ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຊາວກະສິກອນ ເມືອງປາກທາ ແຂວງບໍ່ແກ້ວ ເກັບກ່ຽວເຂົ້ານາແຊງ ສຳເລັດ 90 %

ປະຈຸບັນຊາວກະສິກອນ ເມືອງປາກທາ ແຂວງບໍ່ແກ້ວ ພວມຂຸ້ນຂ້ຽວເກັບກ່ຽວຜົນຜະລິດເຂົ້ານາແຊງ ລະດູແລ້ງຢ່າງເປັນຂະບວນການຟົດຟື້ນ.  ທ່ານ  ນ ທິບພະຈັນ ຈັນທະລາດ ຫົວໜ້າໜ່ວຍງານປູກຟັງ ຫ້ອງການ ກະສິກຳ ແລະ ປ່າໄມ້ເມືອງປາກທາ ແຂວງບໍ່ແກ້ວ ໄດ້ລາຍງານໃຫ້ຮູ້ວ່າ: ການເກັບກ່ຽວຜົນຜະລິດເຂົ້ານາແຊງຂອງຊາວກະສິກອນ ຢູ່ພາຍໃນເມືອງປາກທາໃນປີນີ້ ແມ່ນໄດ້ເລີ່ມລົງມືມາຕັ້ງແຕ່ທ້າຍເດືອນເມສາ,  ມາຮອດປະຈຸບັນແມ່ນເກັບກ່ຽວໄດ້ສຳເລັດ 90%, ແລະ ຄາດວ່າຈະໃຫ້ສຳເລັດ 100% ໃນທ້າຍ ເດືອນພຶດສະພານີ້, ເຊິ່ງໃນປີນີ້ຕາມແຜນຂອງຫ້ອງການວາງໄວ້ໃນເນື້ອທີ່ການຜະລິດແມ່ນ 300 ເຮັກຕາ, ມີ 9 ບ້ານ, ມີ 350 ຄອບຄົວ, ແຕ່ຜ່ານການຜະລິດຕົວຈິງຂອງຊາວກະສິກອນນັ້ນ ແມ່ນມີເນື້ອທີ່ທັງໝົດ 191 ກ່ວາເຮັກຕາ, ມີ 7 ບ້ານ ມີ 207 ຄອບຄົວ ແລະ ຄາດຄະເນຜົນຜະລິດແມ່ນໃຫ້ໄດ້ 767 ກ່ວາໂຕນ, ສະມັດຕະພາບໃຫ້ໄດ້ 4 ໂຕນ/ເຮັກຕາ, ໃນນີ້ສາເຫດທີ່ພາໃຫ້ການປະຕິບັດບໍ່ໄດ້ຕາມແຜນຂອງຫ້ອງການວາງໄວ້ນັ້ນ ກໍ່ຍ້ອນມີການກໍ່ສ້າງ ແລະ ສ້ອມແປງຊົນລະປະທານຄືນໃໝ່, ນອກນີ້ກໍ່ເກີດມີສະພາບອາກາດແຫ້ງແລ້ງເຮັດໃຫ້ການຊົມໃຊ້ນ້ຳເຂົ້າໃນການຜະລິດບໍ່ພຽງພໍພາໃຫ້ເຂົ້ານາເກີດມີຜົນເສຍຫາຍ, ທ່ານຍັງໄດ້ກ່າວຕື່ມວ່າ: ນອກຈາກການເກັບກູ້ເຂົ້ານາແຊງແລ້ວ ຊາວກະສິກອນຍັງໄດ້ສຳເລັດການເກັບກູ້ສາລີແຂງ ໃນເນື້ອທີ່ 9 ເຮັກຕາ, ສາລີຫວານ ເນື້ອທີ່ 9 ເຮັກຕາ, ຖົ່ວເບີ ເນື້ອທີ່ 3 ກ່ວາເຮັກຕາ, ຖົ່ວດິນ ເນື້ອທີ່ 8 ກວ່າເຮັກຕາ ແລະ ພືດຜັກອື່ນໆ 16 ກ່ວາເຮັກຕາ ນອກຈາກນີ້ສຳລັບການຜະລິດລະດູຝົນທີ່ຈະມາເຖິງນີ້ ທາງຫ້ອງການແມ່ນໄດ້ກະກຽມຊຸກຍູ້ການຜະລິດລະດູຝົນເຊັ່ນວ່າ: ແນວພັນເຂົ້າ, ແນວພັນພືດ, ຝຸ່ນ ແລະ ອື່ນໆ ເພື່ອຮັບໃຊ້ເຂົ້າໃນການຜະລິດໃຫ້ໄດ້ຕາມທີ່ກຳນົດໄວ້.

ພາບ-ຂ່າວ: ທ. ພອນສະຫວັນ ມະນີສີ.