ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຊາວໜຸ່ມລາວ ສຸມໃສ່ 12 ຂະບວນການ ເພື່ອຕ້ອນຮັບວັນສໍາຄັນຂອງຊາດ

ທ່ານ ອາລຸນໄຊ ສູນນະລາດ ກຳມະການສຳຮອງສູນ ກາງພັກ ສະມາຊິກສະພາແຫ່ງຊາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ທັງເປັນກຳມະການສູນກາງແນວລາວສ້າງຊາດ ໄດ້ປະກອບຄໍາເຫັນໃນ ກອງປະຊຸມຄົບຄະນະກຳມະການສູນກາງແນວລາວສ້າງຊາດ ຄັ້ງທີ 5 ສະໄໝ ທີ່ X ຈັດຂຶ້ນໃນລະຫວ່າງວັນທີ 11-12 ສິງຫາ 2020 ທີ່ຫໍປະຊຸມແຫ່ງຊາດ, ນະ ຄອນຫຼວງວຽງຈັນໃນ ຫົວຂໍ້ "ການປຸກລະດົມມະຫາຊົນເຂົ້າຮວ່ມສ້າງຂະບວນການເພື່ອຂ່ຳນັບຮັບຕ້ອນ ວັນສຳຄັນຂອງຊາດ ແລະ ກອງປະຊຸມໃຫ່ຍ 3 ຂັ້ນຂອງພັກ "
ທ່ານໄດ້ຍົກໃຫ້ເຫັນວ່າ: ເພື່ອສືບຕໍ່ຮັກສາມູນເຊື້ອ ແລະ ຄຸນລັກສະນະພື້ນຖານຂອງຊາວໜຸ່ມຮຸ້ນກ່ອນທັງຕັ້ງໜ້າດໍາລົງບົດບາດ ເປັນກໍາລັງປະຈັນບານ ແລະ ຕົ້ນຕໍຂອງພັກ, ບັນດາອົງການຈັດຕັ້ງມະຫາຊົນຈະອອກແຮງເພີ່ມທະວີຍູ້ແຮງບັນດາຂະແໜງການຕ່າງໆເພື່ອຂໍ່ານັບຮັບຕ້ອນວັນສໍາຄັນລະດັບຊາດ ແລະ ກອງປະຊຸມໃຫຍ່ຜູ້ແທນທົ່ວພັກຄັ້ງທີ XI ທີ່ຈະມາເຖິງດ້ວຍ 12 ຂະບວນການ ດັ່ງນີ້:
1. ຂະບວນການສຶກສາອົບຮົມ, ປູກຈິດສໍານຶກໃນຖັນແຖວມະຫາຊົນ ໂດຍສະເພາະຕໍ່ຄົນຮຸ້ນໜຸ່ມໃຫ້ມີນໍ້າໃຈຮັກຊາດອັນດູດດື່ມ, ມີຄວາມເຊື່ອໝັ້ນຕໍ່ການນໍາພາຂອງພັກ, ມີສະຕິເປັນເຈົ້າຕົນເອງເປັນເຈົ້າຂອງປະເທດຊາດ, ມີສະຕິກົດໝາຍ, ມີນໍ້າໃຈຮັບຜິດຊອບຕໍ່ສັງຄົມ. ນອກນີ້ຈະອອກແຮງໂຄສະນາຕີຖອຍບັນຫາຫຍໍ້ທໍ້ໃນສັງຄົມ ແລະ ໂຄສະນາມະຕິ 108/ກມສພ, ລົງວັນທີ 30 ເມສາ 2020. ກ່ຽວກັບວຽກງານແນວລາວ ແລະ ວຽກງານມະຫາຊົນໃນໄລຍະໃໝ່ໃຫ້ທົ່ວເຖິງລົງສູ່ຮາກຖານເພື່ອຮັບຮູ້, ເຂົ້າໃຈ, ກໍາແໜ້ນເຊື່ອມຊືມ ແນໃສ່ຍົກສູງບົດບາດ ແລະ ສ້າງຄວາມເຂັ້ມແຂງໃຫ້ແກ່ການຈັດຕັ້ງ ເພື່ອເປັນໃຈກາງໃນທຸກວຽກງານ.
