ານ ກະລະ ເມືອງສາລະວັນ ແຂວງສາລະວັນ ພ້ອມຂອງກາງຢາບ້າ ຈຳນວນ 30.091 ເມັດ, ຢາໄອສນໍ້າໜັກ 1,69 ກຣາມ ມາທໍາການສືບສວນ-ສອບສວນ.
ຜ່ານການສຶບສວນ-ສອບສວນຂອງເຈົ້້າໜ້າທີ່ ພວກກ່ຽວທັງ 2 ຄົນ ໄດ້ໃຫ້ການຮັບສາລະພາບວ່າ: ທ້າວ ອານຸສອນ ໃຫ້ການຮັບສາລະພາບວ່າ: ໃນຄັ້ງວັນທີ 06 ກໍລະກົດ 2024 ຜູ້ກ່ຽວໄດ້ຕິດຕໍ່ຊື້ຢາບ້ານຳທ້າວ ໂຕ້ນ ຢູ່ບ້ານກະສະ ເມືອງສາລະວັນ ແຂວງສາລະວັນ ຈຳນວນ 02 ແຟັກເທົ່າກັບ 12.000 ເມັດ ໃນລາຄາ 46,000,000 ກີບ ເມື່ອໄດ້ຢາບ້າແລ້ວຜູ້ກ່ຽວກໍ່ໄດ້ຂາຍໃຫ້ກັບກຸ່ມມົ້ວສຸມຢາເສບຕິດທົ່ວໄປ 01 ຖົງ ເທົ່າກັບ 200 ເມັດ ໃນລາຄາ 850.000 ກີບ ຜູ້ກ່ຽວຂາຍໝົດຈຳນວນຈຳນວນ 10,496 ເມັດ, ຍັງເຫຼືອຢາບ້ານຳຜູ້ກ່ຽວຈຳນວນ 1.504 ເມັດ, ຕົກມາຮອດວັນທີ 08 ກໍລະກົດ 2024 ຜູ້ກ່ຽວກໍ່ໂທລະສັບສັ່ງຊື້ຢາບ້ານຳທ້າວ ໂຕ້ນ ອີກ 02 ແພັກເທົ່າກັບ 12.000 ເມັດ ໃນລາຄາ 46.000.000 ກີບ ແລ້ວກໍ່ເອົາຢາບ້າທີ່ຊື້ມານັ້ນມາລວມໃສຢາບ້າຮ່ວງເກົ່າ ລວມຢາບ້າທັງໝົດມີຈຳນວນ 13.504 ເມັດ ຜູ້ກ່ຽວກໍ່ເອົາຊຸກເຊື່ອງໄວ້ໃນເຮືອນ ຈາກນັ້ນຮອດເວລາປະມານ 15 ໂມງຂອງວັນທີ 11 ກໍລະກົດ 2024 ຈຶ່ງໄດ້ມີເຈົ້າໜ້າທີ່ຕຳຫຼວດເຂົ້າມາທຳກວດຄົ້ນຕົວ ແລະ ເຮືອນຂອງຜູ້ກ່ຽວ ຜ່ານການກວດຄົ້ນຈຶ່ງພົບເຫັນຢາບ້າຈຳນວນ 13.504 ເມັດ ຢູ່ໃນເຮືອນຂອງຜູ້ກ່ຽວ ແລະ ປືນສັ້ນສະນິດ USA ພ້ອມດ້ວຍລູກປືນ ຈຳນວນ 21 ລູກ ຈາກນັ້ນເຈົ້າໜ້າທີ່ຈຶ່ງກັກຕົວຜູ້ກ່ຽວ ມາທຳການສືບສວນ-ສອບສວນຕາມຂັ້ນຕອນຂອງກົດໝາຍ.
ທ້າວ ໂຕ້ນ ໃຫ້ການຮັບສາລະພາບວ່າ: ໃນວັນທີ 6 ກໍລະກົດ 2024 ຜູ້ກ່ຽວໄດ້ຊື້ຢາບ້ານຳທ້າວ ບໍ່ຮູ້ຊື່ ຈຳນວນ 2 ແພັກ ໃນລາຄາ 40.000.000 ກີບ ແລະ ຜູ້ກ່ຽວໄດ້ເອົາຢາບ້າມາຂາຍໃຫ້ກັບທ້າວ ອານຸສອນ ຈຳນວນ 02 ແພັກ ໃນລາຄາ 46.000.000 ກີບ ຕົກມາວັນທີ 08 ກໍລະກົດ 2024 ຜູ້ກ່ຽວໄດ້ໂທລະສັບສັ່ງຊື້ຢາບ້ານຳທ້າວ ບໍ່ຮູ້ຊື່ຢູ່ແຂວງບໍ່ແກ້ວ ຈຳນວນ 05 ແພັກເທົ່າກັບ 30,091 ເມັດ ໃນລາຄາ 105.000.000 ກີບ ຕົກມາຮອດວັນທີ 11 ກໍລະກົດ 2024 ເວລາປະມານ 15 ໂມງ ຜູ້ກ່ຽວກໍ່ຂັບຂີ່ລົດໄປເຮືອນ ທ້າວ ອານຸສອນ ຢູ່ບ້ານໂພນສີໃຕ້ ເມືອງໂພນໂຮງ ແຂວງວຽງຈັນ ເມື່ອຮອດຜູ້ກ່ຽວກໍ່ເອົາຢາບ້າຈຳນວນ 30.091 ເມັດ ເພື່ອຈະຂາຍຢາບ້າໃຫ້ທ້າວ ອານຸສອນ ແຕ່ໃນເວລານັ້ນ ຈຶ່ງໄດ້ມີເຈົ້າໜ້າທີ່ຕຳຫຼວດເຂົ້າມາທຳການກວດຄົ້ນຕົວຜູ້ກ່ຽວ ຜ່ານການກວດຄົ້ນຈຶ່ງພົບເຫັນຢາບ້າ 30.091 ເມັດ ຢາໄອສ໌ນໍ້າໜັກ 1,69 ກຣາມ ຢູ່ນໍາຜູ້ກ່ຽວ ຈາກນັ້ນ ເຈົ້າໜ້າທີ່ຈຶ່ງກັກຕົວຜູ້ກ່ຽວມາທຳການສືບສວນ-ສອບສວນຕາມຂັ້ນຕອນຂອງກົດໝາຍ.
ເຈົ້າໜ້າທີ່ວິຊາສະເພາະພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ຍັງໃຫ້ຮູ້ຕື່ມອິກວ່າ ພວກກ່ຽວທັງ 2 ຄົນ ແມ່ນໄດ້ເຄື່ອນໄຫວຊື້-ຂາຍຢາເສບຕິດປະເພດຢາບ້າມາແລ້ວຫຼາຍຄັ້ງ ແລະ ມີອາວຸດເສິກໄວ້ໃນຄອບຄອງ ປະຈຸບັນເຈົ້າໜ້າທີ່ວິຊາສະເພາະ ກໍາລັງເລັ່ງດໍາເນີນການສືບສວນ-ສອບສວນ ພວກກ່ຽວທັງ 2 ຄົນເພື່ອຂະຫຍາຍຜົນຫາກຸ່ມແກ້ງ, ເຄືອຂ່າຍ, ຜູ້ຮ່ວມຂະບວນການ ມາລົງໂທດຕາມລະບຽບກົດໝາຍຂອງບ້ານເມືອງໃນຂັ້ນຕໍ່ໄປຕື່ມອີກ.
ຂ່າວ ປ້ອງກັນຄວາມສະຫງົບ ແຂວງວຽງຈັນ: ຈັນດາລາ
