ພະແນກກະສິກຳ ແລະ ປ່າໄມ້ແຂວງ ຮ່ວມກັບ ຄະນະພັກ-ອົງການປົກຄອງນະຄອນປາກເຊ ໄດ້ຈັດພິທີປ່ອຍປາ ຂຶ້ນຢູ່ແມ່ນໍ້າເຊໂດນ ບໍລິເວນທ່າວັດຫລວງ ນະຄອນປາກເຊ ໃນວັນທີ 13 ກໍລະກົດ 2023 ເນື່ອງໃນໂອກາດສະເຫລີມສະຫລອງວັນອະນຸລັກສັດນ້ຳ-ສັດປ່າ ແລະ ວັນປ່ອຍປາແຫ່ງຊາດ ຄົບຮອບ 18 ປີ (13/7/2005 -13/7/2023) ແລະ ວັນຄ້າຍວັນເກີດ ປະທານ ສຸພາ ນຸວົງ ຄົບຮອບ 114 ປີ (13/7/1909 - 13/7/2023) ພ້ອມກັນນີ້, ກໍເພື່ອເປັນການຊຸກຍູ້ສົ່ງເສີມການອະນຸລັກສັດນໍ້າ - ສັດປ່າ ແລະ ຄືນຄວາມອຸດົມສົມບູນໃຫ້ແກ່ທຳມະຊາດ ທັງເປັນການປຸກລະດົມ, ປຸກຈິດສຳນຶກໃຫ້ທົ່ວປວງຊົນ ຫັນມາອະນຸລັກ ແລະ ເຫັນຄຸນຄ່າຂອງສັດນໍ້າ - ສັດປ່າ, ປ່າໄມ້ ແລະ ທຳມະຊາດ ເຊິ່ງແມ່ນພັນທະຂອງປວງຊົນທັງຊາດ. ປາ ທີ່ນຳມາປ່ອຍໃນຄັ້ງນີ້ ແມ່ນປາປາກ ຈໍານວນ 150.000 ກວ່າໂຕ ແລະ ໃນປີ 2023 ນີ້ ແຂວງຈໍາປາສັກ ຈະປ່ອຍປາຄືນສູ່ທໍາມະຊາດ ໃຫ້ໄດ້ 3 ລ້ານໂຕ.
ທ່ານ ບົວລີ ເພັດສົງຄາມ ໄດ້ລາຍງານການກະກຽມພ້ອມໃນການຈັດພິທີປ່ອຍປາ ພ້ອມທັງລາຍງານຄວາມເປັນມາ ຂອງວັງສະຫງວນປາກນໍ້າ ເຊໂດນ ແລະ ທົບທວນລະບຽບໃນການຄຸ້ມຄອງ – ປົກປັກຮັກສາໃນໄລຍະທີ່ຜ່ານມາ. ພ້ອມທັງຍົກໃຫ້ເຫັນການກະກຽມດ້ານຕ່າງໆ ເປັນຕົ້ນ ດ້ານນິຕິກໍາ, ກົນໄກ, ວິທີການ ແລະ ແຜນຈັດຕັ້ງປະຕິບັດ ເຊັ່ນ: ຂໍ້ຕົກລົງ, ຂໍ້ກໍານົດ ແລະ ລະບຽບການ ໃນການຄຸ້ມຄອງປົກປັກຮັກສາວັງສະຫງວນແຫ່ງນີ້ ໄດ້ມີການກວດກາ, ທົບທວນປັບປຸງ ໃຫ້ມີຄວາມເໝາະສົມຂຶ້ນ ລວມທັງການເຜີຍແຜ່, ສຶກສາອົບຮົມ, ສ້າງຄວາມຮັບຮູ້ເຂົ້າໃຈໃຫ້ປະຊາຊົນ, ຄອບຄົວພະນັກງານ, ທະຫານ – ຕໍາຫລວດ ໃນຂອບເຂດບ້ານກ່ຽວຂ້ອງ ໃຫ້ພ້ອມກັນປະຕິບັດ ກົດໝາຍ ແລະ ລະບຽບການວາງອອກ ຢ່າງເຂັ້ມງວດ; ກະກຽມສ້າງຕັ້ງຄະນະກໍາມະການຄຸ້ມຄອງການປະມົງປະຈໍາພື້ນທີ່ແຫລ່ງນໍ້າ (ວັງສະຫງວນ) ຄືນໃໝ່ ເພື່ອເຮັດໜ້າທີ່ ສ້າງແຜນການຄຸ້ມຄອງ, ປົກປັກຮັກສາ, ເຜີຍແຜ່, ສຶກສາອົບຮົມ, ຕິດຕາມ, ກວດກາ ແລະ ດໍາເນີນມາດຕະການອັນຈໍາເປັນ ເພື່ອສະກັດກັ້ນຜົນກະທົບຕໍ່ສັດນໍ້າ ເຊິ່ງເກີດຈາກການຫາປາ, ການທໍາລາຍຖິ່ນທີ່ຢູ່ອາໄສ, ບ່ອນວາງໄຂ່ ແລະ ແຫລ່ງອາຫານຂອງສັດນໍ້າ ໃນເຂດວັງສະຫງວນ ໃຫ້ກັບມາມີຄວາມອຸດົມສົມບູນຄືທີ່ຜ່ານມາ.
