ວັນທີ 21 ຕຸລາ 2023. ຢູ່ບ້ານຊ່ວຍເຫຼືອເດັກນ້ອຍ sos ຫຼວງພະບາງ ໄດ້ຈັດພິທີເປີດຝຶກອົບຮົມ ການປຸງແຕ່ງອາຫານ ແລະການປະສົມພັນກົບ ໃຫ້ຊາວໜຸ່ມພາຍໃນບ້ານຂື້ນ ມີ ທ່ານ ຈັນທະວົງ ມະນີພອນ ອຳນວຍການສູນ ການສຶກສານອກໂຮງຮຽນ ພາກເໜືອ ແຂວງຫຼວງພະບາງ, ທ່ານ ທອງພັນ ວັນວິໄລ ຜູ້ຊ່ວຍອຳນວຍ ການບ້ານຊ່ວຍເຫຼືອເດັກນ້ອຍ sos ຫຼວງພະບາງ, ພ້ອມດ້ວຍຄະຮັບຜິດຊອບ, ຄູຝຶກ ແລະຊາວໜຸ່ມເຂົ້າຮ່ວມ. ການຈັດຝຶກອົບຮົມຄັ້ງນີ້ ໂດຍການຮ່ວມມືກັນລະຫວ່າງ ບ້ານຊ່ວຍເຫຼືອເດັກນ້ອຍ sos ຫຼວງພະບາງ ກັບ ສູນການສຶກສານອກໂຮງຮຽນ ພາກເໜືອ ເພື່ອສ້າງຄວາມເຂັ້ມແຂງໃຫ້ຊາວໜຸ່ມພາຍໃນໝູ່ບ້ານຊ່ວຍ ເຫຼືອເດັກນ້ອຍ sos ຫຼວງພະບາງ ທັງເປັນການຍົກລະດັບຄວາມຮູ້ ຄວາມສາມາດ ທັກສະດ້ານຕ່າງໆ ໃຫ້ແກ່ຊາວໜຸ່ມ ແລະສ້າງອາຊີບໃຫ້ຊາວໝຸ່ມ ໄດ້ມີວຽກເຮັດງານທຳທີໝັ້ນຄົງ ກ່ອນອອກໄປຢູ່ເປັນເອກະລາດ. ອີກດ້ານໜຶ່ງ ການປຸງແຕ່ງອາຫານ, ການປະສົມພັນກົບ ແລະລ້ຽງກົບ ຈະສາມາດໃຊ້ເວລາຫວ່າງໃຫ້ຊາວໜຸ່ມ ເຮັດເປັນອາຊີບເສີມ ເພື່ອສ້າງລາຍຮັບໃຫ້ກັບຕົນເອງ ແລະຄອບ ຄົວໄດ້. ຊຸດຝຶກອົບຮົມຄັ້ງນີ້ ຊາວໜຸ່ມຈະໄດ້ຮຽນຮູ້ ວິທີການ, ຂັ້ນຕອນການເຮັດແຈ້ວບອງ, ການເຮັດຊິ້ນແດດດຽວ, ວິທີເຮັດເຫັດສະຫວັນ ແລະໜໍ່ໄມ້ສະຫວັນ, ຮຽນຮູ້ວິທີການ ຂັ້ນຕອນການລ້ຽງກົບ, ການປະສົມພັນກົບ, ການຂະຫຍາຍພັນກົບ ແລະການລ້ຽງກົບ ໂດຍຈະໄດ້ຮຽນຮູ້ທັງພາກທິດສະດີ ແລະພາກປະຕິບັດຕົວ ໃຊ້ເວລາ 5 ວັນຈຶ່ງຈະສຳເລັດ.
ຂ່າວ: ແຫຼ້ ສຸລີນພອນ
