ຕອນບ່າຍວັນທີ 28 ມິຖຸນານີ້, ປະມຸກລັດສອງປະເທດຈີນແລະຣັດເຊຍໄດ້ພົບປະກັນໂດຍຜ່ານທາງວິດີໂອ ແລະ ໄດ້ອອກຖະແຫຼງການຮ່ວມ ໂດຍໄດ້ຕົກລົງເຫັນດີຢ່າງເປັນທາງການໃຫ້ຕໍ່ອາຍຸ “ສົນທິສັນຍາມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນແລະຣັດເຊຍ”.
ໃນວິດີໂອ, ທ່ານວະລາດີເມຍ ປູຕິນ ປະທານາທິບໍດີຣັດເຊຍມີຄວາມຍິ້ມແຍ້ມແຈ່ມໃສ, ໂບກມືຖາມສະບາຍດີທ່ານປະທານສີຈິ້ນຜິງ. ນະໂອກາດນີ້, ທ່ານປູຕິນກໍໄດ້ສະແດງຄວາມຊົມເຊີຍຢ່າງອົບອຸ່ນຕໍ່ວັນສ້າງຕັ້ງພັກກອມມູນິດຈີນຄົບຮອບ 100 ປີ. ທ່ານກ່າວຕື່ມວ່າ: “ຣັດເຊຍຫວັງຢາກເພີ່ມທະວີການສົນທະນາກັບພັກກອມມູນິດຈີນຕື່ມອີກ, ນີ້ຈະມີຜົນດີສຳລັບການລົງເລິກແລະເພີ່ມທະວີການຮ່ວມມືກັນ, ການເພີ່ມຄວາມເຂົ້າໃຈກັນ ແລະ ຄວາມໄວ້ເນື້ອເຊື່ອໃຈກັນລະຫວ່າງສອງປະເທດພວກເຮົາ.
ສອງປະເທດຈີນແລະຣັດເຊຍໄວ້ເນື້ອເຊື່ອໃຈກັນແລະປະສານງານກັນ, ຈະເຮັດໃຫ້ການພົວພັນລະຫວ່າງສອງປະເທດຂະຫຍາຍຕົວຢ່າງໜັກແໜ້ນກວ່າເກົ່າໂດຍບໍ່ຢ້ານກົວຕໍ່ການກໍ່ກວນຈາກພາຍນອກ. ການພົວພັນລະຫວ່າງສອງຝ່າຍທີ່ສ້າງຕັ້ງຂຶ້ນບົນພື້ນຖານຄວາມສະເໝີພາບກັນ ແລະ ເຄົາລົບເຊິ່ງກັນແລະກັນແບບນີ້ ໄດ້ເຮັດໃຫ້ປະເທດຕາເວັນຕົກ ທີ່ນຳພາໂດຍອາເມຣິກາຮູ້ສຶກກັງວົນ ແລະ ຢ້ານກົວ.
ກ່ອນໜ້ານີ້ບໍ່ດົນ, ທ່ານໂຈ ໄບເດັນ ປະທານາທິບໍດີອາເມຣິກາໄດ້ເຊື້ອເຊີນທ່ານປູຕິນໄປພົບປະກັນຢູ່ນະຄອນເຊີແນວຢ່າງເປັນເຈົ້າການ. ໃນການພົບປະຄັ້ງນີ້, ທ່ານໂຈ ໄບເດັນໄດ້ຊີ້ໃຫ້ເຫັນວ່າ: ເສດຖະກິດຈີນໄດ້ພັດທະນາຢ່າງວ່ອງໄວ, ຈະເປັນໄພຂົ່ມຂູ່ຕໍ່ຣັດເຊຍ, ຖ້ອຍຄຳດັ່ງກ່າວຄືມີເຈດຕະນາ “ຢາກຊີ້ທາງທີ່ຖືກຕ້ອງ” ແກ່ຣັດເຊຍ ໂດຍ “ຢືນຢູ່ຝ່າຍດຽວກັບຣັດເຊຍ” ເພື່ອທຳລາຍການພົວພັນຈີນແລະຣັດເຊຍ.