2. ເພີ່ມທະວີການຊຸກຍູ້ຂະບວນການກໍາເນີນກອງປະຊຸມໃຫຍ່ຂອງບັນດາອົງການຈັດຕັ້ງມະຫາຊົນ ເຊື່ງເປັນບັ້ນປັບປຸງການຈັດຕັ້ງຢ່າງຮອບດ້ານໃຫ້ສໍາເລັດທັງໝົດພາຍໃນເດືອນສິງຫາ 2020 ເພື່ອກຽມຄວາມພ້ອມສູ່ກອງປະຊຸມໃຫຍ່ຂອງແຕ່ລະອົງການໃນທ້າຍປີນີ້.
3. ສືບຕໍ່ຂະບວນການປັບປຸງການຈັດຕັ້ງໃຫ້ໜັກແໜ້ນ-ເຂັ້ມແຂງ, ກາຍເປັນໃຈກາງເຕົ້າໂຮມຄວາມສາມັກຄີປອງດອງ ແລະ ເຕົ້າໂຮມກໍາລັງແຮງຊາວໜຸ່ມນັບທັງຄົນລາວຢູ່ຕ່າງປະເທດ ເພື່ອປະກອບສ່ວນໃນການຍູ້ແຮງບັນດາຄາດໝາຍໃໝ່ ແລະ ປະກອບສ່ວນສໍາຄັນໃນການປົກປັກຮັກສາ ແລະ ສ້າງສາພັດທະນາປະເທດຊາດອັນແສນຮັກ.
4. ຈັດຕັ້ງຂະບວນການທີ່ເປັນປະໂຫຍດເພື່ອສົ່ງເສີມ ຂະບວນການຝຶກຝົນຫລໍ່ຫລອມຕົນເອງໃຫ້ມີຄຸນສົມບັດສິນທໍາປະຕິວັດ, ມີຈັນຍາທໍາ, ຈັນຍາບັນ ໃນການຮັບໃຊ້ປະຊາຊົນ, ມີຄວາມຮູ້ຄວາມສາມາດສົມຄູ່ກັບໜ້າທີ່ການເມືອງໃນໄລຍະໃໝ່ ທັງຮັບປະກັນລະດັບສີມືແຮງານ ແລະ ສາມາດແຂ່ງຂັນ ແລະ ເຂົ້າເຖິງຕະຫລາດແຮງງານທີ່ມີການແຂ່ງຂັນສູງ ກາຍເປັນກໍາລັງແຮງທີ່ແທ້ຈິງຂອງຊາດ ໂດຍສະເພາະຄົນຮຸ້ນໜຸ່ມໃຫ້ກາຍເປັນຜູ້ສືບທອດພາລະກິດປະຕິວັດຂອງພັກ.
5. ພ້ອມກັນຈັດຕັ້ງຂະບວນການສໍາມະນາວິທະຍາ ສາດ ໃນບັນດາຂະແໜງວິຊາສະເພາະຕ່າງໆ ເພື່ອລົງເລິກຊອກຮູ້ຫາສິ່ງອຸດຕັນ, ກົດໝ່ວງທ່ວງດືງ ຫລື ຈໍາກັດຕໍ່ການບໍລິຫານ, ການພັດທະນາໃນຂົງເຂດຕ່າງໆ ເຊື່ງຕາມແຜນແລ້ວ ສະເພາະສູນກາງຊາວໜຸ່ມຈະໄດ້ມີການສໍາມະນາຈໍານວນ 12 ຫົວຂໍ້ ຫຍ່ອຍກວມເອົາຂົງເຂດ ປກຊ-ປກສ, ຂົງເຂດການເມືອງ, ຂົງເຂດເສດຖະກິດ ແລະ ຂົງເຂດວັດທະນະທໍາ-ສັງຄົມ. ນອກນີ້ ຈະມີກິດຈະກໍາສົ່ງເສີມວຽກດີຄົນເດັ່ນ-ວຽກຈິງຄົນແທ້ໃນຂະບວນການຕົວຈິງຂອງມະຫາຊົນ ພິເສດ ຈະມີການສໍາມະນາໄຂປິດສະໜາຕໍ່ແນວຄິດປະທານໄກສອນ ພົມວິຫານ ຕໍ່ຄົນຮຸ້ນໜຸ່ມໃນຫົວຂໍ້ “ຊາວໜຸ່ມຈົ່ງກາຍເປັນດັ່ງນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝຂອງພວກເຮົາ” ໃນໂອກາດວັນຄົນຮອບ 100ປີຂອງປະທານໄກສອນພົມ ວິຫານ
