ປັດຈຸບັນ, ລະດູການຂອງຖົ່ວລຽນໄດ້ມາເຖິງແລ້ວ. ຖົ່ວລຽນຈຳນວນຫຼວງ ຫຼາຍໄດ້ຂົນສົ່ງເຂົ້າມາຕະຫຼາດຂອງຈີນ, ປະລິມານການສະໜອງເພີ່ມຂຶ້ນ ເຮັດໃຫ້ລາຄາຫຼຸດລົງ. ເຖິງວ່າລາຄາຂອງຖົ່ວລຽນແຕກຕ່າງກັນຕາມແນວພັນ ແລະ ຄຸນນະພາບ, ແຕ່ຄາລາໂດຍລວມຫຼຸດລົງ 20% ຫາ 30%. “ການກິນຖົ່ວລຽນຢ່າງເສລີ” ໄດ້ກາຍຫົວຂໍ້ສົນທະນາຍອດນິຍົມຂອງຜູ້ບໍລິໂພກຊາວຈີນໃນປັດຈຸບັນ.
ໃນຫຼາຍປີມານີ້, ການຄ້າຜະລິດຕະພັນກະສິກຳລະຫວ່າງຈີນ- ອາຊຽນໄດ້ພັດທະນາຢ່າງວ່ອງໄວ. ໝາກໄມ້, ນ້ຳມັນປາມ ແລະ ຜະລິດຕະພັນກະສິກຳອື່ນໆຂອງອາຊຽນໄດ້ເຂົ້າສູ່ຕະຫຼາດຈີນ ແລະໄດ້ຮັບຄວາມນິຍົມຊົມຊອບຈາກລູກຄ້າຈີນ. ໃນນັ້ນ, ຖົ່ວລຽນເປັນຕົວຢ່າງທີ່ພົ້ນເດັ່ນທີ່ສຸດ.
ດ່ານມິດຕະພາບຜິງສຽງທີ່ຕັ້ງຢູ່ຊາຍແດນຈີນ-ຫວຽດນາມ ເປັນຊ່ອງທາງບົກສຳຄັນທີ່ໝາກໄມ້ອາຊຽນເຂົ້າມາຈີນ. ຄຽງຄູ່ກັບການກໍ່ສ້າງເຂດການຄ້າເສລີຈີນ-ອາຊຽນໄດ້ເຂົ້າສູ່ລວງເລິກ, ສັນຍາການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນ ຫຼື RCEP ມີຜົນບັງຄັບໃຊ້ຢ່າງຮອບດ້ານ, ຊ່ອງທາງໃໝ່ທີ່ເຊື່ອມຕໍ່ທາງທະເລ ແລະ ທາງບົກພາກຕາເວັນຕົກຂອງຈີນ ແລະ ໂຄງ ການເຊື່ອມຕໍ່ເຊື່ອມຈອດກັນຕ່າງໆໄດ້ເລັ່ງລັດການກໍ່ສ້າງ ພ້ອມ ດ້ວຍລະບົບຂົນສົ່ງສິນຄ້າແຊ່ເຢັນຂ້າມຊາດ ແລະ ການຄ້າເອເລັກໂຕຣນິກໄດ້ມີການພັດທະນາຢ່າງວ່ອງໄວ, ການວາງເງື່ອນໄຂ ແລະ ມາດຕະການຕ່າງໆເພື່ອອຳນວຍຄວາມສະດວກໃຫ້ແກ່ການຜ່ານດ່ານ, ມາດຕະການດັ່ງກ່າວໄດ້ເຮັດໃຫ້ໝາກໄມ້ອາຊຽນເຂົ້າສູ່ຕະຫຼາດຈີນມີປະສິດທິພາບສູງກວ່າເກົ່າ ແລະ ສະດວກວ່ອງໄວກວ່າເກົ່າ.
