ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈຳປາສັກ ປິດຊຸດຝຶກອົບຮົມພະນັກງານນໍາທ່ຽວ ລະດັບແຂວງ ຄັັ້ງທີ II ໃນວັນທີ 19 ສິງຫາ 2024 ຕາງໜ້າມອບໃບຢັ້ງຢືນຄັ້ງນີ້ໂດຍ ທ່ານ ວັນນະໄຊ ຊາດຕະກູນ ຫົວໜ້າພະແນກ ຖວທ ແຂວງ ພ້ອມດ້ວຍພະນັກງານນຳທ່ຽວ ຈາກບໍລິສັດທ່ອງທ່ຽວ ທັງພາກລັດ ແລະ ເອກະຊົນ ເຂົ້າຮ່ວມ.
ທ່ານ ສົມພະໄທ ເກດມາລາ ຫົວໜ້າຂະແໜງທ່ອງທ່ຽວ ແຂວງຈຳປາສັກ ລາຍງານວ່າ: ການເປີດຊຸດອົບຮົມຄັ້ງນີ້ ມີນັກສໍາມະນາກອນເຂົ້າຮ່ວມ 37 ທ່ານ ຍິງ 23 ທ່ານ ໃນນີ້, ມາຈາກ ບໍລິສັດທ່ອງທ່ຽວ 31 ທ່ານ ແລະ ກຸ່ມພະນັກງານນໍາທ່ຽວຂອງແຂວງ 6 ທ່ານ, ຝຶກເປັນພະນັກງານນໍາທ່ຽວ ພາສາໄທ 14 ທ່ານ, ພາສາຈີນ 2 ທ່ານ, ພາສາຝຣັ່ງ 6 ທ່ານ, ພາສາອັງກິດ 13 ທ່ານ, ພາສາຫວຽດນາມ 1 ທ່ານ ແລະ ພາສາລັດເຊຍ 1 ຄົນ. ນັກສຳມະນາກອນ ໄດ້ຮຽນຮູ້ ການປະຖົມພະຍາບານເບື້ອງຕົ້ນ, ຄວາມປອດໄພຂອງນັກທ່ອງທ່ຽວ, ຄວາມຮູ້ພື້ນຖານດ້ານການທ່ອງທ່ຽວ, ມະນຸດສຳພັນ ແລະ ຈິດຕະວິທະຍາບໍລິຫານ, ທັກສະການແກ້ໄຂບັນຫາ ແລະ ການສື່ສານແບບມືອາຊີບ, ການບໍລິການອາຫານ ແລະ ເຄື່ອງດື່ມ, ຄວາມຮູ້ພື້ນຖານກ່ຽວກັບກາເຟ, ເຕັກນິກການທ່ອງທ່ຽວ, ພູມສາດແຂວງ, ປະຫວັດສາດລາວ ແລະ ປະຫວັດແຫລ່ງທ່ອງທ່ຽວວັດພູ, ວັດທະນະທຳ ແລະ ປະເພນີທ້ອງຖິ່ນແຂວງ, ທັກສະການແກ້ໄຂບັນຫາ ແລະ ການບໍລິຫານການທ່ອງທ່ຽວ.
ໂອກາດນີ້, ທ່ານ ວັນນະໄຊ ຊາດຕະກຸນ ໄດ້ຮຽກຮ້ອງໃຫ້ຜູ້ທີ່ສໍາເລັດການຝຶກອົບຮົມຄັ້ງນີ້ ຈົ່ງນໍາເອົາບົດຮຽນ, ປະສົບການ, ຄວາມຮູ້-ຄວາມສາມາດ ທີ່ໄດ້ຈາກການຝຶກອົບຮົມ ໄປໝູນໃຊ້ເຂົ້າໃນໜ້າທີ່ວຽກງານຕົວຈິງ ເພື່ອເຮັດໃຫ້ຄຸນນະພາບການທ່ອງທ່ຽວພາຍໃນແຂວງ ມີຄວາມແຂງແຮງຂຶ້ນກວ່າເກົ່າ, ສົມຄູ່ກັບການຂະຫຍາຍຕົວ ຂອງນັກທ່ອງທ່ຽວໃນແຕ່ລະໄລຍະ, ຮັບປະກັນການເຄື່ອນໄຫວຕາມບົດບາດ, ສິດ, ໜ້າທີ່ຢ່າງເຂັ້ມງວດ, ຕາມອົງປະກອບດ້ານຄວາມຮູ້, ຄວາມສາມາດ ແລະ ຄຸນສົມບັດຂອງຜູ້ນຳທ່ຽວ ເພື່ອສ້າງຄວາມປະທັບໃຈໃຫ້ແກ່ນັກທ່ອງທ່ຽວ.
ຂ່າວ-ພາບ: ທູນທອງໃຈ
