ໃນຕອນຄໍ່າວັນທີ 24 ມິຖຸນາ 2022 ທີ່ນະຄອນຫລວງປັກກິ່ງ, ທ່ານ ສີຈິ້ນຜິງ, ປະທານປະເທດຈີນ ໄດ້ເປັນປະ ທານຈັດກອງປະຊຸມສົນທະນາລະດັບສູງກ່ຽວກັບການພັດທະນາຂອງໂລກ ຜ່ານລະບົບທາງໄກ ໂດຍມີການນໍາ ຈາກເກືອບ 20 ປະເທດເຂົ້າຮ່ວມ, ໃນນີ້ລວມທັງ ທ່ານ ວາລາດີເມຍ ປູຕີນ, ປະທານນາທິບໍດີ ຣັດເຊຍ, ທ່ານ ໄຊຣີລ ຣາມາໂຟຊາ, ປະທານນາທິບໍດີອາຟິກກາໃຕ້, ສ່ວນໃນອາຊຽນມີ ນາຍົກລັດຖະມົນຕີກໍາປູເຈ່ຍ, ນາຍົກລັດຖະມົນຕີໄທ, ນາຍົກລັດຖະມົນຕີມາເລເຊຍ ແລະ ປະທານນາທິບໍດີອິນໂດເນເຊຍ ເຂົ້າຮ່ວມ.
ທ່ານ ສີຈິ້ນຜິງ ໄດ້ກ່າວປາໄສ ວ່າ: ຈີນ ແມ່ນສະມາຊິກໃນວົງຄະນາຍາດໃຫຍ່ຂອງປະເທດພວມພັດທະນາຕະ ຫຼອດມາ. ຈີນ ຈະໃຊ້ມາດຕະຖານຕົວຈິງ ສືບຕໍ່ສະໜັບສະໜູນວາລະການພັດທະນາແບບຍືນຍົງຮອດປີ 2030 ຂອງອົງ ການສະຫະປະຊາຊາດ, ຈະເພີ່ມທະວີການນຳໃຊ້ຊັບພະ ຍາກອນເຂົ້າໃນການຮ່ວມມືດ້ານການພັດທະນາຂອງໂລກ, ຍົກລະດັບກອງທຶນຊ່ວຍເຫຼືອການຮ່ວມມືໃຕ້ໃຕ້ຂຶ້ນເປັນ “ ກອງທຶນການພັດທະນາທົ່ວໂລກ ແລະ ການຮ່ວມມືໃຕ້ໃຕ້ ”, ເພີ່ມການປະກອບທຶນເຂົ້າໃນກອງທຶນສັນຕິພາບ ແລະ ການພັດທະນາຈີນ-ອົງການສະຫະປະຊາຊາດ, ສະໜັບ ສະໜູນການຮ່ວມມືພາຍໃຕ້ຂໍ້ລິເລີ່ມການພັດທະນາທົ່ວ ໂລກ.
ຈີນ ຈະຮ່ວມມືກັບຝ່າຍຕ່າງໆ ເພື່ອຊຸກຍູ້ການຮ່ວມມືໃນຂົງເຂດສຳຄັນ, ປຸກລະດົມຊັບພະຍາກອນດ້ານການພັດ ທະນາ, ລົງເລິກການຮ່ວມມືດ້ານການຫຼຸດຜ່ອນຄວາມທຸກ ຍາກ ແລະ ການຫຼຸດພົ້ນອອກຈາກຄວາມທຸກຍາກໃນທົ່ວ ໂລກ, ຍົກລະດັບຄວາມສາມາດດ້ານການຜະລິດ ແລະ ການສະໜອງສະບຽງອາຫານ, ຊຸກຍູ້ສາຍພົວພັນຄູ່ຮ່ວມດ້ານພະລັງງານສະອາດ; ເພີ່ມທະວີການປະດິດສ້າງ, ຄົ້ນຄວ້າພັດທະນາ ແລະ ຮ່ວມກັນຜະລິດວັດຊີນ; ຊຸກຍູ້ການອະນຸລັກ ແລະ ການນຳໃຊ້ແບບຍືນຍົງຂອງລະບົບນິເວດທາງບົກ ແລະ ທາງທະເລ; ຍົກລະດັບຄຸນທາດ ແລະ ເຕັກນິກດີຈີຕອນຂອງທົ່ວປວງຊົນ, ເລັ່ງລັດການຫັນປ່ຽນຮູບ ແບບການພັດທະນາ ແລະ ຍົກລະດັບການຫັນເປັນອຸດ ສາຫະກຳ, ຊຸກຍູ້ການເຊື່ອມໂຍງເຊື່ອມຈອດກັນໃນຍຸກດີຈີຕອນ ແລະ ເພີ່ມແຮງຂັບເຄື່ອນໃໝ່ເຂົ້າໃນການພັດທະນາຂອງບັນດາປະເທດ.