ອີງຕາມສະຖິຕິຈາກດ່ານມິດຕະພາບສະແດງໃຫ້ເຫັນວ່າ: ໃນປີ 2023, ຈີນນຳເຂົ້າຖົ່ວລຽນຈາກໄທໂດຍຜ່ານດ່ານມິດຕະພາບມີເຖິງ 282.000 ໂຕນ, ເພີ່ມຂຶ້ນ 162,4% ເມື່ອທຽບໃສ່ໄລຍະດຽວກັນຂອງປີ 2022, ມີມູນຄ່າເຖິງ 10,17 ຕື້ຢວນ, ເພີ່ມຂຶ້ນ 163,2% ເມື່ອທຽບໃສໄລຍະດຽວກັນຂອງປີ 2022. ໃນໄຕ ມາດທຳອິດປີນີ້, ຈີນນຳເຂົ້າທຸລຽນສົດໂດຍຜ່ານດ່ານມິດຕະ ພາບມີເຖິງ 48.000 ໂຕນ ເຊິ່ງມີມູນຄ່າ 1 ຕື້ 85 ລ້ານຢວນ.
ພ້ອມກັນນັ້ນ, ຍ້ອນໄດ້ຮັບຜົນປະໂຫຍດຈາກທາງລົດໄຟຈີນ-ລາວ, ປະສິດທິພາບການຂົນສົ່ງໝາກໄມ້ຈາກບັນດາປະເທດສະມາຊິກອາຊຽນໄປສູ່ປະເທດຈີນໄດ້ຮັບການຍົກສູງຂຶ້ນຢ່າງ ຫຼວງຫຼາຍ.
ອີງຕາມຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ເມື່ອເຂົ້າສູ່ລະ ດູການຂອງໝາກໄມ້ຊະນິດຕ່າງໆຂອງອາຊີຕາເວັນອອກສຽງໃຕ້, ພາກສ່ວນທາງລົດໄຟຂອງຈີນໄດ້ເພີ່ມຂະບວນຂົນສົ່ງສິນຄ້າແຊ່ເຢັນ “ລົດໄຟດ່ວນແມ່ນ້ຳລ້ານຊ້າງ-ແມ່ນ້ຳຂອງ”. ເພື່ອຕອບສະໜອງຄວາມຕ້ອງການໃນການຂົນສົ່ງໝາກໄມ້ທີ່ເນົ່າງ່າຍ ເຊັ່ນ: ທຸລຽນ, ໝາກມັງຄຸດເປັນຕົ້ນ, ພາກສ່ວນທາງລົດໄຟຂອງຈີນໄດ້ຈັດສັນຕູ້ຄອນເທັນເນີແຊ່ເຢັນ 1.000 ກວ່າຕູ້ ເພື່ອໃຊ້ເຂົ້າໃນການຂົນສົ່ງດ້ວຍ “ລົດໄຟດ່ວນແມ່ນ້ຳລ້ານຊ້າງ-ແມ່ນ້ຳຂອງ”. ໃນຂະນະດຽວກັນ, ພາກສ່ວນທາງລົດໄຟຈີນຍັງໄດ້ສືບຕໍ່ປັບປຸງກົນ ໄກການຮ່ວມມືກັບດ່ານພາສີ,
ດ່ານກວດກາຊາຍແດນ ແລະ ອົງການອື່ນໆ, ຫຼຸດຂັ້ນຕອນການກວດກາຕື່ມອີກ ແລະ ຍົກສູງປະສິດທິພາບການຜ່ານດ່ານ. ນັບແຕ່ຕົ້ນປີນີ້ເປັນຕົ້ນມາ, ປະລິມານການນຳເຂົ້າ-ສົ່ງອອກສິນຄ້າປະເພດອາຫານສົດຜ່ານທາງລົດໄຟຈີນ-ລາວໄດ້ບັນລຸເຖິງ 64.000 ໂຕນແລ້ວ, ເພີ່ມຂຶ້ນ 2 ເທົ່າຂຶ້ນໄປເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ໄດ້ນຳເຂົ້າໝາກໄມ້ 58.000 ໂຕນ. ຕາມຂ່າວແຈ້ງໃຫ້ຮູ້ວ່າ: ການຂົນສົ່ງຖົ່ວລຽນຈາກໄທເຂົ້າມາຈີນໃນເມື່ອກ່ອນ, ຕ້ອງໃຊ້ເວລາປະມານ 7 ວັນ ເພື່ອຜ່ານທາງທະເລ ແລະ ຜ່ານທາງຫຼວງແມ່ນໃຊ້ເວລາປະມານ 5 ວັນ, ແຕ່ດຽວນີ້ໃຊ້ເວລາພຽງແຕ່ 3 ວັນເທົ່ານັ້ນ.
