ວັນທີ 9 ກັນຍາ 2022,ທີ່ສະໂມສອນແຂວງ ແຂວງຈຳປາສັກ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ( 9 ກັນຍາ 2002 – 9 ກັນຍາ 2022 ) ໂດຍການເປັນປະທານຂອງ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ, ເຂົ້າຮ່ວມມີ ທ່ານ ນາງ ວາດສະໜາ ສີລິມາ ປະທານແນວລາວສ້າງຊາດແຂວງ, ພັນເອກ ບຸນມາກ ວິລະວົງ ຄະນະກໍາມະການສະຫະພັນນັກຮົບເກົ່າ ແຫ່ງຊາດລາວ ປະທານສະຫະພັນນັກຮົບເກົ່າແຂວງ ພ້ອມດ້ວຍຄະນະ, ພ້ອມພາກສ່ວນກ່ຽວຂ້ອງ ເຂົ້າຮ່ວມ.
ພັນເອກ ບຸນມາກ ວິລະວົງ ປະທານສະຫະພັນນັກຮົບເກົ່າແຂວງຈຳປາສັກ ໄດ້ກ່າວຫວນຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຍົກໃຫ້ເຫັນຜົນງານຕະຫຼອດໄລຍະ 20 ປີ ທີ່ຜ່ານມາ.ບາງຕອນທ່ານກ່າວວ່າ: ກ່ອນເຖີງວັນນີ້້ ປະເທດຊາດ, ປະຊາຊົນລາວໄດ້ຖຶກຮຸກຮານ ຈາກສັກດິນາ ແລະ ຈັກກະພັດ ຕ່າງດ້າວ ມາຫຼາຍສັດຕະວັດແລ້ວ ມາຮອດປີ 1955 ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂື້ນ ເຊີ່ງແມ່ນປະທານ ໄກ່ສອນ ພົມວິຫານ ຜູ້ນຳທີ່ແສນເຄົາລົບຮັກ ເປັນຜູ້ສ້າງຕັ້ງ ແລະ ນຳພາ ພາຍໃຕ້ການນຳພາອັນປີຊາສາມາດພະນັກງານ ນັກຮົບ, ກຳລັງປະກອບອາວຸດ ປະຕິວັດໄດ້ ພ້ອມກັບ ປະຊາຊົນລາວທັງຊາດ ຕໍ່ສູ້ກັບສັດຕູຜູ້ຮຸກ ຮານ ຢ່າງພິ ລະ ອາດຫານ, ສາມາດເອົາຊະນະສັດຕູ ແລະ ລູກແຫຼ້ງຕີນມືຂອງພວກເຂົາ ລົບລ້າງລະບອບ ເກົ່າ ສະຖາປານາລະ ບອບໃໝ່ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນໃນວັນ ທີ 2 ທັນວາ ປີ1975 ຢ່າງສະຫງ່າຜ່າເຜີຍ.
ນັກຮົບເກົ່າ ແມ່ນກໍາເນີດມາຈາກພະນັກງານ ກຳລັງປະກອບອາວຸດ ເຄີຍຜ່ານສະໜາມຮົບ ແລະ ແປວໄຟຂອງສົງຄາມ ໃນອາດິດ ຫຼື ພະນັກງານນັກຮົບຜູ້ທີ່ເຄີຍເຂົ້າຮ່ວມຂະບວນການ ຕໍ່ສູ້ກູ້ຊາດ ຕ້ານການຮຸກຮານ ຂອງສັດຕູພາຍນອກໃນເມື່ອກ່ອນ ແລະ ການຕໍ່ສູ້ເພື່ອປົກປັກຮັກສາ ແລະ ສ້າງສາ ພັດທະນາປະເທດຊາດໃນປະຈຸບັນ.
ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ ໄດ້ມີຄໍາເຫັນ, ໂດຍທ່ານ ໄດ້ເນັ້ນໜັກໃຫ້ການນໍາສະຫະພັນນັກຮົບເກົ່າແຕ່ລະຂັ້ນ ແລະ ບັນດານັກຮົບເກົ່າທຸກສະຫາຍ ໃຫ້ສືບຕໍ່ເສີມຂະຫຍາຍທາດແທ້ມູນເຊື້ອປະຕິວັດອັນດີງາມຂອງຕົນ ເພີ່ມທະວີຄວາມສາມັກຄີຮັກແພງພາຍໃນ ແລະ ສາມັກຄີກັບທຸກຊັ້ນຄົນໃນສັງຄົມ, ປະກອບສ່ວນເຂົ້າໃນການສ້າງກ້ອນກໍາລັງມະຫາສາມັກຄີປອງດອງອັນເປັນປຶກແຜ່ນຂອງທົ່ວປວງຊົນລາວຢູ່ອ້ອມຂ້າງພັກ – ລັດ; ເສີມຂະຫຍາຍຄວາມສາມາດ ແລະ ເຊີດຊູບົດບາດຂອງນັກຮົບເກົ່າ, ປະກອບສ່ວນເຂົ້າໃນ ການປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງຂອງພັກ ແລະ ແຜນພັດທະນາ ເສດຖະກິດ – ສັງຄົມຂອງລັດວາງໄວ້ໃຫ້ເກີດໝາກຜົນຕົວຈິງ; ສະຫະພັນນັກຮົບເກົ່າແຕ່ລະຂັ້ນເອົາໃຈໃສ່ເສີມຂະຫຍາຍພາລະບົດບາດຂອງຕົນປະກອບສ່ວນເຂົ້າໃນການຄຸ້ມຄອງລັດ, ຄຸ້ມຄອງສັງຄົມໃຫ້ແຂງແຮງກວ່າເກົ່າ, ເອົາໃຈໃສ່ສືບຕໍ່ປັບປຸງແບບແຜນເນື້ອໃນ, ຮູບການ ແລະ ວິທີການເຄື່ອນໄຫວຂອງຕົນໃຫ້ແທດເໝາະກັບແຕ່ລະເປົ້້າໝາຍ, ອັນສໍາຄັນທີ່ສຸດ ຕ້ອງສ້າງເງື່ອນໄຂໃຫ້ສະມາຊິກນັກຮົບເກົ່າມີບ່ອນດໍາເນີນຊີວິດ ແລະ ໄດ້ຮັບຂໍ້ມູນຂ່າວສານກ່ຽວກັບ ນະໂຍບາຍຂອງພັກ – ລັດ.ຕ້ອງເພີ່ມທະວີຄວາມຮັບຜິດຊອບຂອງຕົນ ໃນການຜັນຂະຫຍາຍ ແລະ ຈັດຕັ້ງນະໂຍບາຍຕອບແທນບຸນຄຸນຜູ້ທີ່ມີຜົນງານການອຸທິດໃນພາລະກິດປະຕິວັດ ຕາມແນວທາງຂອງພັກວາງອອກ, ເພີ່ມທະວີຄວາມອົາໃຈໃສ່ໃນການສ້າງເງື່ອນໄຂສະດວກ, ສະໜັບສະໜູນອົງການນັກຮົບເກົ່າ ໃຫ້ໄດ້ເຄື່ອນໄຫວຕາມພາລະ ບົດບາດ, ພ້ອມກັນສ້າງສັງຄົມລາວ ໃຫ້ມີຄວາມຜາສຸກ, ຄວາມສະຫງົບສຸກ, ອົບອຸ່ນ ແລະ ສີວິໄລ.
ໂດຍ: ເກດສະໜາ
Loading...