ເຖິງວ່າ, ອາເມຣິກາໄດ້ໃສ່ຮ້າຍປ້າຍສີການພົວພັນຈີນ-ຣັດເຊຍຫຼາຍປານໃດກໍຕາມ, ການພົວພັນຈີນແລະຣັດເຊຍກໍແຮ່ງໄດ້ເດີນໄປຕາມທິດທາງຮ່ວມມືທີ່ຖືກຕ້ອງ. ໂດຍຢືນຢູ່ຈຸດປະຫວັດສາດພິເສດເນື່ອງໃນໂອກາດວັນສ້າງຕັ້ງພັກກອມມູນິດຈີນຄົບຮອບ 100 ປີ, ການຕໍ່ອາຍຸ “ສົນທິສັນຍາມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນແລະຣັດເຊຍ”, ອາດເວົ້າໄດ້ວ່າ: ຣັດເຊຍໄດ້ມອບຂອງຂວັນພິເສດໃຫ້ແກ່ພັກກອມມູນິດຈີນ, ທັງເປັນການຕອບໂຕ້ການໃສ່ຮ້າຍປ້າຍສີຂອງອາເມຣິກາທີ່ມີຕໍ່ການພົວພັນລະຫວ່າງຈີນແລະຣັດເຊຍ ແລະ ຍິ່ງຈະເປັນການສ້າງພື້ນຖານທີ່ໝັ້ນແກ່ນກວ່າເກົ່າໃຫ້ແກ່ການຂະຫຍາຍການພົວພັນຈີນແລະຣັດເຊຍໃຫ້ແໜ້ນແຟ້ນຖາວອນ.
ໃນຫຼາຍປີມໍ່ໆມານີ້, ບົນພື້ນຖານ “ສົນທິສັນຍາມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນແລະຣັດເຊຍ”, ຈີນແລະຣັດເຊຍໄດ້ປະສົບຜົນສຳເລັດໃນການຮ່ວມມືໃນຂົງເຂດການເມືອງ, ເສດຖະກິດ, ວິທະຍາສາດເຕັກໂນໂລຊີ ແລະ ຂົງເຂດອື່ນໆ ພ້ອມທັງໄດ້ເພີ່ມທະວີການແລກປ່ຽນແລະຮ່ວມມືໃນການຮ່ວມກັນໂຈມຕີລັດທິກໍ່ການຮ້າຍ ແລະ ລັດທິຫົວຮຸນແຮງ. ການທີ່ຈີນແລະຣັດເຊຍປະສານງານກັນແລະຮ່ວມມືກັນ, ເປັນການເສີມຂະຫຍາຍບົດບາດອັນໜັກແໜ້ນໃນວຽກງານສາກົນຕ່າງໆ ເຊັ່ນ: ບັນຫາຊີຣີ, ບັນຫາອັຟການິສະຖານ, ການຟື້ນຟູສັນຍາຮອບດ້ານກ່ຽວກັບບັນຫານິວເຄຼຍອີຣານ ແລະ ບັນຫາອື່ນໆ.
ພາຍໃຕ້ສະພາບການທີ່ປະເທດຕາເວັນຕົກ ທີ່ນຳພາໂດຍອາເມຣິກາ ໄດ້ອ້າງວ່າຕົນຍຶດໝັ້ນໃນລັດທິຫຼາຍຝ່າຍ, ທີ່ຈິງແລ້ວໄດ້ຜູກເປັນວົງແຄບແລະປະຕິບັດງານແບບລັດທິຝ່າຍດຽວ ເພື່ອສະແຫວງຫາສິດເປັນເຈົ້າໂລກ ແລະ ທຳລາຍລະບຽບການສາກົນຢ່າງຮ້າຍແຮງນັ້ນ, ການຮ່ວມມືລະຫວ່າງຈີນແລະຣັດເຊຍ ໄດ້ກາຍເປັນກຳລັງທີ່ສຳຄັນໃນການປົກປັກຮັກສາສັນຕິພາບແລະຄວາມໝັ້ນຄົງຂອງໂລກ.
ການທີ່ປະມຸກລັດສອງປະເທດປະກາດຕໍ່ອາຍຸ “ສົນທິສັນຍາມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນແລະຣັດເຊຍ” ຄັ້ງນີ້, ໄດ້ສົ່ງສັນຍານອັນໜັກແໜ້ນໃຫ້ກັບໂລກ, ເປັນການປະກອບສ່ວນຫຼາຍກວ່າເກົ່າ ເພື່ອປົກປັກຮັກສາສັນຕິພາບແລະຄວາມໝັ້ນຄົງຂອງໂລກ.
Loading...