ໂອກາດນີ້, ທ່ານ ວິໄລວົງ ບຸດດາຄຳ ໄດ້ຍົກໃຫ້ເຫັນ ປະຫວັດ, ການເຄື່ອນໄຫວ, ຜົນງານ, ບຸນຄຸນ, ຄຸນງາມຄວາມດີ ຂອງປະທານ ສຸພານຸວົງ ຜູ້ນໍາທີ່ເຄົາລົບຮັກຂອງປວງຊົນລາວທັງຊາດ ພ້ອມທັງຍົກໃຫ້ເຫັນຄວາມໝາຍສໍາຄັນຂອງວັນອະນຸລັກສັດນໍ້າ - ສັດປ່າ ແລະ ວັນປ່ອຍປາແຫ່ງຊາດ ພ້ອມທັງຮຽກຮ້ອງໃຫ້ທຸກພາກສ່ວນໃນທົ່ວສັງຄົມ ຈົ່ງພ້ອມກັນສຸມໃສ່ປະຕິບັດໜ້າທີ່ສຳຄັນ ໃນການປູກຈິດສຳນຶກໃຫ້ແກ່ນັກຮຽນ, ນັກສຶກສາ, ພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ໃຫ້ມີສ່ວນຮ່ວມ, ເປັນເຈົ້າການໃນການປົກປັກຮັກສາ, ອະນຸລັກຊັບພະຍາກອນປ່າໄມ້, ຢຸດບໍລິໂພກ, ຢຸດລ່າ, ຢຸດຄ້າຂາຍປາ, ສັດນໍ້າ ແລະ ສັດປ່າ ປະເພດຫວງຫ້າມ ທີ່ຫາຍາກ ແລະ ໃກ້ຈະສູນພັນ. ພ້ອມກັນສຸມໃສ່ສະກັດກັ້ນ ກຸ່ມຄົນທີ່ຫາປາແບບດັບສູນ ເຊັ່ນ: ການຕັນທາງຂຶ້ນ - ລົງຂອງປາ ຕາມຮູນໍ້າແຫລ່ງນໍ້າທຳມະຊາດ ດ້ວຍວິທີການເຮັດຫລີ່, ຈິບ, ລວງຂັງ, ລອບ, ໂຕ່ງ, ມອງຕາຖີ່, ນໍາໃຊ້ອາວຸດ, ລະເບີດ, ທາດເບື່ອ, ສານເຄມີ, ໃຊ້ໄຟຟ້າຊ໊ອດ ແລະ ເຄື່ອງມືອື່ນໆ ທີ່ມີລັກສະນະດັບສູນ ເພື່ອໃຫ້ມີໄວ້ຕະຫລອດໄປຈົນເຖິງເຊັ່ນລູກເຊັ່ນຫລານ. ພ້ອມນີ້, ໃຫ້ຖືເອົາການລ້ຽງ, ການຂະຫຍາຍພັນ, ຄຸ້ມຄອງ, ອະນຸລັກ, ປົກປັກຮັກສາ, ພັດທະນາປາ, ສັດນໍ້າ – ສັດປ່າ ໃຫ້ມີຄວາມອຸດົມສົມບູນ ແລະ ຍືນຍົງ.
ຂ່າວ-ພາບ: ທູນທອງໃຈ
