ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຈີນມີຄວາມໝັ້ນໃຈຈະເອົາຊະນະການແຜ່ລະບາດຂອງພະຍາດອັກເສບປອດສາຍພັນໃໝ່ດ້ວຍທ່າແຮງດ້ານລະບອບ

ໃນວັນທີ 3 ກຸມພາ 2020, ຄະນະປະຈຳກົມການເມືອງສູນກາງພັກກອມມູນິດຈີນ ໄດ້ຈັດກອງປະຊຸມເພື່ອປຶກສາຫາລື ແລະ ຄົ້ນຄວ້າກ່ຽວກັບວຽກງານປ້ອງກັນ ແລະ ຄວບຄຸມພະຍາດໃນບາດກ້າວຕໍ່ໄປ.
ກອງປະຊຸມໃນຄັ້ງນີ້ ຊີ້ອອກວ່າ ການແຜ່ລະບາດຂອງພະຍາດໃນຄັ້ງນີ້ ເປັນການທົດສອບຄັ້ງໃຫຍ່ຕໍ່ລະບົບ ແລະ ຄວາມສາມາດດ້ານການບໍລິຫານຂອງສປ ຈີນ.
ປະຈຸບັນ, ໜ້າທີ່ຫຼັກອັນພົ້ນເດັ່ນໃນວຽກງານປ້ອງກັນ ແລະ ຄວບຄຸມພະຍາດນີ້ກໍ່ແມ່ນສຸມກຳລັງສຸດຂີດເພື່ອປິ່ນປົວຄົນເຈັບ, ຮັບປະກັນການສະໜອງອຸປະກອນການແພດ, ພະຍາຍາມຍົກສູງອັດຕາການປິ່ນປົວຄົນເຈັບ ແລະ ອັດຕາປິ່ນປົວໃຫ້ຫາຍປົກກະຕິ, ຫຼຸດຜ່ອນອັດຕາຕິດເຊື້ອ ແລະ ອັດຕາການຕາຍຍ້ອນເປັນພະຍາດ.
ພ້ອມກັນນັ້ນ, ກອງປະຊຸມຍັງໄດ້ຮຽກຮ້ອງໃຫ້ຮັບປະກັນການສະໜອງເຄື່ອງບໍລິໂພກທີ່ຈຳເປັນໃນຊີວິດປະຈຳວັນ ເຊັ່ນ:ຜັກ, ຊີ້ນ ໄຂ່ ນົມ ແລະ ສະບຽງອາຫານໃຫ້ແກ່ປະຊາຊົນ.
ໃນວັນທີ 3 ກຸມພານີ້, ສະຖານີວິທະຍຸໂທລະພາບສູນກາງຈີນໄດ້ລົງພິມບົດຄວາມທີ່ມີຫົວຂໍ້ວ່າ “ຈີນມີຄວາມໝັ້ນໃຈທີ່ຈະເອົາຊະນະບັ້ນປ້ອງກັນ ແລະ ຄວບຄຸມການແຜ່ລະບາດຂອງພະຍາດດ້ວຍທ່າແຮງດ້ານລະບອບ” ໂດຍຊີ້ອອກວ່າ, ທ່າແຮງດ້ານລະບອບເປັນທ່າແຮງໃຫຍ່ທີ່ສຸດຂອງປະເທດໜຶ່ງ. ຖ້າຢາກເອົາຊະນະບັ້ນປ້ອງກັນ ແລະ ຄວບຄຸມການແຜ່ລະບາດຂອງພະຍາດໃນຄັ້ງນີ້, ກໍ່ຕ້ອງການເສີມຂະຫຍາຍທ່າແຮງຂອງລະບອບສັງຄົມນິຍົມທີ່ມີສີສັນພິເສດຂອງຈີນຢ່າງເຕັມສ່ວນພາຍໃຕ້ການນຳພາຂອງພັກກອມມູນິດຈີນ, ເພິ່ງພາອາໄສ ແລະ ຕິດແທດກັບປະຊາຊົນຢ່າງໃກ້ຊິດ, ຮັກສາຄວາມໝັ້ນໃຈຂອງຕົນຢ່າງເດັດດ່ຽວໜຽວແໜ້ນ, ຮ່ວມແຮງຮ່ວມໃຈກັນຜ່ານຜ່າຄວາມຫຍຸ້ງຍາກ, ປ້ອງກັນ ແລະ ປິ່ນປົວຕາມຫຼັກ ວິທະຍາສາດ, ແລະ ປະຕິບັດມາດຕະການຢ່າງຖືກຕ້ອງກັບເປົ້າໝາຍທີ່ແນ່ນອນ.