6. ຈັດຕັ້ງຂະບວນການອາສາສະມັກຊາວໜຸ່ມຕະລຸມບອນຊ່ວຍເຫລືອສັງຄົມເປັນຕົ້ນການບໍລະຈາກເລືອດ, ຊ່ວຍຕ້ານໄພແລ້-ໄພຖ້ວມ, ຕອບບຸນແທນຄຸນຕໍ່ພະນັກ ງານປະຕິວັດອາວຸໂສ, ລະດົມເຄື່ອງຊ່ວຍເຫລືອ ແລະ ປຸກຫໍພັກ ແລະ ອື່ນໆ ໃຫ້ແກ່ຊາວໜຸ່ມນັກຮຽນຢູ່ເຂດຫ່າງໄກສອກຫລີກ ໂດຍສະເພາະເດືອນສິງຫານີ້ ຈະມີຂະບວນ ການຊາວໜຸ່ມອອ້ມຂ້າງສູນກາງ ແລະ ນະຄອນຫລວງວຽງຈັນ ໄປຢ້ຽມຢາມ ແລະ ອວຍພອນບັນດານັກຮົບເກົ່າ ໂດຍແບ່ງອອກເປັນ 3ຈຸເພື່ອສະແດງຄວາມຮູ້ບຸນຄຸນດັ່ງຄໍາເວົາທີວ່າ: “ບໍ່ມີມື້ນັ້ນ ບໍ່ມີມື້ນີ້”.
7. ຊຸກຍູ້ຂະບວນການປູກຈິດສໍານຶກເພື່ອອະນຸລັກຮັກສາວັດທະນະທໍາອັນດີງາມຂອງຊາດຂອງເຜົ່າຕິດພັນການຮັກສາສິ່ງແວດລ້ອມເພື່ອຄົນຮຸ້ນຫລັງ.
8. ຊຸກຍູ້ຂະບວນການແຂ່ງຂັນພອນສະຫວັນ ແລະ ການປະດິດສ້າງໃໝ່ໂດຍສະເພາະການຫັນເປັນທັນສະໄໝເປັນ ຕົ້ນ ຫໍມູນເຊື້ອເອເລັກໂຕນິກ(E-museum), ຕະຫລາດອອນລາຍ (Market-online), ການສ້າງຄູ່ມື, ຂໍ້ມູນຂ່າວສານກ່ຽວກັບຫົວຂໍ້ໃຫ້ທຸກຄົນສາມາດເຂົ້າເຖິງຂໍ້ມູນຂ່າວສານຊາວໜຸ່ມໃນການຮຽນຮູ້ ແລະ ປະກອບອາຊີບຕ່າງໆຜ່ານຊ່ອງທາງໄອທີ.
9. ຊຸກຍູ້ຂະບວນການແຂ່ງຂັນກິລາ, ສິລະປະ, ວັນນະ ຄະດີ ເພື່ອສົ່ງເສີມຄຸນນະພາບຊີວິດໃໝ່, ສ້າງບັນຍາກາດ ແລະ ເງື່ອນໄຂອັນດີແກ່ກອງປະຊຸມໃຫຍ່.
10. ຕັ້ງໜ້າຫັນພະນັກງານລົງຮາກຖານ, ດ້ວຍຂະ ບວນການແຂ່ງຂັນ ສາມັກຄີປອງດອງຂອງແນວລາວສ້າງຊາດ, 6 ຮັກສາຂອງສະຫະພັນນັກຮົບເກົ່າ, 5 ເປັນເຈົ້າຂອງສະຫະພັນກໍາມະບານ, 3ດີຂອງສະຫະພັນແມ່ຍິງ, 4 ບຸກຂອງຊາວໜຸ່ມ ແລະ 3ດີ 4ຮູ້ຂອງເຍົາວະຊົນຕິດພັນຂໍ້ແຂ່ງຂັນຮັກຊາດພັດທະນາ 3 ສ້າງຂອງພັກແນໃສ່ແກ້ໄຂບັນຫາຫຍໍ້ທໍ້ໃນສັງຄົມຢູ່ຮາກຖານ ແລະ ສົ່ງເສີມຂະບວນ ການພັດທະນາແກ້ໄຂຄວາມທຸກຍາກຂອງປະຊາຊົນ, ເພາະຍາມໃດກໍ່ຖືປະຊາຊົນເປັນກົກ ແລະ ຊົນນະບົດເປັນເປົ້າໝາຍ.
