ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຊາວໜຸ່ມກະຊວງ ຖວທ ວາງກະຕ່າດອກໄມ້ເພື່ອລະນຶກເຖີງຄຸນງາມຄວາມດີຂອງ ປະທານ ໄກສອນ ພົມວິຫານ.

ເນື່ອງໃນໂອກາດກອງປະຊຸມໃຫ່ຍຜູ້ແທນຊາວໜຸ່ມກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຄັ້ງທີ VIII ຈະຈັດຂຶ້ນໃນວັນທີ 6 ກຸມພາ 2020, ຊາວໜຸ່ມກະຊວງ ຖວທ ນໍາພາໂດຍ ສະຫາຍ ບົວໄລ ພານຸວົງ, ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມກະ ຊວງ ຖວທ ໄດ້ເຂົ້່າວາງກະຕ່າດອກໄມ້ຢູ່ຕໍ່ໜ້າຮູບປັ້ນປະທານ ໄກສອນ ພົມວິຫານ ທີ່ຫໍພິພິຕະພັນ ໄກສອນ ພົມວິ ຫານ, ນະຄອນຫລວງວຽງຈັນ ໃນວັນທີ 5 ກຸມພາ 2020 ເພື່ອສະແດງຄວາມເຄົາລົບ, ຮູ້ບຸນຄຸນ ແລະ ລະນຶກເຖີງຄຸນງາມຄວາມດີຂອງເພີ່ນທີ່ໄດ້ສ້າງໄວ້ໃຫ້ເຍົາວະຊົນ ແລະ ຊາວໜຸ່ມ ກໍ່ຄື ຄົນຮຸ່ນຫຼັງໄດ້ສືບທອດ ແລະ ຮໍ່າຮຽນເອົາຄຸນສົມບັດສິນທໍາປະຕິວັດ, ມູນເຊື້ອຮັກຊາດ, ຮັກບ້ານເກີດເມືອງນອນ ແລະ ມູນເຊື້ອແຫ່ງການຕໍ່ສູ້ຢ່າງພິລະອາດຫານຂອງເພີ່ນ ກໍ່ຄື ປວງຊົນລາວທັງຊາດ.


ປະທານໄກສອນ ພົມວິຫານ ເປັນຜູ້ກໍ່ຕັ້ງພັກປະຊາຊົນ ປະຕິວັດລາວ ແລະ ກໍ່ສ້າງຊາວໜຸ່ມຕະລຸມບອນໃນຖັນແຖວປະກອບອາວຸດ. ຕະຫຼອດຊີວິດຂອງເພິ່ນໄດ້ອຸທິດຕົນເຂົ້າໃນພາລະກິດຕໍ່ສູ້ກູ້ຊາດ, ນັບແຕ່ມື້ເລີ່ມຕົ້ນທີ່ເພິ່ນໄດ້ກ້າວເຂົ້າສູ່ການປຸກລະດົມຂະບວນການນຳພາປະຊາຊົນລາວບັນດາເຜົ່າຕໍ່ສູ້ຈົນເຖິງວິນາທີສຸດທ້າຍຊີວິດເພິ່ນ. ຍາມໃດເພີ່ນກໍ່ມີນໍ້າໃຈເດັດດ່ຽວ, ອົງອາດກ້າຫານ, ດຸໝັ່ນ, ມີທັດສະນະມະຫາຊົນ ສະເໝີຕົ້ນສະເໝີປາຍ ທັງນໍາພາທາງດ້ານທິດສະດີ ແລະ ເປັນແບບຢ່າງໃນການປະຕິບັດຕົວຈິງ. ຍ້ອນແນວນັ້ນ ເພິ່ນຈິ່ງກາຍເປັນຜູ້ນຳທີ່ດີເດັ່ນ ແລະ ເປັນວິລະບູລຸດຂອງຊາດລາວທີ່ໄດ້ນໍາພາປວງຊົນລາວບັນດາເຜົ່າຕໍ່ສູ້ກູ້ຊາດຍາດໄດ້ໄຊຊະນະ ແລະ ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.


ດ້ວຍຄວາມຈາລຶກເຖີງຄຸນງາມຄວາມດີ, ຜົນງານການອຸທິດອັນໃຫຍ່ຫລວງ ແລະ ຄວາມອາໄລຮັກຢ່າງສຸດຊຶ້ງເຖີງປະທານ ໄກສອນ ພົມວິຫານ ຊາວໜຸ່ມກະຊວງ ຖວທ ໄດ້ພ້ອມກັນປະຕິຍານຕົນຕໍ່ຮູບປັ້ນ ປະທານ ໄກສອນ ພົມວິຫານ ວ່າ: ຈະຮ່ຳຮຽນເອົາຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດທີ່ປອດໃສຂາວສະອາດ, ດຸໝັ່ນ, ຊື່ສັດ, ປະຢັດ ແລະ ທ່ຽງທໍາເຂົ້າໃນການດໍາລົງຊີວິດຕົວຈິງ, ເສຍສະຫລະເພື່ອຜົນປະໂຫຍດສ່ວນລວມຂອງຊາດ, ຈະສືບທອດພາລະກິດປ່ຽນແປງໃໝ່ຂອງພັກຢ່າງມີຫລັກການຮອບດ້ານໃນການປົກປັກຮັກສາ ແລະ ສ້າງສາພັດທະນາປະ ເທດຊາດຕາມເສັ້ນທາງກ້າວເຂົ້້າສູ່ສັງຄົມນິຍົມທີ່ປະທານ ກໍ່ຄື ພັກ ແລະ ລັດຖະບານໄດ້ເລືອກເອົາໄວ້ຢ່າງສຸດກົກສຸດປາຍ.
ໂດຍ: ບຸນຕຽງ ຈັນທະວົງ