ບົນພື້ນຖານດັ່ງກ່າວນີ້ເອງ, ອຸປະກອນການແພດໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດ ແລະ ການຮັບປະກັນເຄື່ອງບໍລິໂພກຊຶ່ງເປັນປະເດັນທີ່ໄດ້ຮັບຄວາມສົນໃຈຫຼາຍຈາກປະຊາຄົມໂລກນັ້ນ ຈຶ່ງໄດ້ຮັບຄວາມສຳເລັດຢ່າງບໍ່ຢຸດຢັ້ງ. ແນ່ນອນຢູ່ແລ້ວວ່າ, ທ່າແຮງຂອງລະບອບສັງຄົມນິຍົມທີ່ມີສີສັນພິເສດຂອງຈີນພວມຫັນປ່ຽນກາຍເປັນປະສິດທິຜົນດ້ານການບໍລິຫານຢ່າງຕໍ່ເນື່ອງ, ສາມາດແກ້ໄຂບັນຫາ ແລະ ສິ່ງທ້າທາຍໃນຂະບວນການຈັດຕັ້ງປະຕິບັດນະໂຍບາຍ ແລະ ມາດຕະການຕ່າງໆ, ຊຸກຍູ້ໃຫ້ວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໄດ້ຮັບຄວາມຄືບໜ້າ. ບົດຄວາມຊີ້ອອກຕື່ມວ່າ, ນັບແຕ່ການສະຖາປະນາສປ ຈີນເປັນເວລາ 70 ປີຜ່ານມາແລ້ວ, ລະບອບ ແລະ ລະບົບການບໍລິຫານປະເທດສັງຄົມນິຍົມທີ່ມີສີສັນພິເສດຂອງຈີນໄດ້ເປັນຮູບເປັນຮ່າງຂຶ້ນເທື່ອລະກ້າວ, ທັງໄດ້ສະແດງໃຫ້ເຫັນທ່າແຮງຂອງລະບອບຫຼາຍດ້ານໃນພຶດຕິກຳຕົວຈິງ. ປະຈຸບັນ, ການປ້ອງກັນ ແລະ ຄວບຄຸມການແຜ່ລະບາດຂອງພະຍາດຍັງຢູ່ໃນສະພາບການທີ່ຂ້ຽວຂາດ, ຍັງມີຫຼາຍບັນຫາທີ່ຕ້ອງການປະສານງານ ແລະ ແກ້ໄຂຢ່າງຮີບດ່ວນຢູ່. ກອງປະຊຸມຄະນະປະຈຳກົມການເມືອງສູນກາງພັກກອມມູນິດຈີນທີ່ຖືກຈັດຂຶ້ນໃນວັນທີ 3 ກຸມພາຜ່ານມານີ້ ໄດ້ຊີ້ບອກວ່າ ຕ້ອງສະຫຼຸບບົດຮຽນທັງດ້ານບວກ ແລະ ດ້ານລົບ. ສຳລັບຈຸດອ່ອນ ແລະ ຂໍ້ບົກຜ່ອງທີ່ຖືກເປີດເຜີຍໃນການຮັບມືກັບການແຜ່ລະບາດຂອງພະຍາດໃນຄັ້ງນີ້, ແມ່ນຕ້ອງປັບປຸງບູລະນະລະບົບ ແລະ ກົນໄກການຮັບມືເຫດການສຸກເສີນຂອງລັດ, ຍົກສູງຄວາມສາມາດໃນການປະຕິບັດໜ້າທີ່ອັນຮີບດ່ວນ,ຫຍຸ້ງຍາກ, ອັນຕະລາຍ ແລະ ໜັກໜ່ວງ; ຕ້ອງກວດກາ ແລະ ປັບປຸງສະພາບແວດລ້ອມທາງດ້ານສາທາລະນະສຸກຢ່າງເຖິງກົກເຖິງຮາກ; ຕ້ອງເພີ່ມທະວີການຕິດຕາມກວດກາຕະຫຼາດຜູ້ບໍລິໂພກ; ຕ້ອງເພີ່ມທະວີການເສີມສ້າງລະບຽບການທາງກົດໝາຍ; ຕ້ອງຄົ້ນຄວ້າຈຸດອ່ອນໃນລະບົບຄັງສຳຮອງຂອງລັດ, ຍົກສູງປະສິດທິຜົນຂອງຄັງສະສົມ, ແລະ ປັບປຸງໂຄງປະກອບຄວາມສາມາດການຜະລິດເຄື່ອງບໍລິໂພກອຸປະໂພກທີ່ ສຳຄັນ.
ບົດຄວາມຍັງຊີ້ອອກອີກວ່າ ຈີນມີຄວາມຮັບຮູ້ ແລະ ສາມາດວິນິດໄສຕໍ່ບັນຫາທີ່ເກີດຂຶ້ນ ແລະ ນະໂຍບາຍຮັບມືໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໄດ້ຢ່າງຊັດເຈນ.
ເຖິງວ່າຈະມີໜ້າທີ່ອັນໜັກໜ່ວງກໍ່ຕາມ, ຂໍພຽງແຕ່ຮູ້ເສີມຂະຫຍາຍທ່າແຮງດ້ານລະບອບຢ່າງເຕັມສ່ວນ, ແລະ ຮູ້ເພິ່ງພາອາໄສປະຊາຊົນຢ່າງໃກ້ຊິດ, ຈີນກໍ່ຈະສາມາດເອົາຊະນະບັ້ນປ້ອງກັນ ແລະ ຄວບຄຸມການແຜ່ລະບາດຂອງພະຍາດໃນຄັ້ງນີ້ໄດ້ຢ່າງແນ່ນອນ, ທັງສາມາດປົກປ້ອງຄວາມປອດໄພດ້ານຊີວິດ ແລະ ສຸຂະພາບທີ່ແຂງແຮງຂອງປະຊາຊົນໄດ້ດີ, ສ້າງຜົນງານອັນພົ້ນເດັ່ນໃນການຍົກລະດັບຂອງລະບົບການບໍລິຫານ ແລະ ຄວາມສາມາດດ້ານການບໍລິຫານຢ່າງບໍ່ຢຸດຢັ້ງ.