ຊາວກະສິກອນເມືອງໜອງບົກເກັບກ່ຽວເຂົ້ານາແຊງໄດ້ແລ້ວ 1.533 ເຮັກຕາ

ທ່ານ ສຸກສະຫວັນ ສຸວັນນະລາດ ຮອງຫົວໜ້າຫ້ອງການກະສິກໍາ ແລະ ປ່າໄມ້ປະຈໍາເມືອງໜອງບົກ ແຂວງຄໍາມ່ວນໃຫ້ຮູ້ວ່າ : ໃນລະດູການຜະລິດເຂົ້ານາແຊງປີ 2022-2023  ທົ່ວເມືອງມີເນື້ອທີ່ແຜນການ 3.250 ເຮັກຕາ , ຄາດຄະເນຜົນຜະລິດ 18.103 ໂຕນ , ໃນນີ້ແຜນການປູກເຂົ້າເພື່ອເປັນສະບຽງອາຫານ 1.200 ເຮັກຕາ , ຄາດຄະເນຜົນຜະລິດ 6.672 ໂຕນ , ແຜນການປູກເຂົ້າເພື່ອເປັນສິນຄ້າ 2.050 ເຮັກຕາ , ຄາດຄະເນຜົນຜະລິດ 11.431 ໂຕນ .

 ຜ່ານການຈັດຕັ້ງປະຕິບັດຕົວຈິງໄດ້ 3.833 ເຮັກຕາ ,ໃນນັ້ນນາຫວ່ານ 2.600 ເຮັກຕາ , ນາປັກດໍາ 1.233 ເຮັກຕາ , ພື້ນທີ່ປູກເຂົ້າເພື່ອເປັນສະບຽງອາຫານປະຕິບັດໄດ້ 1.200 ເຮັກຕາ ເທົ່າກັບ 100 % ຂອງແຜນການ , ພື້ນທີ່ປູກເຂົ້າເພື່ອເປັນສິນຄ້າປະຕິບັດໄດ້ 2.633 ເຮັກຕາ ເທົ່າກັບ 128 % ຂອງແຜນການ ( ລື່ນແຜນ 28 % ) .

 ດ້ານການເກັບກ່ຽວເຂົ້າຂອງປະຊາຊົນແມ່ນເຮັດເປັນສອງລະບົບຄື : ເກັບກ່ຽວໂດຍໃຊ້ແຮງງານຄົນ ແລະ ເກັບກ່ຽວໂດຍໃຊ້ກົນຈັກທັນສະໄໝ , ມາຮອດປະຈຸບັນສາມາດເກັບກ່ຽວໄດ້ໃນເນື້ອທີ່ 1.533 ເຮັກຕາ ເທົ່າກັບ 40 % ຂອງເນື້ອທີ່ຕົວຈິງ . ໃນນີ້ພື້ນທີ່ປູກເຂົ້າເພື່ອເປັນສະບຽງອາຫານປະຕິບັດໄດ້ 2.542 ເຮັກຕາ ເທົ່າກັບ 64,44 % ຂອງເນື້ອທີ່ຕົວຈິງ , ພື້ນທີ່ປູກເຂົ້າເພື່ອເປັນສິນຄ້າປະຕິບັດໄດ້ 4.699 ເຮັກຕາ ເທົ່າກັບ 64,17 % ຂອງເນື້ອທີ່ຕົວຈິງ .

 ສ່ວນວ່າສາຍເຫດທີ່ເຮັດເນື້ອທີ່ທໍາການຜະລິດເຂົ້ານາແຊງໃນປີນີ້ລື່ນແຜນການຍ້ອນວ່າຊາວກະສິກອນໄດ້ທໍາການປູກເຂົ້ານອກເຂດໂຄງການຊົນລະປະທານຕື່ມເປັນຕົ້ນແມ່ນຢູ່ເຂດບ້ານທີ່ມີເງື່ອນໄຂດ້ານແຫຼ່ງນໍ້າເຊັ່ນ : ຫ້ວຍ,ຮ່ອງ,ຄອງ ,ບຶງ . ຄາດວ່າການເກັບກ່ຽວເຂົ້າຈະໃຫ້ສໍາເລັດໃນຕົ້ນເດືອນມີຖຸນາ 2023.

ຂ່າວ:ແຂວງຄໍາມ່ວນ