ອີງຕາມບົດລາຍງານທີ່ເປີດເຜີຍໂດຍທະນາຄານ HSBC ໃນປີ 2023 ສະແດງໃຫ້ເຫັນວ່າ: ຍ້ອນໄດ້ຮັບຄວາມນິຍົມຊົມຊອບຈາກລູກຄ້າຈີນ, ຄວາມຕ້ອງການຕໍ່ຖົ່ວລຽນໃນທົ່ວໂລກໄດ້ເພີ່ມ ຂຶ້ນ 400% ເມື່ອທຽບໃສ່ໄລຍະດຽວກັນຂອງປີ 2022, ສ່ວນຄວາມຕ້ອງການຂອງຈີນທີ່ມີຕໍ່ຖົ່ວລຽນໄດ້ກວມເອົາ 90% ຂຶ້ນ ໄປຂອງທົ່ວໂລກ. ຍ້ອນມີຄວາມຕ້ອງການດ້ານການບໍລິໂພກອັນໃຫຍ່ຫຼວງປານນີ້, ໄທ, ຫວຽດນາມ ແລະ ປະເທດອື່ນໃນອາຊີຕາເວັນອອກສຽງໃຕ້ໄດ້ຕັ້ງໜ້າເພີ່ມປະລິມານການປູກຖົ່ວລຽນ. ອີງຕາມລັດຖະບານໄທຄາດຄະເນວ່າ: ຍ້ອນຊາວກະສິກອນເປີດກວ້າງເນື້ອທີ່ປູກຖົ່ວລຽນ, ປະລິມານການຜະລິດຖົ່ວລຽນຂອງໄທໃນສົກປີ 2023-2024 ຈະເພີ່ມ ຂຶ້ນ 15,3%.
ກ່ອນໜ້ານີ້, ໝາກໄມ້ເຂດຮ້ອນຈາກອາຊຽນເຂົ້າມາຕະຫຼາດຈີນຍາກຫຼາຍ ຍ້ອນມີເງື່ອນໄຂຈຳກັດໃນດ້ານການຂົນສົ່ງ, ການ ເກັບຮັກສາ ແລະອື່ນໆ. ຄຽງຄູ່ກັບການຮ່ວມມືພາກພື້ນຈີນ- ອາຊຽນເຂົ້າສູ່ລວງເລິກ ແລະ ລະດັບການເຊື່ອມໂຍງເຊື່ອມຈອດກັນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ, ການຄ້າໝາກໄມ້ລະຫວ່າງຈີນກັບບັນດາປະເທດສະມາຊິກອາຊຽນຈະສືບຕໍ່ມີຄວາມຄຶກຄັກ ເຊິ່ງຈະຊ່ວຍຜູ້ບໍລິໂພກຊາວຈີນບັນລຸ “ຄວາມເສລີໃນການກິນທຸລຽນ” ກໍຄື “ຄວາມເສລີໃນການກິນໝາກໄມ້” ພ້ອມທັງສ້າງຜົນປະໂຫຍດອັນແທ້ຈິງໃຫ້ແກ່ຊາວກະສິກອນຜູ້ປູກໝາກໄມ້ຂອງບັນດາປະເທດອາຊີຕາເວັນອອກສຽງໃຕ້.