ທ່ານ ສີຈິ້ນຜິງ ກ່າວຢໍ້າຕື່ມວ່າ: ຈີນ ຈະສ້າງເວທີສາກົນເພື່ອແລກປ່ຽນຄວາມຮູ້ ແລະ ບົດຮຽນດ້ານການພັດ ທະນາ, ສ້າງສູນຊຸກຍູ້ການພັດທະນາຂອງໂລກ, ສ້າງເຄືອຂ່າຍຄວາມຮູ້ກ່ຽວກັບການພັດທະນາຂອງໂລກ, ດຳເນີນການແລກປ່ຽນບົດຮຽນດ້ານການປົກຄອງບໍລິຫານປະເທດ, ຊຸກຍູ້ການຮ່ຳຮຽນແລະການຖອດຖອນບົດຮຽນເຊິ່ງກັນ ແລະກັນ; ຈັດກອງ ປະຊຸມເວທີປຶກສາຫາລືການພັດທະນາຂອງຊາວໜຸ່ມໂລກ, ຮ່ວມກັນລິເລີ່ມແຜນການດຳເນີນງານແຫ່ງການພັດທະນາຊາວໜຸ່ມໂລກ, ເຕົ້າໂຮມກຳລັງຢ່າງກວ້າງຂວາງທີ່ສຸດເພື່ອຈັດຕັ້ງປະຕິບັດວາລະການພັດທະ ນາແບບຍືນຍົງຮອດປີ 2030 ຂອງອົງການສະຫະປະຊາ ຊາດ.
ໃນກອງປະຊຸມຄັ້ງນີ້ ຜູ້ນໍາແຕ່ລະປະເທດ ໄດ້ຜັດປ່ຽນກັນກ່າວຄໍາປາໄສ ເຊີ່ງແຕ່ລະທ່ານລ້ວນແຕ່ສະແດງຄວາມຂອບໃຈຕໍ່ຈີນທີ່ໄດ້ລິເລີ່ມ ແລະ ເປັນເຈົ້າພາບໃນການໂອ້ ລົມສົນທະນາລະດັບສູງກ່ຽວກັບການພັດທະນາທົ່ວໂລກ, ພ້ອມທັງໄດ້ຊົມເຊີຍຕໍ່ຄວາມເຂົ້າໃຈຂອງປະທານປະເທດຈີນ ກ່ຽວກັບການຮ່ວມມືກັນພັດທະນາທົ່ວໂລກທີ່ປັດຈຸ ບັນຕ້ອງປະເຊີນກັບສິ່ງທ້າທາຍຫລາຍຢ່າງ. ບັນດາຜູ້ນໍາໄດ້ສະໜັບສະໜູນຂໍ້ລິເລີ່ມຂອງຈີນໃນການພັດທະນາໂລກ ແລະ ຕົກລົງກັນວ່າ ການພັດທະນາແມ່ນພື້ນຖານດ້ານຄວາມປອດໄພ ແລະ ຄວາມປອດໄພ ເປັນບູລິມະຕິສໍາລັບການພັດທະ ນາ, ພ້ອມທັງສະແດງຄວາມເຊື່ອໝັ້ນວ່າ: ຂໍ້ລິເລີ່ມຂອງຈີນ ສະແດງເຖິງຄວາມເປັນຫ່ວງເປັນໄຍ ແລະ ຕອບສະໜອງກັບຄວາມຕ້ອງການຂອງບັນດາປະເທດທີ່ກໍາລັງພັດທະນາ, ການພັດທະນາຊັບພະຍາກອນ ແລະ ເລັ່ງຈັດຕັ້ງຜັນຂະ ຫຍາຍວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ. ນອກຈາກນີ້ ບັນດາຜູ້ນໍາຍັງສະແດງຄວາມຫວັງທີ່ຈະຍົກລະດັບການຮ່ວມມືໃນຫລາຍຂົງເຂດກັບຈີນ ເປັນຕົ້ນ: ການແກ້ໄຂຄວາມທຸກຍາກ, ການປ້ອງກັນ ແລະ ຄວບຄຸມພະຍາດລະ ບາດ, ຄວາມປອດໄພດ້ານສະບຽງອາຫານ, ຄວາມປອດໄພດ້ານພະລັງງານ ແລະ ອື່ນໆ.
Source: Xinhua