ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມເຜີຍແຜ່ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI, ມະຕິວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ (ສອຈ) ໃນໄລຍະໃໝ່ທົ່ວແຂວງຈໍາປາສັກ ຈັດຂຶ້ນໃນວັນທີ 26 ມິຖຸນານີ້, ທີ່ສະໂມສອນຫຼັກ 4 ແຂວງຈຳປາສັກ ໂດຍເປັນປະທານຂອງ ທ່ານ ອາລຸນໄຊ ສູນນະລາດ ເລຂາພັກແຂວງ, ເຈົ້າແຂວງຈຳປາສັກ.
ສໍາລັບບັນດາມະຕິທີ່ນຳມາເຜີຍແຜ່ໃນຄັ້ງນີ້ ມີມະຕິວ່າດ້ວຍການຮັບຮອງເອົາການເລືອກຕັ້ງ ເຈົ້າແຂວງຈໍາປາສັກ, ສະບັບເລກ ທີ10/ສພຂ.ຈສ, ລົງວັນທີ 21 ພຶດສະພາ 2024. ການເຜີຍແຜ່ເອກະສານສູນກາງພັກ ແລະ ລັດຖະບານ, ມະຕິກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານສູນກາງພັກ ສະໄໝທີ XI, ມະຕິຂອງກົມການເມືອງສູນກາງພັກສະບັບເລກທີ04/ ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່, ມະຕິຂອງລັດຖະບານສະບັບເລກທີ05/ລບ ວ່າດ້ວຍການແບ່ງຄວາມຮັບຜິດຊອບ ໃນການຈັດຕັ້ງປະຕິບັດມະຕິວ່າດ້ວຍການ ສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່: ການຜັນຂະຫຍາຍມະຕິຂອງສູນກາງພັກ-ລັດຖະບານມາເປັນຂອງອົງຄະນະພັກ-ອົງການປົກຄອງແຂວງ.
ທ່ານ ອາລຸນໄຊ ສູນນະລາດ ໄດ້ຕີລາຄາສູງຄວາມໝາຍສຳຄັນ ຂອງບັນດາມະຕິ ທີ່ເຜີຍແຜ່ແລະເນັ້ນວ່າຈຸດປະສົງກໍເພື່ອ ໃຫ້ພະນັກງານການນຳຫຼັກແຫຼ່ງຮັບຮູ້ເຂົ້າໃຈ ແລະ ກຳໄດ້ເນື້ອໃນຢ່າງເລິກເຊິ່ງພ້ອມກັນນຳໄປສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດໃຫ້ໄດ້ຮັບຜົນດີ. ພ້ອມນີ້ກໍມີຄໍາເນັ້ນໜັກໃຫ້ຄະນະພັກ, ອຳນາດການປົກຄອງທົ່ວແຂວງກໍຄືທົ່ວສັງຄົມ ໄດ້ເຂົ້າໃຈຕໍ່ການປະຕິບັດ ສອຈ ຄື: 1) ເຂົ້າໃຈເຫດຜົນຄວາມເປັນຈິງຂອງ ສອຈ; 2) ມີຖານຂໍ້ມູນການຜະລິດ; 3) ສຸມໃສ່ເປົ້າໝາຍສຳຄັນຂອງການຜະລິດ, ການຕະຫຼາດ, ລາຄາ; 4) ບຸກທະລຸພື້ນຖານໂຄງລ່າງລະບົບໂທລະຄົມ, ເສັ້ນທາງ, ໄຟຟ້າ, ນໍ້າປະປາ; 5) ແກ້ໄຂບັນຫາພື້ນຖານດ້ານການຄ້າ, ດ້ານພະລັງງານ, ດ້ານງົບປະມານ, ບັນຫາແຮງງານ; 6) ວິທີປະຕິບັດແບ່ງຄວາມຮັບຜິດຊອບຄະນະພັກ-ພະນັກງານຕ້ອງເປັນແບບຢ່າງ, ຜົນການຈັດຕັ້ງປະຕິບັດຂອງ ສອຈ ພະແນກການຕ້ອງກຳນົດເປັນແຜນງານຈັດຕັ້ງປະຕິບັດໃຫ້ລະອຽດ. ອົງການຈັດຕັ້ງມະຫາຊົນເຕົ້າໂຮມຄວາມສາມັກຄີ ປຸກລະດົມຂົນຂວາຍເປັນກຳລັງໃນການຈັດຕັ້ງປະຕິບັດ ສອຈ. ອົງການຕຸລາການເຂັ້ມງວດການປະຕິບັດກົດໝາຍ, ນັກຮຽນຮູ້ສະຖາບັນການສຶກສາຕ້ອງມີການຄົ້ນຄວ້າ.
ໃນໂອກາດນີ້ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກກໍໄດ້ຮ່ວມຈັບມືແຂ່ງຂັນກັບຄະນະບໍລິຫານງານພັກແຂວງ, ພະແນກການຂອງແຂວງ, ກໍາລັງປກຊ-ປກສ, ນະຄອນປາກເຊ ແລະ 9 ເມືອງ ເພື່ອຮ່ວມກັນຈັດຕັ້ງປະຕິບັດ ສອຈ ໃຫ້ມີຜົນສໍາເລັດ, ພາເສດຖະກິດຂອງແຂວງຈໍາປາສັກ ຂະຫຍາຍຕົວດີຂຶ້ນ.
(ຂ່າວ-ພາບ: ຈັນທະວີສັກ)