11. ຊຸກຍູ້ຂະບວນການກໍ່ສ້າງພື້ນຖານໂຄງລ່າງ, ພະຫະນະ, ວັດຖຸເຕັກນິກ ເພື່ອຮັບໃຊ້ວຽກງານອົງການຈັດຕັ້ງມະຫາຊົນ ເພື່ອເຮັດສຳເລັດໜ້າທີ່ໂດຍສະເພາະ ແມ່ນການລົງທຶນເພື່ອຄົນລຸ້ນໜຸ່ມ ເນື່ອງຈາກວ່າປະຈຸບັນ ສປປ ລາວ ກຳລັງເປັນປະເທດທີ່ມີປະຊາກອນໜຸ່ມ ກວມເອົາ 62% ຂອງພົນລະເມືອງລາວທົ່ວປະເທດ ແລະ ຈະມີໂອກາດດີໄປຮອດປະມານປີ 2040 ເຊິ່ງພັກ-ລັດ ໄດ້ລົງທຶນກໍ່ສ້າງຫໍມູນເຊື້ອ ແລະ ສູນກິດຈະກໍາຄົບວົງຈອນໃຫ້ແກ່ຊາວໜຸ່ມ-ເຍົາວະຊົນ ທີ່ບ້ານດົງໝາກຄາຍ ເມືອງໄຊທານີ ນະຄອນຫຼວງວຽງຈັນ ຄາດວ່າຈະສໍາເລັດ ເດືອນ ສິງຫາ ແລະ ຈະເປີດນຳໃຊ້ທ້າຍປີ 2020 ເພື່ອເປັນຂອງຂວັນຂອງພັກ-ລັດ ແກ່ຄົນຮຸ້ນໜຸ່ມໃນໂອກາດກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດຄັ້ງທີ VIII ນອກຈາກນີ້ບັນດາເຮືອນພັກ, ໂຮງແຮມ, ສູນວິຊາຊີບ, ສູນຮຽນຮູ້, ສູນກິດຈະ ກຳຫຼາຍບ່ອນກໍ່ໃກ້ຈະສຳເລັດອັນຈະເປັນພື້ນຖານອັນດີ ໃນການດຶງດູດເອົາຄົນຮຸ້ນໜຸ່ມລວມທັງຜູ້ປົກຄອງເຂົ້າມາຮ່ວມ, ມາຊົມ, ມາແລກປ່ຽນ, ມາຮຽນຮູ້ ແລະ ສຶກສາອົບຮົມ ການເປັນຜູ້ສຶບທອດທີ່ມີຄຸນະພາບ.
12. ອອກແຮງປຸກລະດົມຂະບວນການທົ່ວສັງຄົມ, ເຂົ້າຮ່ວມຂະບວນການລວມໂດຍສະເພາະການກະກຽມໃສ່ກອງປະຊຸມໃຫຍ່ຜູ້ແທນທົ່ວພັກຄັ້ງທີ XI ໃຫ້ມີຄວາມສະຫງົບ, ມີຄວາມສາມັກຄີເປັນເອກະພາບ, ມີເນື້ອໃນເລິກເຊິ່ງ ແລະ ມີຜົນສຳເລັດຕາມລະດັບຄາດໝາຍ ພ້ອມດຽວ ກັນກໍ່ສືບຕໍ່ປະຕິບັດແນວທາງການຕ່າງປະເທດ ແລະ ຍາດແຍ່ງເອົາການສະໜັບສະໜູນ, ບົດຮຽນ ແລະ ທຶນຮອນມາພັດທະນາອົງການ ແລະ ຖັນແຖວມະຫາຊົນໃຫ້ໄດ້ຮັບການພັດທະນາຮອບດ້ານ.

ໂດຍ: ບຸນຕຽງ ຈັນທະວົງ